ހއ. ދިއްދޫ އެއާޕޯޓު ތަރައްގީކުރުމަށް ބޭނުންވާ ބިން ހިއްކުމުގެ މަސައްކަތް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި އިރުޝާދާ އެއްގޮތަށް ތާވަލަށްވުރެ އަވަހަށް ނިންމާލެވޭނެ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެނޭޖިން ޑިރެކްޓަރު އިބްރާހީމް ޝަރީފު ވިދާޅުވެއްޖެއެވެ. މި މަޝްރޫއަކީ ދިއްދޫ ރައްޔިތުންނަށް ރައީސް ވެވަޑައިގެންފައިވާ މުހިންމު ވައުދުފުޅެކެވެ.
ދިއްދޫ އެއާޕޯޓު ތަރައްގީކުރުމަށްޓަކައި ބިން ހިއްކަން ފެށުމަށް މިއަދު ބޭއްވި ހާއްސަ ރަސްމިއްޔާތުގައި ވާހަކަދައްކަވަމުން ޝަރީފު ވިދާޅުވީ، ދިއްދޫގައި އެއާޕޯޓެއް ތަރައްގީކޮށްދެއްވުމުގެ ފުރުސަތު އެމްއޭސީއެލްއަށް ލިބުމަކީ އެ ކުންފުންޏަށް ލިބުނު ވަރަށް ބޮޑު އުފަލެއް ކަމަށެވެ. މި މަޝްރޫއުގެ ދަށުން ދިއްދޫއަށް ޖުމްލަ 115 ހެކްޓަރުގެ ބިން އިތުރުކުރެވިގެންދާނެ ކަމަށް އޭނާ ފާހަގަކުރެއްވިއެވެ.
މި މަސައްކަތަށް ބޭނުންކުރާ ޑްރެޖަރާ ގުޅޭގޮތުން ވާހަކަދައްކަވަމުން ޝަރީފު ވިދާޅުވީ، ބައެއް މީޑިއާތަކުގައި އެއީ ދުނިޔޭގެ ތިންވަނައަށް އެންމެ ބޮޑު ޑްރެޖަރު ކަމަށް ރިޕޯޓުކޮށްފައިވީ ނަމަވެސް، އެއީ ދުނިޔޭގެ އެންމެ ބޮޑު ދެ ޑްރެޖަރުގެ ތެރެއިން އެއް ޑްރެޖަރު ކަމަށެވެ. އެމްއޭސީއެލްގެ އަތުގައި އެހެން ޑްރެޖަރުތައް ހުރި ނަމަވެސް، ދިއްދޫއަށް މިފަދަ ބޮޑު ޑްރެޖަރެއް ގެނައީ މަސައްކަތް ވީހާވެސް އަވަހަށް ނިންމުމަށް ރައީސް ބޭނުންފުޅުވާތީ ކަމަށް އޭނާ ވިދާޅުވިއެވެ.
“ދިއްދޫއަށް މިހާ ބޮޑަށް އަހައްމިއްޔަތުކަން ދެއްވައިގެން މި މަސައްކަތް އަޅުގަނޑުމެންނާ ހަވާލުކުރެއްވުމަށްފަހު ރައީސް ވިދާޅުވީ ވީހާ އަވަހަށް މި މަސައްކަތް ނިންމާލާށޭ. އަޅުގަނޑުމެންގެ އަތުގައި އެހެން ޑްރެޖަރު އެބަހުރި، އެހެންނަމަވެސް މިކަން އަވަސްކޮށް ނިންމައިލުމަށް ދުނިޔޭގައި އޮތް އެންމެ ބޮޑު ޑްރެޖަރު ގެންނަވަން ރައީސް ނިންމެވީ،” ޝަރީފު
އެމްއޭސީއެލްއިން މިހާރުވެސް ރާއްޖޭގެ ތިން ސަރަހައްދެއްގައި ބިން ހިއްކުމުގެ ބޮޑު ތިން މަޝްރޫއެއް ހިންގަމުންދާކަން ފާހަގަކުރައްވައި، ޝަރީފު ވަނީ ދިއްދޫގެ މަސައްކަތްވެސް ކަނޑައެޅިފައިވާ ތާވަލާ އެއްގޮތަށް ނިންމާލެވޭނެ ކަމުގެ ފުރިހަމަ ޔަގީންކަން ދެއްވާފައެވެ. މީގެ އިތުރުން، މި މަޝްރޫއު ކުރިއަށްގެންދިއުމުގައި ދިއްދޫ ދާއިރާގެ މަޖިލިސް މެންބަރު އަބްދުއްލަތީފު މުހައްމަދު ކުރެއްވި ބުރަ މަސައްކަތްތައް ފާހަގަކުރައްވައި ޝަރީފު ވަނީ އޭނާއަށް ޝުކުރު އަދާކުރައްވާފައެވެ.