މާލޭ ވިޔަފާރި ބަނދަރުގައި މުދާ އުފުލުމުގެ މަސައްކަތުގައި ހަރަކާތްތެރިވާ ލޮރީ ޑްރައިވަރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ބައްދަލުކޮށް، އެމީހުންގެ މަސައްކަތުގައި ކުރިމަތިވާ ގޮންޖެހުންތަކާއި މުހިންމު ކަންބޮޑުވުންތައް ހިއްސާކޮށްފިއެވެ. މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި، ޑްރައިވަރުން ވަނީ ދާއިރާގެ ކުރިއެރުމަށް ބޭނުންވާ މުހިންމު ކަންތައްތަކަކަށް އަލިއަޅުވާލާފައެވެ.
މި ބައްދަލުވުމުގައި ޑްރައިވަރުން އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރީ މުދާ އުފުލާ ލޮރީތައް ބަނދަރާ ކައިރި ސަރަހައްދެއްގައި ޕާކުކުރެވޭނެ އިންތިޒާމެއް ނެތުމުގެ މައްސަލައެވެ. މީގެ އިތުރުން، ވެހިކަލްތަކުގެ ވެރިފަރާތް ބަދަލުކުރުމުގައި ދިމާވާ އިދާރީ ދަތިތަކާއި، ލޮރީ މަރާމާތުކުރުމަށް ބޭނުންވާ ސްޕެއާ ޕާޓްސް ގެނައުމުގައި ބޮންޑްކުރުމުގެ ސަބަބުން ކުރިމަތިވާ ދަތިތައް ޑްރައިވަރުން ވަނީ ރައީސްގެ ސަމާލުކަމަށް ގެންނަވާފައެވެ.
ލޮރީ ކިއުގައި ހުރި މައްސަލަތަކާއި އެކަންކަން ހައްލުކުރެވިދާނެ ގޮތްތަކާ ގުޅޭގޮތުންވެސް މި ބައްދަލުވުމުގައި ފުޅާދާއިރާއެއްގައި މަޝްވަރާކުރެވުނެވެ. އަދި ސަރުކާރުން ކަނޑައަޅާ އުސޫލެއްގެ ދަށުން ބާ އުޅަނދުތައް ނައްތާލުމަށްފަހު، އަލަށް ގެންނަ އުޅަނދުތައް ފަސޭހައިން ރަޖިސްޓްރީ ކުރެވޭނެ ނިޒާމެއް ގާއިމުކޮށްދެއްވުމަށް ޑްރައިވަރުން ވަނީ އެދިފައެވެ.
ލޮރީ ޑްރައިވަރުން ވަނީ އެމީހުން ކުރާ މަސައްކަތަކީ އެހެނިހެން ވަޒީފާތަކެކޭ އެއްފަދައިން ސަރުކާރުން ބަލައިގަންނަ، ސައްހަ ލިޔެކިޔުންތަކާއެކު ކުރާ މަސައްކަތެއްގެ ގޮތުގައި ކަނޑައަޅައިދެއްވުމަށް ރައީސުލްޖުމްހޫރިއްޔާގެ އަރިހުން އެދިފައެވެ. މިއީ އެ މަސައްކަތުގައި އުޅޭ ފަރާތްތަކަށް އިޖުތިމާއީ އަދި އިގްތިސާދީ ރައްކާތެރިކަން ކަށަވަރުކުރުމަށް މުހިންމު ކަމެއްގެ ގޮތުގައި އެ ފަރާތްތަކުން ފާހަގަކުރިއެވެ.
ޑްރައިވަރުންގެ ވާހަކަތައް އަޑުއެއްސެވުމަށްފަހު، ރައީސުލްޖުމްހޫރިއްޔާ ޑރ. މުޢިއްޒު ވަނީ އެ ކަންބޮޑުވުންތަކަށް ހައްލު ހޯއްދަވައިދެއްވުމަށް ސަރުކާރުގެ ކަމާގުޅުންހުރި މުއައްސަސާތަކާއި އިދާރާތަކާ ގުޅިގެން މަސައްކަތް ކުރައްވާނެ ކަމުގެ ފުރިހަމަ ޔަގީންކަން ދެއްވާފައެވެ.
ރައީސް ޑރ. މުޢިއްޒު ގެންދަވަނީ ރައްޔިތުންގެ އެކި ގިންތިތަކުގެ މީހުންނާ ސީދާ ބައްދަލުކުރައްވައި، އެމީހުންގެ އަޑު އަޑުއެއްސެވުމަށް ހާއްސަ އިސްކަމެއް ދެއްވަމުންނެވެ. މިއަދުގެ ބައްދަލުވުމަކީވެސް ރައްޔިތުންގެ ކަންބޮޑުވުންތައް ގާތުން ބައްލަވައި، އެކަންކަމަށް ހައްލު ހޯއްދަވައިދެއްވުމަށް ކުރައްވާ މަސައްކަތުގެ ތެރެއިން ބޭއްވުނު ބައްދަލުވުމެކެވެ.