މި އަހަރު ރާއްޖެއަށް ޒިޔާރަތްކުރި ފުރަތަމަ ފަސިންޖަރަށް ރާއްޖެއިން މިއަދު ހޫނު މަރުހަބާއެއް ކިޔައިފިއެވެ. މި އަހަރުގެ ފުރަތަމަ ފަތުރުވެރިޔާގެ ގޮތުގައި ރާއްޖެ އައިސްފައިވަނީ އެތިހާދު އެއާވޭސްގެ ފްލައިޓަކުން ދަތުރުކުރި ޖަރުމަންވިލާތުގެ ރައްޔިތެއް ކަމަށްވާ އުމުރުން 54 އަހަރުގެ ތޯމަސް އެންޑްރޫ ހެލްވެގާ އެވެ.
ތޯމަސް ރާއްޖެ އައިސްފައިވަނީ އޭނާގެ އަންހެނުންނާއެކުގައެވެ. މިއީ މި ދެމަފިރިން ރާއްޖެއަށް ޒިޔާރަތްކުރި ފުރަތަމަ ފަހަރުކަން ފާހަގަކުރެވެއެވެ. މި ފަތުރުވެރިޔާއަށް މަރުހަބާ ކިއުމުގެ ގޮތުން ވެލާނާ އިންޓަނޭޝަނަލް އެއާޕޯޓުގެ އެރައިވަލް އޭރިއާގައި މިއަދު ވަނީ ހާއްސަ ހަފުލާއެއް ބާއްވާފައެވެ.
މި ހަފުލާގައި ތޯމަސްއަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ފަރާތުން މަރުހަބާ ވިދާޅުވީ ޕެސެންޖާ ސާވިސަސްގެ ޑެޕިއުޓީ ޗީފް އޮފިސަރު އަލީ މުސްތާގުއެވެ. އަދި މި ހަފުލާގެ ތެރެއިން އެމްއޭސީއެލްގެ ފަރާތުން ތޯމަސްއަށް ވަނީ ހާއްސަ ހަދިޔާއެއް ވެސް އަރުވާފައެވެ.
ވެލާނާ އިންޓަނޭޝަނަލް އެއާޕޯޓުގެ ޓާމިނަލް 1 އިން މިހާރު ވެސް ދަނީ 41 އެއާލައިނަކަށް ހިދުމަތް ދެމުންނެވެ. އަދި މިހާތަނަށް 600,000 އަށްވުރެ ގިނަ ފަސިންޖަރުންނަށް އެ އެއާޕޯޓުން ވަނީ ހިދުމަތް ފޯރުކޮށްދީފައެވެ.
އެމްއޭސީއެލްގެ އަމާޒަކީ ރާއްޖެއަށް ދަތުރުކުރާ ހުރިހާ އެއާލައިނަކާއި އެއާޕޯޓުގެ ހިދުމަތް ހޯދާ ހުރިހާ ފަސިންޖަރުންނަށް އެންމެ ފުރިހަމަ އަދި އެންމެ މަތީ ފަންތީގެ ހިދުމަތެއް ފޯރުކޮށްދިނުން ކަމަށް އެ ކުންފުނިން ވަނީ ހާމަކޮށްފައެވެ.