ރާއްޖޭގެ އިޤްތިޞާދު ދެމެހެއްޓެނިވި ގޮތެއްގައި ކުރިއެރުވުމަށްޓަކައި، ވިޔަފާރިތަކުގެ އަޑުއެހުމަށް ސިލްސިލާ ޑައިލޮގް ބައްދަލުވުންތަކެއް ކުރިއަށް ގެންދިއުމަކީ މުހިންމު ކަމެއް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު ސަޢީދު މިހެން ވިދާޅުވީ “އޮތެންޓިކް މޯލްޑިވްސް” އަށް 6 އަހަރު ފުރުން ފާހަގަކުރުމަށް ބޭއްވި އަހަރީ ޙަފްލާގައި ވާހަކަފުޅު ދައްކަވަމުންނެވެ. ވަޒީރު ވިދާޅުވީ ވިޔަފާރިތަކަށް ދެވޭ ޚިދުމަތްތައް ހަރުދަނާ ކުރެވޭނީ ސީދާ ވިޔަފާރިވެރިންނާ ބައްދަލުކޮށް، އެފަރާތްތަކަށް ކުރިމަތިވާ ގޮންޖެހުންތަކާއި މައްސަލަތައް ދެނެގަނެވިގެން ކަމަށެވެ. މިކަން ކުރުމަށްޓަކައި ގަވާއިދުން ބައްދަލުވުންތައް ބާއްވައި ޚިޔާލު ހޯދުމުގެ މުހިންމުކަން ވަޒީރު ފާހަގަކުރެއްވިއެވެ.
މިގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމާ އެއްގޮތަށް 2026 އަދި 2027 ވަނަ އަހަރު ކުދި ވިޔަފާރިތަކަށް ލުއިތަކެއް ދިނުމަށް ހަމަޖެހިފައިވާތީ، އެފަރާތްތަކާއެކު ޚާއްޞަ ބައްދަލުވުންތަކެއް ބާއްވަމުން ގެންދަވާނެ ކަމަށް ވަޒީރު އިޢުލާން ކުރެއްވިއެވެ. ސަރުކާރުން ވަނީ ނިމިދިޔަ އަހަރުވެސް ވިޔަފާރިތަކަށް ފަހި ފުރުޞަތުތައް ހޯދައިދިނުމަށް ގިނަ މަސައްކަތްތަކެއް ކޮށްފައެވެ.
ދިވެހި އުފެއްދުންތެރިންނަށް ނަފާ ހޯދައިދިނުމަށް 2020 ވަނަ އަހަރު ފެށި “އޮތެންޓިކް މޯލްޑިވްސް” މަރުކާއަކީ މިއަދު ރާއްޖޭގެ ފަންނުވެރިންނާއި ކުދި ވިޔަފާރިތައް ބައިނަލްއަޤްވާމީ ބާޒާރާ ގުޅުވައިދޭ އިތުބާރު ހުރި މަންސައެކެވެ. މި މަޝްރޫޢުގެ ދަށުން 2025 ވަނަ އަހަރު ހާސިލްވި އެންމެ ބޮޑު ކާމިޔާބީއަކީ ދުނިޔޭގެ މަޝްހޫރު އީކޮމަރސް ޕްލެޓްފޯމް “އަލީބާބާ” މެދުވެރިކޮށް ދިވެހި އުފެއްދުންތައް ވިއްކުމުގެ ފުރުޞަތު ފަހިވުމެވެ.
ތަފާސްހިސާބުތަކަށް ބަލާއިރު، އޮތެންޓިކް މޯލްޑިވްސްގައި މިހާރު 407 ވިޔަފާރިއަކުން ރަޖިސްޓަރީވެފައިވެއެވެ. މީގެ ތެރެއިން 49 ވިޔަފާރިއަކީ 2025 ވަނަ އަހަރު އަލަށް ގުޅުނު ފަރާތްތަކެވެ. ސަޕްލަޔަރުންނަށް ދޫކުރި ފައިސާގެ އަދަދުވެސް ވަނީ 2024 ވަނަ އަހަރު ހުރި 26.4 މިލިއަން ރުފިޔާ އިން 2025 ވަނަ އަހަރު 31.1 މިލިއަން ރުފިޔާއަށް އިތުރުވެފައެވެ. އަދި ޑޮލަރުގެ ދަތިކަމަށް ހައްލެއް ހޯދައިދިނުމަށްޓަކައި، ފައިސާގެ ވަކި މިންވަރެއް ޑޮލަރުން ދޫކުރުމަށް ސަރުކާރުން ނިންމި ނިންމުމާއެކު ވިޔަފާރިވެރިންނަށް ބޮޑެތި ލުއިތަކެއް ވަނީ ލިބިފައެވެ.
ބިޒްނަސް ސެންޓަރ ކޯޕަރޭޝަން (ބީސީސީ) އިން ބުނީ 2026 ވަނަ އަހަރަކީ ރާއްޖޭގެ އުފެއްދުންތެރިކަން ރާއްޖެއިން ބޭރުގެ އިތުރު ޤައުމުތަކަށް ފުޅާވެގެންދާނެ އުންމީދީ އަހަރެއް ކަމަށެވެ. ރޭ ބޭއްވި މި ޙަފްލާގައި، 2025 ވަނަ އަހަރު އެންމެ ރަނގަޅަށް މުދާ ވިއްކި 10 ފަރާތަކަށް “ބެސްޓް ސެލަރ” އެވޯޑް ވަނީ ހަވާލުކޮށްފައެވެ.