ބޭސް ސިޓީ ފޯޖުކޮށްގެންނާއި އެހެން މީހުންގެ ނަމުގައި އޮޅުވާލައިގެން 175,174 ރުފިޔާގެ ބޭސް އާސަންދަ ސްކީމުގެ ދަށުން ނަގާފައިވާ މައްސަލައެއް އޮޑިޓާ ޖެނެރަލްގެ އޮފީހުން ފާހަގަކޮށްފިއެވެ. މިކަން ހާމަކޮށްފައިވަނީ އެ އޮފީހުން މިއަދު އާންމުކުރި "އިޖުތިމާއީ ސިއްހީ އިންޝުއަރެންސް ސްކީމުގެ ޕާފޯމެންސް އޮޑިޓް ރިޕޯޓް" ގައެވެ.
އޮޑިޓް ރިޕޯޓުގައި ބަޔާންކޮށްފައިވާ ގޮތުގައި، އެހެން މީހުންގެ ނަމުގައި އޮޅުވާލައިގެން ބޭސް ނަގަމުންދާ މައްސަލަތަކެއް އާސަންދަ ކުންފުންޏަށް ހުށަހަޅާފައިވީ ނަމަވެސް، އެކަން ހުއްޓުވުމަށް އެކަށީގެންވާ ފިޔަވަޅުތަކެއް އަޅާފައެއް ނުވެއެވެ. އޮޑިޓް ސާމްޕަލްގެ ގޮތުގައި ބެލި ކޭސްތަކުން އެކަނިވެސް 1.7 ލައްކައަށްވުރެ ގިނަ ރުފިޔާގެ ބޭސް މިގޮތަށް ނަގާފައިވާކަން ވަނީ ކަށަވަރުވެފައެވެ.
"އޮޅުވާލައިގެން އެހެން މީހުންގެ ނަމުގައި ބޭސް ނެގިކަމުގެ ޝަކުވާ އާސަންދައަށް ހުށަހަޅާފައިވީ ނަމަވެސް، އާސަންދައިން އެކަށީގެންވާ ފިޔަވަޅު އަޅައިފައި ނުވާކަމާއި، މިގޮތުން ޖުމްލަ 175,174 ރުފިޔާގެ ބޭސް އެކި ފަރާތްތަކުން އެހެން މީހުންގެ ނަމުގައި ނަގާފައިވާކަން އޮޑިޓް ސާމްޕަލްގެ ގޮތުގައި ބަލައިފައިވާ ކޭސްތަކުން ފާހަގަކުރެވިފައިވެއެވެ،" އޮޑިޓް ރިޕޯޓުގައި ބުނެފައިވެއެވެ.
މީގެ އިތުރުން، އާސަންދަ ސްކީމުގެ ބޭނުން ނަހަމަ ގޮތުގައި ހިފާ ވަކިވަކި ފަރުދުންނަށް ފިޔަވަޅު އެޅޭނެ ހަރުދަނާ އުސޫލެއް މިހާތަނަށް ގާއިމުކޮށްފައި ނުވާކަންވެސް އޮޑިޓުން ވަނީ ފާހަގަކޮށްފައެވެ. ނަމަވެސް، އާސަންދަ ކުންފުންޏާ ހަވާލާދީ ރިޕޯޓުގައި ބުނެފައިވަނީ، "ވިނަވި" ޕޯޓަލް މެދުވެރިކޮށް އެފަދަ ފަރާތްތައް ރެސްޓްރިކްޓް ކުރެވޭނެ އިންތިޒާމުތަކެއް މިހާރު ހަމަޖެހިފައިވާ ކަމަށެވެ.
އެގޮތުން 2023 ވަނަ އަހަރުގެ ފަހުކޮޅު ވިނަވި ސިސްޓަމަށް ތައާރަފުކުރި "އޯޕާލެޕް ފީޗާ" އާއެކު، ބޭސް ދޫކޮށްފައިވާ މުއްދަތު ހަމަވުމުގެ ކުރިން އިތުރަށް ބޭސް ނަގަން އުޅޭނަމަ، ހިދުމަތް ފޯރުކޮށްދޭ ފަރާތުގެ ސަމާލުކަމަށް އެކަން އަންގައިދޭނެ ކަމަށް އާސަންދައިން މައުލޫމާތު ދީފައިވެއެވެ. މި ފީޗާގެ ސަބަބުން އޮޅުވާލައިގެން ބޭސް ނެގުމުގެ ފުރުސަތު ކުޑަވެގެންދާނެ ކަމަށް ބެލެވެއެވެ.