ގއ. އަތޮޅުގައި ފުލުހުން ހިންގި ހާއްސަ ޑްރަގް އޮޕަރޭޝަނެއްގައި ހައްޔަރުކުރި އިކޮނޮމިކް މިނިސްޓްރީގެ ސީނިއާ ޕޮލިޓިކަލް ޑިރެކްޓަރު، އަހުމަދު އަނާމް އިބްރާހިމް މިއަދު މަގާމުން ވަކިކޮށްފިއެވެ.
ރައީސް އޮފީހުން މިއަދު ކަށަވަރުކޮށްދެއްވާފައިވާ ގޮތުގައި، އަނާމް މަގާމުން ވަކިކުރީ މަސްތުވާތަކެތީގެ ވިޔަފާރިކޮށް، އޭގެއިން ލިބޭ ފައިސާ ލޯންޑާ ކުރާ ނެޓްވޯކަކާ ދެކޮޅަށް ފުލުހުން ހިންގި އޮޕަރޭޝަން “އަލިމަގު” ގައި އޭނާ ހައްޔަރުކުރުމާ ގުޅިގެންނެވެ. މި އޮޕަރޭޝަނަކީ ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރި ފުޅާދާއިރާއެއްގައި ކުރާ ގްރޫޕެއް ހުއްޓުވުމަށް ގއ. ވިލިނގިލީގައި އިއްޔެ ކުރިއަށް ގެންދިޔަ ހަރަކާތެކެވެ.
މި މައްސަލައިގައި އަނާމްގެ އިތުރުން، އިތުރު ތިން މީހަކު ވިލިނގިލިން ވަނީ ހައްޔަރުކޮށްފައެވެ. އޭގެ ތެރޭގައި ކުރީގެ ސަރުކާރުގައި ހޯމް މިނިސްޓްރީގެ ޑައިރެކްޓަރުގެ މަގާމު ފުރި ޝައްފާހު ލަތީފް ވެސް ހިމެނެއެވެ. ދެން ހައްޔަރުކޮށްފައި ވަނީ ގއ. ވިލިނގިލި މިޔުޒިކީގޭ، އަޙްމަދު މަދީހް އާއި އެ ރަށު އަރާއިރުގޭ، ނޫރުއްނިޒާމް އެވެ.
ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ނޫރުއްނިޒާމް ފިޔަވައި ދެން ތިބި ތިން މީހުން ޝަރީއަތް ނިމެންދެން ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ. ނޫރުއްނިޒާމްގެ ބަންދަށް ކޯޓުން އިތުރުކޮށްދީފައިވަނީ 15 ދުވަހުގެ މުއްދަތެކެވެ.
ފުލުހުން ވިދާޅުވި ގޮތުގައި “އޮޕަރޭޝަން އަލިމަގު” އަކީ މަސްތުވާތަކެތީގެ ވަގުފާރި ކުރާ ނެޓްވޯކްތައް ބަލައި ފާސްކޮށް، އެފަދަ އަމަލުތަކަށް ހިތްވަރުދޭ ފަރާތްތައް ގާނޫނުގެ ކުރިމައްޗަށް ގެނައުމަށް ހިންގޭ ސިލްސިލާ އޮޕަރޭޝަންތަކުގެ ތެރެއިން ހިންގުނު މުހިންމު ހަރަކާތެކެވެ. މި އޮޕަރޭޝަންގައި ގިނަ އަދަދެއްގެ މަސްތުވާތަކެތި ހޯދިފައިވާ ކަމަށް ވެސް ފުލުހުން މައުލޫމާތު ދެއްވައެވެ.
މަސްތުވާތަކެތީގެ މައްސަލަތަކުގައި ސަރުކާރުގެ ސިޔާސީ މަގާމުތަކުގައި ތިއްބަވާ ބޭފުޅުން ބައިވެރިވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ޒީރޯ ޓޮލަރެންސް ސިޔާސަތުގެ ދަށުން އެއްވެސް ވަރަކަށް ބަލައިގަންނާނެ ކަމެއް ނޫން ކަމަށް ސަރުކާރުން ވަނީ ހާމަކުރައްވައިފައެވެ. އަދި މިފަދަ މައްސަލަތަކުގައި ޝާމިލުވާ ފަރާތްތަކާމެދު ވަގުތުން ފިޔަވަޅު އަޅާނެ ކަމުގެ ޔަގީންކަން ވެސް ސަރުކާރުން ވަނީ ދެއްވައިފައެވެ.