ސަރުކާރުގެ އޮފީސްތަކުގައި މަސައްކަތްކުރާ ސިވިލް ސަރވިސް މުވައްޒަފުން ހެދުން އެޅުމުގެ މިންގަނޑުތައް ހިފެހެއްޓުމަށްޓަކައި، އެ މުވައްޒަފުން ހެދުން އެޅުމާ ގުޅޭ ގަވާއިދު ސިވިލް ސަރވިސް ކޮމިޝަނުން (ސީއެސްސީ) މިއަދު އިސްލާހުކޮށްފިއެވެ. މި ބަދަލަކީ ސިވިލް ސަރވިސް މުވައްޒަފުންގެ ހެދުން އެޅުމުގެ މިންގަނޑުތައް އިޖުތިމާޢީ މިންގަނޑަށްވުރެ ދަށްވެފައިވާ ކަމަށް ބުނެ އާންމުންގެ ފަރާތުން ލިބުނު ޝަކުވާތަކާ ގުޅިގެން ގެނައި ބަދަލެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުމާލެ ފުރަތަމަ ފިޔަވަހީގެ ރައްޔިތުންނާ ބައްދަލުކުރައްވައި ވިދާޅުވީ، ސިވިލް ސަރވިސް މުވައްޒަފުންގެ ހެދުން އެޅުމުގެ ގަވާއިދު އިސްލާހު ކުރުމަށް ސީއެސްސީގައި ދަންނަވާފައިވާނެ ކަމަށެވެ. އެމަނިކުފާނު ފާހަގަކުރެއްވި ގޮތުގައި 2014 ވަނަ އަހަރާ ހަމައަށް އޮތް ހަރުދަނާ މިންގަނޑުތަކަށް ބަދަލު ގެނައުމުގެ ސަބަބުން މިންގަނޑުތައް ވަނީ ދަށްވެފައެވެ. އެހެންކަމުން، ކުރީގެ މިންގަނޑާ އެއްގޮތަށް އަލުން އަމަލުކުރުމަށް މިހާރު ވަނީ ނިންމާފައެވެ.
ފިރިހެން މުވައްޒަފުންގެ ހެދުމުގެ މިންގަނޑު\
އަލަށް ގެނައި އިސްލާހުގައިވާ ގޮތުން، ސިވިލް ސަރވިސްގެ ފިރިހެން މުވައްޒަފުން ރަސްމީ މަސައްކަތުގައި ތިބެންވާނީ ގަމީހާއި ފަޓުލޫނު، ޓައި އަދި އޮފީސް ބޫޓުގައެވެ. ގަމީހުގެ ގޮތުގައި އަތްދިގު ނުވަތަ އަތްކުރު ގަމީހުގެ އިތުރުން ބުސް ގަމީސް ބޭނުންކުރެވިދާނެއެވެ. ހުންނަން ވާނީ ބެގީކޮށްފައެވެ.
އަންހެން މުވައްޒަފުންގެ ހެދުމުގެ މިންގަނޑު
އިސްލާހުގައިވާ ގޮތުން މިހާރު އަންހެން މުވައްޒަފުންނަށް ކުރު ޓޮޕް ފަދަ ހެދުން އަޅައިގެން އޮފީހަކަށް ނުދެވޭނެއެވެ.
އަންހެން މުވައްޒަފުން ރަސްމީ މަސައްކަތުގައި އުޅޭއިރު ބޭނުންކުރަންވާނީ ދިގު ހެދުމެއް، ދިވެހި ލިބާހެއް ނުވަތަ އޮފީސް ހެދުމެވެ. ހެދުން އެޅުމުގައި ޚާއްސަ ސަމާލުކަން ދޭންވީ ކަންކަން އިސްލާހުގައި ތަފްސީލުކޮށްފައިވާއިރު، މުވައްޒަފުން ތިބެންވާނީ ޚިދުމަތް ހޯދަންދާ މީހުންގެ ކުރިމަތީގައި އޮފީހުގެ ގަދަރާއި ހައިބަތު ހިފެހެއްޓޭ ފަދަ ސާފުތާހިރު، އެކަށީގެންވާ ނަލަ ހެދުމެއްގައެވެ.