ބޮލީވުޑްގެ މަޝްހޫރު ފިލްމީ ތަރި ބިޕާޝާ ބާސޫ އޭނާގެ 46 ވަނަ އުފަންދުވަސް ފާހަގަކުރުމަށްޓަކައި އާއިލާއާއެކު ރާއްޖެ އަތުވެއްޖެއެވެ. މި ދަތުރުގައި ބިޕާޝާއާއެކު އޭނާގެ ފިރިމީހާ އަދި އެކްޓަރު ކަރަން ސިންގް ގްރޯވަރުގެ އިތުރުން އެމީހުންގެ ދަރިފުޅު ދޭވީ ވެސް ބައިވެރިވެއެވެ.
މި އާއިލާއިން މިފަހަރުގެ ޗުއްޓީ ހޭދަކުރަމުންދަނީ ޅ. އަތޮޅުގައި އޮންނަ ފުޝިފަރު މޯލްޑިވްސް ރިސޯޓުގައެވެ. ބިޕާޝާ އާއި ކަރަން ވަނީ އެމީހުންގެ އިންސްޓަގްރާމް އަދި ފޭސްބުކް މެދުވެރިކޮށް ރާއްޖޭގައި ހޭދަކުރަމުންދާ އުފާވެރި ވަގުތުތަކުގެ ފޮޓޯތަކާއި ވީޑިއޯތައް ސަޕޯޓަރުންނާ ހިއްސާކޮށްފައެވެ. އަންގާރަ ދުވަހު ފާހަގަކުރި ބިޕާޝާގެ އުފަންދުވަހުގެ ހާއްސަ ހަރަކާތްތައް ވެސް މި ރިސޯޓުގައި ވަނީ ކުރިއަށް ގެންގޮސްފައެވެ.
ބިޕާޝާ ބާސޫ އަކީ ޗުއްޓީ ހޭދަކުރުމަށާއި ހާއްސަ މުނާސަބަތުތައް ފާހަގަކުރުމަށް ވަރަށް ގިނައިން ރާއްޖެ އަންނަ ތަރިއެކެވެ. މީގެ ކުރިން 2024 ވަނަ އަހަރުގެ ނޮވެމްބަރު މަހު އޯޒެން ރިޒާވް ބޮލިފުއްޓަށް ޒިޔާރަތްކޮށްފައިވާއިރު، 2023 ވަނަ އަހަރުގެ ނޮވެމްބަރު މަހު ދަރިފުޅު ދޭވީގެ ފުރަތަމަ އުފަންދުވަހާއި ދިވާލީ ފާހަގަކޮށްފައިވަނީ ރެޑިސަން ބްލޫ ރިސޯޓުގައެވެ.
މި ދެމަފިރިންގެ ކައިވެނީގެ ހަނީމޫނުގެ އިތުރުން ތަފާތު އެކި އަހަރުތަކުގެ އާ އަހަރު ފާހަގަކުރުމަށް ވެސް ރާއްޖެ އިހުތިޔާރުކޮށްފައިވެއެވެ. ބޮލީވުޑްގެ ގިނަ ތަރިންތަކެއްގެ މެދުގައި ރާއްޖެއަކީ އެންމެ މަގުބޫލު އެއް މަންޒިލްކަން ފާހަގަކުރެވެއެވެ.