ރާއްޖޭގެ ދެކުނުގެ އަތޮޅުތަކަށް މިހާރު ކުރަމުންދާ ވިއްސާރައިގައި، އައްޑޫ ސިޓީގެ ބައެއް ގެތަކުގެ ފުރާޅު ވަޔާ އެއްލާލައި ބޮޑެތި ގެއްލުންތަކެއް ވެއްޖެއެވެ. މި ހާދިސާތަކާ ގުޅިގެން އެމްއެންޑީއެފް ސަދަން އޭރިއާ ކޮމާންޑްގެ ސިފައިން ދަނީ އެހީތެރިކަން ފޯރުކޮށްދެމުންނެވެ.
އެމްއެންޑީއެފްއިން ހާމަކުރި ގޮތުގައި، ވިއްސާރައާ އެކު އެރި ކޮޅިގަނޑުގައި މިހާތަނަށް ޖުމްލަ 4 ގެއެއްގެ ފުރާޅު ވަނީ ވަޔާ އެއްލާލާފައެވެ. އޭގެ ތެރޭގައި ހިތަދޫ އާލިއާ މަންޒިލް، ބިންމާގެ، މަރަދޫ އެމަރލްޑްގެ އަދި މީދޫ މޫންޝެޑޯގެ ހިމެނެއެވެ. ނަމަވެސް މި ހާދިސާތަކުގައި އެއްވެސް މީހަކަށް އަނިޔާއެއް ލިބިފައި ނުވާކަމަށް ސިފައިން ވިދާޅުވިއެވެ.
އައްޑޫ ސިޓީގެ މެޔަރ އަލީ ނިޒާރު ވިދާޅުވީ، ވައި ގަދަވުމުގެ ސަބަބުން ގެތަކުގެ ފުރާޅު އެއްލާލުމުގެ އިތުރުން މަގުމަތީގައި ހުރި ބޮޑެތި ގަސްތައް ވެއްޓިފައިވާ ކަމަށެވެ. އަދި ހިތަދޫގައި ހުރި ބައެއް ފްލެޓްތަކަށް ގެއްލުންވެ، ބައެއް ގެތަކަށް ފެންވަދެގެންވެސް ރިޕޯޓުކޮށްފައިވާ ކަމަށް އޭނާ ވިދާޅުވިއެވެ.
މެޔަރ ނިޒާރު އިތުރަށް ވިދާޅުވީ، “ހަމަގަސްތައްވެސް ވައިބާރުކަމުން އެބަހުރި ވެއްޓިފައި. ފުރާޅު އެއްލާލާ ވަރަށް ބޮޑު ގެއްލުންތަކެއް ވަނީ ވެފައި. އަދި ފެންވަދެގެންވެސް އެބަހުރި ރިޕޯޓްކޮށްފައި. ނިސްބަތުން ހަމަ ބޮޑެތި ގެއްލުންތަކެއް ވަނީ ވެފައި” ކަމަށެވެ.
ނޭޝަނަލް ޑިޒާސްޓަރ މެނޭޖްމަންޓު އޮތޯރިޓީ (އެންޑީއެމްއޭ) އިން ވިދާޅުވީ އައްޑޫގެ އިތުރުން ފުވައްމުލަކުންވެސް ގެއްލުންތަކުގެ ރިޕޯޓު ލިބެމުންދާ ކަމަށެވެ. އެގޮތުން ފުވައްމުލަކު ގެއެއްގެ މައްޗަށް ބަންބުކެޔޮ ގަހެއް ވެއްޓި ގެއްލުން ވެފައިވާ ކަމަށް އެ އޮތޯރިޓީން މައުލޫމާތު ދެއެވެ.
މިހާތަނަށް އެއްވެސް ފަރާތަކުން އިންސާނީ އެހީތެރިކަމަށް އެދިފައި ނުވި ނަމަވެސް، ލިބެމުންދާ ގެއްލުންތައް ދެނެގަތުމުގެ މަސައްކަތް ކުރަމުންދާ ކަމަށް އެންޑީއެމްއޭއިން ވަނީ ވިދާޅުވެފައެވެ.