މަސްތުވާތަކެތި އެތެރެކޮށް އެތަކެތީގެ ވިޔަފާރިކޮށްގެން ހޯދާ ފައިސާ ލޯންޑާ ކުރާ ނެޓްވޯކެއް ހުއްޓުވުމަށް ފުލުހުން އިއްޔެ ހިންގި ހާއްސަ އޮޕަރޭޝަނެއްގައި 13 މީހެއްގެ 53 ބޭންކް އެކައުންޓް ފްރީޒްކޮށްފިއެވެ.
“އޮޕަރޭޝަން އަލިމަގު” ގެ ނަމުގައި މާލެ އާއި ގއ. އަތޮޅުގައި ކުރިއަށްގެންދިޔަ މި އޮޕަރޭޝަންގައި މިހާތަނަށް 10 ތަނެއް ބަލައިފާސްކޮށް، ހަތަރު މީހަކު ވަނީ ހައްޔަރުކޮށްފައެވެ.
ފުލުހުން ހާމަކުރި ގޮތުގައި މި އޮޕަރޭޝަނަކީ ގއ. އަތޮޅުގައި ފުޅާދާއިރާއެއްގައި މަސްތުވާތަކެތީގެ ވިޔަފާރިކޮށް، މަނީ ލޯންޑަރިންގެ އަމަލުތައް ހިންގާ ކަމަށް ތުހުމަތު ކުރެވޭ ފަރާތްތަކަށް އަމާޒުކޮށްގެން ހިންގި އޮޕަރޭޝަނެކެވެ. މި މައްސަލައިގައި ހައްޔަރުކޮށްފައިވަނީ ގއ. ވިލިނގިލީގެ ހަތަރު މީހުންނެވެ. އެއީ
- ޝައްފާޙް ލަޠީފް (28އ)،
- އަޙްމަދު މަދީޙު (33އ)،
- އަޙްމަދު އަނާމް އިބްރާހީމް (30އ)،
- ނޫރުއްނިޡާމް (35އ).
ނެޓްވޯކްގެ ތަފްސީލާއި މާލީ މުއާމަލާތްތައް
ފުލުހުން ވިދާޅުވީ މި ނެޓްވޯކުން 2015 ވަނަ އަހަރުން ފެށިގެން މަސްތުވާތަކެތި ޓްރެފިކް ކުރަމުންދާ ކަމަށާއި، މިކަމާ ގުޅޭ ހާއްސަ ތަހުގީގެއް 2025 މާރިޗް މަހުން ފެށިގެން ކުރިއަށްދާ ކަމަށެވެ. ތަހުގީގަށް ފާހަގަކުރެވިފައިވާ ގޮތުގައި ފާއިތުވި ފަސް އަހަރު ތެރޭގައި މި ނެޓްވޯކުގެ މެންބަރުންގެ އެކައުންޓުތަކުން 300 މިލިއަނަށް ވުރެ ގިނަ ދިވެހި ރުފިޔާ އާއި 4 ލައްކައަށް ވުރެ ގިނަ އެމެރިކާ ޑޮލަރު ދައުރުކޮށްފައިވެއެވެ.
މި ނެޓްވޯކް އިސްވެ ހިންގާ ފަރާތާއި، އޭނާގެ ދަށުން މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އެކި ގޮތްގޮތުން ހަރަކާތްތެރިވާ 19 ފަރާތެއް ފުލުހުންގެ ތަހުގީގަށް މިހާރު ވަނީ ދެނެގަނެވިފައެވެ. ފުލުހުން ވިދާޅުވީ މި ހުރިހާ ފަރާތްތަކެއްގެ މައްސަލަ މިހާރު ތަހުގީގު ކުރަމުންދާ ކަމަށެވެ.
މި މައްސަލައިގެ ތަހުގީގަށް ބޭނުންވާ ހެކި ހޯދުމަށާއި މާލީ މުއާމަލާތްތައް ހުއްޓުވުމަށްޓަކައި، ކޯޓު އަމުރެއްގެ ދަށުން މިހާތަނަށް 13 ފަރާތެއްގެ 53 ބޭންކު އެކައުންޓު ފްރީޒް ކުރެވިފައިވާ ކަމަށް ފުލުހުން ވަނީ ކަށަވަރުކޮށްދީފައެވެ.