ޝަރީއަތް ނިމެންދެން ބަންދުކޮށްފައިވާ ނުވަތަ "ވާނުވާ" ބަންދުގައި ތިބި ހުރިހާ މީހުންގެ މައްސަލަތައް މި އަހަރުގެ ތެރޭގައި އެއްކޮށް ނިންމާލެވޭނެ ކަމުގެ ބޮޑު އުންމީދެއް އެބައޮތް ކަމަށް ކުރިމިނަލް ކޯޓުން ހާމަކޮށްފިއެވެ. ކޯޓުން މިކަން ހާމަކުރީ އެ ކޯޓުގެ މަސައްކަތްތަކާ ގުޅޭގޮތުން އެންމެ ފަހުން އާންމުކުރި ތަފާސްހިސާބުތަކާ އެކުގައެވެ.
ކުރިމިނަލް ކޯޓުގެ ތަފާސްހިސާބުތަކަށް ބަލާއިރު، މިދިޔަ އަހަރު ފެށުނުއިރު ޝަރީއަތް ނިމެންދެން ބަންދުގައި 272 މީހުން ތިއްބެވެ. ނަމަވެސް، އަހަރު ނިމުނުއިރު އެ އަދަދު ވަނީ 128 އަށް ތިރިކުރެވިފައެވެ. 2025 ވަނަ އަހަރުގެ ތެރޭގައި ކޯޓަށް ޖުމްލަ 1,062 މައްސަލަ ހުށަހެޅުނުއިރު، ގާޒީން ވަނީ ޖުމްލަ 1,380 މައްސަލަ ނިންމަވާފައެވެ. މިއީ މައްސަލަ ހުށަހެޅުނު ނިސްބަތަށް ބަލާއިރު 130 އިންސައްތައިގެ ކުރިއެރުމެކެވެ.
ކޯޓުގެ މަސައްކަތްތަކަށް އައި އެންމެ ބޮޑު ބަދަލަކީ ހުޅުމާލޭގައި ގާއިމުކުރި އައު އިމާރާތަށް ބަދަލުވުމެވެ. އައު އިމާރާތަށް ބަދަލުވުމުގެ ކުރިން މަހެއްގެ މައްޗަށް އެވެރެޖުކޮށް ނިންމެނީ 72 މައްސަލަ ނަމަވެސް، މިހާރު އެ އަދަދު ވަނީ 140 އިންސައްތަ އިތުރުވެ، މަހަކު އެވެރެޖުކޮށް 175 މައްސަލަ ނިންމާ މިންވަރަށް މަތިވެފައެވެ. މިއީ 2024 ވަނަ އަހަރާ އަޅާބަލާއިރު 113 އިންސައްތައިގެ ބޮޑު ކުރިއެރުމެކެވެ.
ވަކިވަކި ގާޒީންގެ މަސައްކަތަށް ބަލާއިރު، މި އަހަރު އެންމެ ގިނަ މައްސަލަ ނިންމަވާފައިވަނީ ގާޒީ އަލީ ނަދީމް އެވެ. އޭނާ ވަނީ 302 މައްސަލަ ނިންމަވާފައެވެ. އެންމެ މަދުން މައްސަލަ ނިންމެވި ގާޒީ ހުސައިން ފާއިޒު ރަޝާދު ނިންމަވާފައިވަނީ 56 މައްސަލައެވެ.
ކުރިމިނަލް ކޯޓު ކުރިން ހިންގި އިމާރާތް ބޭނުންނުކުރެވޭ ވަރަށް ވީރާނާވުމުގެ ސަބަބުން މަސައްކަތްތައް މަޑުޖެހިފައި ވަނިކޮށް، ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ހުޅުމާލޭގައި ކޯޓަށް އައު އިމާރާތެއް ހަމަޖައްސައިދީފައެވެ. މި އަހަރުގެ ޖުލައި މަހުން ފެށިގެން ކުރިމިނަލް ކޯޓާއި ޑްރަގް ކޯޓުގެ އަޑުއެހުންތައް ކުރިއަށްގެންދަނީ މި އިމާރާތުގައެވެ. މި ތަނުގައި ކުރިމިނަލް ކޯޓަށް 10 ކޯޓު ރޫމު އަދި ޑްރަގް ކޯޓަށް 5 ކޯޓު ރޫމު ހާއްސަކުރެވިފައިވެއެވެ.