އިންސްޓަންޓް ނޫޑުލްސް އަކީ ތައްޔާރުކޮށްލަން ފަސޭހަ އަދި ގިނަ ބަޔަކަށް މީރު އެއްޗަކަށް ވީނަމަވެސް، މިއީ ސިއްހަތަށް ނުރައްކާތެރި ގިނަ މާއްދާތަކެއް އެކުލެވޭ އެއްޗެއް ކަމަށް ރާއްޖޭގެ މަޝްހޫރު، އަދި ތަޖުރިބާކާރު އެތެރެހަށީގެ ޑޮކްޓަރު މުހައްމަދު އަލީ ވިދާޅުވެއްޖެއެވެ. ޑޮކްޓަރު މުހައްމަދު އަލީގެ ސޯޝަލްމީޑިއާ، ޓިކްޓޮކް، ފޭސްބުކް ފަދަ މަންސަތަކުގައި ހިއްސާ ކުރައްވާފައިވާ ވީޑިއޯއެއްގައި ފާހަގަކުރެއްވި ގޮތުގައި ނޫޑުލްސްގައި ހިމެނޭ މާއްދާތަކުގެ ތެރެއިން އެންމެ ނުރައްކާތެރީ އޭގެ ތެރޭގައި ހިމެނޭ ލޮނު ޕެކެޓެވެ.
ސޯޑިއަމްގެ މިންވަރު އިންތިހާއަށް މަތި
ޑރ. މުހައްމަދު އަލީ ވިދާޅުވި ގޮތުގައި ނޫޑުލްސް ޕެކެޓް ތެރޭގައި އޮންނަ ލޮނުޕެކެޓުގައި 150 އާއި 2000 މިލިގްރާމާ ދެމެދުގެ އަދަދަކަށް ސޯޑިއަމް ހިމެނެއެވެ. މިއީ އާންމުކޮށް އިންސާނެއްގެ ހަށިގަނޑަށް ބޭނުންވާ މިންވަރަށް ވުރެ 70 އާއި 100 އިންސައްތަ އިތުރު އަދަދެކެވެ. "މި ލޮނު ބޭނުން ކުރުމުން ލޭމައްޗަށް ދިއުމުގެ ފުރުސަތު ބޮޑުވެ ހާޓްއެޓޭކް، ސްޓްރޯކް، އަދި ކިޑްނީގެ ބަލިތައް ޖެހުމަށް މަގުފަހިވެގެންދޭ،" ޑޮކްޓަރު ވިދާޅުވިއެވެ.
ނިއުޓްރިޝަން މަދު، ސަރުބީ ގިނަ
ނޫޑުލްސް އަކީ ރިފައިންޑް ފުށުން ތައްޔާރުކޮށްފައިވާ އެއްޗަކަށް ވުމުން އޭގައި ކާބޯހައިޑްރޭޓްސް ގިނަވެފައި، ފައިބަރާއި ޕްރޮޓީން އަދި ވިޓަމިންސް ފަދަ ހަށިގަނޑަށް ބޭނުންތެރި މާއްދާތައް ވަރަށް މަދެވެ. މީގެ އިތުރުން މީގައި ހިމެނޭ ސެޗުރޭޓެޑް ފެޓްސް އާއި ޕާމް އޮއިލްގެ ސަބަބުން ކޮލެސްޓްރޯލް މަތިވެ، ލިވަރގައި ސަރުބީ ޖެހުމަށް މެދުވެރިވެއެވެ. މީގެ ސަބަބުން ބަރުދަން އިތުރުވުމާއި ހަކުރު މަތިވުމުގެ މައްސަލަތައް ކުރިމަތިވާކަން ޑޮކްޓަރު ފާހަގަކުރެއްވިއެވެ.
ކެމިކަލްތަކާއި އެމް.އެސް.ޖީ
ނޫޑުލްސްގައި ހިމެނޭ މޮނޮސޯޑިއަމް ގްލޫޓެމޭޓް (MSG) ގެ ސަބަބުން ބައެއް މީހުންނަށް ބޮލުގައި ރިހުމާއި މޫނުމައްޗަށް ހޫނުވުން ފަދަ އުނދަގޫތައް ދިމާވާ ކަމަށް ޑޮކްޓަރު ވިދާޅުވިއެވެ. އަދި ބައެއް ދިރާސާތަކުން ދައްކާގޮތުގައި ނޫޑުލްސްގައި ހަށިގަނޑަށް ބޭނުންނުވާ ހެވީ މެޓަލްސް އާއި ޓިއުމަރު އުފެދުމަށް މަގުފަހިވާ ކެމިކަލްތައް ހިމެނެއެވެ. ނަމަވެސް އިންސާނުންނަށް މީގެން ކެންސަރު ޖެހޭކަން އަދި ސާފުކޮށް އެނގިފައެއް ނުވެއެވެ.
ސިއްހީ ގޮތުން ރައްކާތެރިވުމަށްޓަކައި ޑރ. މުހައްމަދު އަލީ އިރުޝާދު ދެއްވަނީ ނޫޑުލްސް އާންމުކޮށް ކެއުމުގައި ބޭނުން ނުކުރުމަށެވެ. ކޮންމެހެން ކާން ބޭނުންވާ ނަމަ، ޕެކެޓުގައި ހުންނަ ލޮނުކޮޅުގެ ދެބައިކުޅަ އެއްބައި ބޭނުންކުރުމަށް ނުވަތަ އަމިއްލައަށް ގޭގައި ތައްޔާރުކުރާ ހަވާދާއި ސޯސް ބޭނުންކުރުމަށް ޑޮކްޓަރު ލަފާދެއްވިއެވެ.
މީގެ ތެރޭގައި އަހަަރުމެންގެ ހަށިގަނޑަށް ބޭނުންނުވާ އެތައް ހެވީ މެޓަލްސްއެއް މިކެމިކަލްތަކުގެތެރޭގައި ހިމެނޭ. މީގައި އެންމެ ބޮޑަށް ފާހަގަކޮށްލަން ބޭނުންވާ ކަމަކީ ނޫޑޫލްސްވެސް އާންމުކޮށް ކެއުމުަގއި ނުހިމެނުން، ކެއުމުގައި ބޭނުންކުރާނަމަ ލޮނުޕެކެޓްގެ ދެބައިކުޅަ އެއްބައި ނުވަތަ އެހެން ކޮންމެވެސް ކަހަކަ ސޯސްއެއް ނުވަތަ އެހެންކަަހަލަ ހަވާދެއް އަމިއްލައަށް ތައްޔާރުކޮށްގެން ބޭނުން ކުރެވިދާނެ، އެއީ އެންމެ ރައްކާތެރ ރަނގަޅުގޮތް،" ޑރ މުހައްމަދު އަލީ
ރާއްޖޭގެ ނަން މަޝަހޫރު އަދި އެހާމެ ކާމިޔާބު ޑޮކްޓަރެއްގެ ފަރާތުން މިފަދަ ޔަގީން އިރުޝާދުތައް ލިބުމާއެކުވެސް މާބޮޑު ކަމަކަށް ނުހަދައި އަޅުގަނޑުމެން ބޭނުންގޮތަކަށް ކަންތައް ކުރުމުގެ ނަތީޖާ ގޯސްވެދާނެއެވެ، ހާއްސަކޮށް އުރުން ހަގު ކުޑަކުޑަކުދިިންނަށް އާންމުކޮށް ނޫޑުލްސް ކާންދޭ މަންޒަރު ފެނުމުން ހިތަށް އަސްލުވެސް ހާސްކަމެއް ލިބިގެންދެއެވެ. މިފަދަ އިރުޝާދުތަކަކީ ހަމައެކަނި އަޑުއަހާލުމުން ނިންމާލާ ކަންކަމަށް ނުހަދައި ފަރުވާތެރިކަމާއެކު ސީރިއަސް ނަޒަރިއްޔާތަކުން ވިސްނުން މުހިންމެވެ، ސިއްހަތަކީ އަގުހުރި މުދަލަކަށްވުރެ މުހިންމު އަމާނާތެކެވެ، އެއަށް އަނިޔާވެރި ނުވަމާތޯއެވެ.