ނެޝަނަލް ޑްރަގް އެޖެންސީ (އެންޑީއޭ) އިން ފަރުވާ ހޯދަމުންދާ މީހުންނަށް މަސްތުވާތަކެތި ފޯރުކޮށްދީ، ނަހަމަ ގުޅުން ބޭއްވި ކަމުގެ ތުހުމަތުގައި ހައްޔަރުކޮށްފައިވާ އެ އެޖެންސީގެ ޕިއާ މެންޓާ، ސ. ފޭދޫ، ފްލޮރިޑާ، މުހައްމަދު ފަސީހު (51އ) ގެ ބަންދަށް ކޯޓުން އިތުރު 15 ދުވަސް ޖަހައިފިއެވެ.
ފަސީހު ހައްޔަރުކޮށްފައިވަނީ މިދިޔަ އަހަރުގެ ނޮވެމްބަރު މަހުގެ 20 ވަނަ ދުވަހުއެވެ. އޭނާގެ ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން، ކޯޓުން ވަނީ އޭނާ އިތުރު 15 ދުވަހަށް ބަންދުގައި ބެހެއްޓުމަށް އަމުރުކޮށްފައެވެ. މީގެ ކުރިންވެސް އޭނާގެ ބަންދުގެ މުއްދަތު އެކި ފަހަރުމަތިން ވަނީ އިތުރުކޮށްފައެވެ. އެގޮތުން އެންމެ ފަހުން އޭނާ ބަންދުގައި ބެހެއްޓުމަށް ކޯޓުން އަމުރުކޮށްފައިވަނީ 30 ދުވަހުގެ މުއްދަތަށެވެ.
މުހައްމަދު ފަސީހަކީ މަސްތުވާތަކެތީގެ އެޑިކްޝަނުން ސަލާމަތްވުމަށް ފަރުވާ ހޯދުމަށްފަހު ރިކަވަރީގައި ހުރި މީހެކެވެ. އޭނާ އެންޑީއޭގައި އަދާކުރަމުންދިޔަ ޕިއާ މެންޓާގެ ވަޒީފާއަކީ ފަރުވާ ހޯދާ މީހުން މަސްތުވާތަކެތީގެ ވަބާއިން ސަލާމަތްވެ، ރަނގަޅު މީހުންގެ ގޮތުގައި މުޖުތަމައަށް ނުކުތުމަށް ބާރުއަޅައި މޯޓިވޭޓް ކުރުމެވެ.
ނަމަވެސް، އޭނާގެ މައްޗަށް ތުހުމަތު ކުރެވިފައިވަނީ އޭނާގެ މަސްއޫލިއްޔަތާ ހިލާފަށް، ފަރުވާ ހޯދަމުންދާ ކްލަޔަންޓުންނަށް މަސްތުވާތަކެތި ދީ، އެމީހުންނާއެކު ނަހަމަ ގުޅުންތައް ބާއްވަމުންދިޔަ ކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.