ކުރިއަށް އޮތް ހަފްތާ ބަންދުގައި، ޔޫތު ހަބުގައި އެންމެ ފަހުގެ ދިވެހި ފިލްމުތައް އެޅުވުމަށް ހަމަޖެހިފައިވާ ކަމަށް ޒުވާނުން ބާރުވެރި ކުރުވުމާއި މަޢުލޫމާތާއި ފަންނާބެހޭ ވުޒާރާއިން ހާމަކށްިދއެވެ. މި ފިލްމުތައް އެޅުވުމަށް ހަމަޖެހިފައިވަނީ މިމަހުގެ 15، 16 އަދި 17 ވަނަ ދުވަހުއެވެ.
ޒުވާނުން ބާރުވެރި ކުރުވުމާއި، މަޢުލޫމާތާއި ފަންނާބެހޭ ވުޒާރާއިން ހާމަކުރެއްވި ގޮތުގައި، މިމަހުގެ 15 ވާ ބުރާސްފަތި ދުވަހުގެ ރޭ ޔޫތު ހަބުގައި އެޅުވުމަށް ހަމަޖެހިފައިވަނީ “އަލިފާން” ފިލްމެވެ. އަދި 16 ވާ ހުކުރު ދުވަހުގެ ރޭ “އަލްވަދާޢު” އެޅުވުމަށް ހަމަޖެހިފައިވާއިރު، 17 ވާ ހޮނިހިރު ދުވަހުގެ ރޭ އެޅުވުމަށް ހަމަޖެހިފައިވަނީ “ފުރޭތަ” އެވެ.
މި ތިން ފިލްމަކީވެސް 18 އަހަރުން މަތީގެ މީހުންނަށް ޚާއްޞަ ފިލްމުތަކެކެވެ. ޔޫތު ހަބުން މި ފިލްމުތައް ހިލޭ ބެލުމުގެ ފުރުޞަތު މިހާރު ވަނީ އާންމުންނަށް ހުޅުވާލާފައެވެ.
މުލީއާގެ ގަރާޖުގެ ގޮތުގައި ކުރިން ބޭނުން ކުރަމުން އައި އިމާރާތާއި ގޯތި ތަރައްޤީކޮށް ޔޫތު ހަބެއްގެ ގޮތުގައި ހުޅުވީ މިދިޔަ އަހަރުގެ ނޮވެންބަރު މަހުގެ 20 ވަނަ ދުވަހުއެވެ. އެތަން ފަރުމާ ކުރައްވާފައިވަނީ ކަންކަން އުނގެނުމަށާއި، އެކި ކަހަލަ ހުނަރުތައް ދަސްކޮށްދިނުމަށާއި، އެކަކު އަނެކަކާ ބައްދަލުކޮށް ގުޅުން ބަދަހިކުރުމަށް މަގުފަހިވާ ގޮތަށް، ޒުވާނުންނަށާއި ތިމާވެއްޓަށް ރައްޓެހި ތަނެއްގެ ގޮތުގައެވެ.
ޔޫތު ހަބަކީ ޒުވާނުންނަށް ބޭނުންތެރި އެކި ހަރަކާތްތައް ހިންގާ ތަނެކެވެ. އެގޮތުން އެތަނުގައި އެކިކަހަލަ ބޫޓު ކޭމްޕުތަކާއި، ސްކިލް އެކްސްޗޭންޖް ޕްރޮގްރާމްތަކާއި، ވަރޗުއަލް ރިއަލިޓީ ޓްރެއިނިންތަކާއި، އެކިކަހަލަ މަސައްކަތު ބައްދަލުވުންތަކާއި އަދި ކަލިނަރީ އިވެންޓްތައް ފަދަ ޒުވާނުންނާ ގުޅޭ ތަފާތު ހަރަކާތްތައް ދަނީ ބާއްވަމުންނެވެ.