ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ފޯރުކޮށްދެމުންދާ ހިދުމަތްތައް ޑިޖިޓަލްކޮށް ހަރުދަނާކުރުމުގެ މަސައްކަތުގެ ތެރެއިން، އާންމުންނަށް ދިމާވާ ދަތިތަކަށް ހައްލެއް ހޯދައިދިނުމަށްޓަކައި ހާއްސަ ހެލްޕް ޑެސްކެއް ހުޅުވައިފިއެވެ. މި ހެލްޕް ޑެސްކް ގާއިމުކޮށްފައިވަނީ ހެންވޭރު ފެރީ ޓާމިނަލްގައެވެ.
އެންސްޕާއިން މައުލޫމާތު ދެއްވާ ގޮތުގައި، މި ހެލްޕް ޑެސްކުން ރަސްމީ ބަންދު ނޫން ކޮންމެ ދުވަހަކު ހެނދުނު 8:30 އިން ހަވީރު 4:00 އަށް ހިދުމަތް ލިބޭނެއެވެ. މިއީ ރައްޔިތުންނަށް ލިބޭ ހިދުމަތްތައް ވީހާވެސް ލުއިފަސޭހަކަމާއެކު ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
މި ހެލްޕް ޑެސްކް މެދުވެރިކޮށް ގިނަ ހިދުމަތްތަކަކަށް އެހީތެރިކަން ފޯރުކޮށްދިނުމަށް ވަނީ ރޭވިފައެވެ. އޭގެ ތެރޭގައި އެކަނިވެރި މައިންނަށްދޭ އެލަވަންސް، ފޯސްޓާ ޕޭރެންޓުންނަށް ދޭ އެލަވަންސް، ހާލުގައި ޖެހިފައިވާ ފަރާތްތަކަށް ކާބޯތަކެތި ފޯރުކޮށްދިނުން، އަދި ނުކުޅެދުންތެރިކަން ހުންނަ ފަރާތްތަކަށް ދޭ އެލަވަންސް ހިމެނެއެވެ. މީގެ އިތުރުން ތެރަޕީ ބޭނުންވާ ފަރާތްތަކަށާއި، ތެލެސީމިއާ ކުދިންނަށް ދޭ އެހީގެ އިތުރުން އައިވީއެފް ފަރުވާ އަށް ދޭ ހިދުމަތްތަކާ ގުޅޭ އެހީތެރިކަންވެސް ލިބޭނެއެވެ.
މި ހެލްޕް ޑެސްކުން އެހީއަށް އެދޭ ފޯމު ފުރުމުގެ އިތުރުން، ޑިޖިޓަލް ވަސީލަތްތައް ކަމަށްވާ “ވަންގަވް” އަދި “އީ-ފާސް” ބޭނުންކުރުމުގައި ދިމާވާ ޓެކްނިކަލް މައްސަލަތަކަށްވެސް ހައްލު ހޯދައިދޭނެއެވެ. މިއީ ޓެކްނޮލޮޖީއަށް އަހުލުވެރި ނޫން ފަރާތްތަކަށް ހިދުމަތް ހޯދުމުގައި ދިމާވާ ގޮންޖެހުންތައް ކުޑަކުރުމަށް ކުރެވޭ މަސައްކަތެކެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ 2.0 ސިޔާސަތުގެ ދަށުން، ރައްޔިތުންނާ ވީހާވެސް ގާތުން ހިދުމަތް ދިނުމަށާއި، ސަރުކާރުން ދޭ ހިދުމަތްތަކުގެ ފެންވަރު މަތިކުރުމަށް ކުރަމުންދާ މަސައްކަތްތަކުގެ ބައެއް ކަމަށް އެންސްޕާއިން ފާހަގަކުރެއެވެ.