ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން އައު އަހަރުގެ ފެށުމާ ދިމާކޮށް އެ ކުންފުނީގެ އައު ލޯގޯ ރަސްމީކޮށް ލޯންޗު ކޮށްފި އެވެ.
އައު ލޯގޯއަކީ ދިވެހިންގެ އަތްތެރިކަމުގެ އެންމެ އަސާސީ ބިންގާ ކަމުގައިވާ ދިވެހި ރުކުގެ ފަން ވިނުމުގެ ފުރަތަމަ މަރުހަލާ ރަމްޒުކޮށްދޭ، މާނަފުން ފަރުމާ އެކެވެ.
ދިވެހިވަންތަ ސިފަތަކެއް އެކުލެވޭ ގޮތަށް ފަރުމާ ކޮށްފައިވާ މި ލޯގޯއިން ފެންނަނީ ދިވެހިންގެ އަތްތެރިކަމުގެ އެންމެ އަސާސީ ބިންގާ ކަމުގައިވާ ދިވެހި ރުކުގެ ފަން ވިނުމުގެ ފުރަތަމަ މަރުހަލާއެވެ. އާރުޑީސީން ހާމަކުރި ގޮތުގައި، މި ލޯގޯއިން ދައްކުވައިދެނީ ކުންފުނީގެ އުފެއްދުންތެރިކަމާއި އިމާރާތްކުރުމުގެ ފެށުމެވެ. ދިވެހިރާއްޖޭގެ އާދަކާދައާއި ސަގާފަތުގައި ދިވެހި ރުކުގެ ފަނުން ވިޔެފައިވާ ފުރާޅުތަކާއި ފާރުތަކަކީ ކާބަފައިން ދިރިއުޅުމުގެ ކަންކަމަށް ބޭނުން ކޮށްފައިވާ އެންމެ މުހިންމު އެއް ވަސީލަތެވެ. އޭރު ރާއްޖޭގެ ކޮންމެ ރަށެއްގައިވެސް ފެނިގެންދިޔައީ ފަނުން ވިޔެފައިވާ ގެތަކާއި ފުރާޅުތަކެވެ.
އާރުޑީސީ އިން ހާމަކޮށްފައިވާ ގޮތުގައި ފަން ވިޔުމުގައި ކޮންމެ ފަތެއް އަނެއް ފަތަކާ ގުޅި ބާރުވެރިވާ ފަދައިން، މި ލޯގޯއިން ދައްކުވައިދެނީ ދިވެހިންގެ މެދުގައި އޮންނަ އެކުވެރިކަމާއި އެއްބައިވަންތަކަމެވެ. ކުންފުނި ރީބްރޭންޑް ކުރުމުގައި މި ފަންނުން “އިންސްޕިރޭޝަން” ލިބިގަތީ ގެދޮރު އިމާރާތް ކުރުމުގައި ފަން ބޭނުންކުރި ގޮތުގެ މާނަވީ މުހިންމުކަމުގެ ސަބަބުން ކަމަށް އެ ކުންފުނިން ފާހަގަކުރެއެވެ.
މި އައު ލޯގޯގެ ފަރުމާއާ ގުޅޭގޮތުން އާރުޑީސީން ފާހަގަކުރި މުހިންމު ނުކުތާތަކުގެ ތެރޭގައި ހިމެނެނީ:
- އެއްބައިވަންތަކަމުގެ ރަމްޒު: ފަން ވިޔުމުގައި ކޮންމެ ފަތެއް އަނެއް ފަތަކާ ގުޅި، ބާރުވެރިވެ، އެކުގައި ވަރުގަދަ އެއްޗަކަށް ވެގެންދާ ފަދައިން، މިއީ ދިވެހިންގެ ދިރިއުޅުމުގައި ފެންނަ އެކުވެރިކަމާއި އެއްބައިވަންތަކަމުގެ ރަމްޒެކެވެ.
- މަސައްކަތުގެ ބިންގާ: ފަން ވިނުމުގެ ފުރަތަމަ ފަންވަތް މަޅާލުމުން ފެށިގެން ނިޒާމެއް އުފެދިގެން އަންނަ ގޮތް ދައްކުވައިދޭ މި ލޯގޯއަކީ ކުންފުނީގެ މަސައްކަތުގެ ވާހަކަ ކިޔައިދޭ ރަމްޒެކެވެ. ކުންފުނިން ކުރާ ކޮންމެ މަސައްކަތަކީވެސް ބިންގަލެއް އެޅުމަށާއި ވަރުގަދަ ގުޅުންތަކެއް އުފެއްދުމަށް ކުރާ މަސައްކަތެކެވެ.
- ގުޅުންތައް ބަދަހިކުރުން: ވިޔުމުގެ ޕްރޮސެސްގައި ފަންވަތްތައް ގުޅިފައިވާ ފަދައިން، ކުންފުނީގެ މުވައްޒަފުންގެ މެދުގައި އޮންނަ އެކުވެރިކަމާއި، ޚިދުމަތް ލިބިގަންނަ ފަރާތްތަކާއި މުޖުތަމައުއާ ދެމެދު އޮންނަ ގާތް ގުޅުން މި ލޯގޯއިން ރަމްޒުކޮށްދެއެވެ.
- ހަރުދަނާކަން: ލޯގޯގައި ހިމެނޭ ހަ ކަން (ހެކްސަގޮން) ބައްޓަމުން ދައްކުވައިދެނީ ކުންފުނީގެ ހަރުދަނާކަމާއި، ބިންގަލުގެ ވަރުގަދަ ކަމެވެ.
އާރުޑީސީން ބުނި ގޮތުގައި، ކުންފުނީގެ ކޮންމެ ޑިޕާޓްމަންޓަކުން ކުރާ މަސައްކަތަކީވެސް ދިވެހި ރުކުގެ ފަނުން ވިޔެފައިވާ ފުރާޅެއް ފަދައިން، އެކަކު އަނެކަކަށް އެހީތެރިވެދޭ، އެކުވެރި މާހައުލެއްގައި ކުރެވޭ މަސައްކަތްތަކެކެވެ.
“ރީބްރޭންޑްކުރުމުގެ މި މަސައްކަތަކީ އަޅުގަނޑުމެންގެ ކުންފުނީގެ އައު ފެށުމެކެވެ. ދިވެހި އަތްތެރިކަމުގެ ފުރަތަމަ މަރުހަލާއިން ފެށިގެން، މި ކުންފުނިވެސް އައޔ ފޮޅުވަތެއް ލިޔަމުން މިދަނީ އެ އަސާސީ ހަމަތަކުގެ މައްޗަށް ބިނާކޮށެވެ،” އާރުޑީސީގެ ބަޔާނުގައިވެއެވެ.
މި އައު ލޯގޯއަކީ އާރުޑީސީގެ މާޒީގެ ސަގާފީ އަގުތަކާއި މުސްތަޤްބަލުގެ އުންމީދުތައް ގުޅުވައިދޭ ފާލަމެއްގެ ގޮތުގައި އެ ކުންފުނިން ސިފަކުރެއެވެ. މިއީ ރައީސް ޑރ. މުޙައްމަދު މުޢިއްޒުގެ ސަރުކާރުގައި، ކުންފުނިތަކުގެ ހިންގުން ހަރުދަނާކޮށް، ދިވެހިވަންތަ ސިފަތަކާއެކު ކުރިއަށް ދިއުމަށް ކުރެވޭ މަސައްކަތުގެ ތެރެއިން އެޅުނު މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.
“ކުންފުނީގެ މަޤްޞަދަކީ މަގުތައް ހެދުމާއި، ދާލަންތައް މަރާމާތުކޮށް ބެލެހެއްޓުމާއި، ހައިވޭތަކާއި ކޯޒްވޭތައް ހެދުމާއި، އިމާރާތްކުރުމާއި އިމާރާތްކުރާ ސާމާނު ފޯރުކޮށްދިނުމެވެ.” އާރްޑީސީ