ސަރުކާރުން އަލަށް ތަޢާރަފުކުރާ ޓެކްސީލައިންގެ ޚިދުމަތަށް ބޭނުންވާ ޑްރައިވަރުން ނެގުމަށްޓަކައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށްގެންދާ ވޯކް-އިން-އިންޓަރވިއުއަށް ގިނަ ބައެއްގެ ތަރުހީބު ލިބެމުންދާކަމަށް އެ ކުންފުނިން ހާމަކޮށްފިއެވެ. ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާގެ ބެލުމުގެ ދަށުން މި ޚިދުމަތް ހިންގުމަށް ޙަވާލުކޮށްފައިވަނީ އެމްޓީސީސީއާއެވެ.
އެމްޓީސީސީން ހާމަކޮށްފައިވާ ގޮތުގައި، ޓެކްސީލައިންގެ ޚިދުމަތް ދިނުމަށްޓަކައި ޖުމްލަ 407 ޑްރައިވަރުން ބޭނުންވެއެވެ. މީގެ ތެރޭގައި ހިމެނެނީ ފުލްޓައިމްކޮށް މަސައްކަތް ކުރާނެ 285 ޑްރައިވަރުންނާއި، ޕާޓްޓައިމްކޮށް މަސައްކަތް ކުރާނެ 122 ޑްރައިވަރުންނެވެ. މިއަދު ހެނދުނު 10:00 އިން ފެށިގެން އިރުއޮއްސި 18:00 އާ ހަމައަށް މާފަންނު ބަސް ޓާމިނަލުގައި ކުރިއަށްދާ މި އިންޓަރވިއުތަކަށް ޝައުޤުވެރިވާ ގިނަ އަދަދެއްގެ ބަޔަކު އަންނަމުންދާކަން އެ ކުންފުނިން ފާހަގަކުރެއެވެ.
ދަފްތަރުގައިވާ ފަރާތްތަކަށް އިސްކަންދޭނެ
މި ޚިދުމަތަށް ޑްރައިވަރުން ހޮވުމުގައި ޓްރާންސްޕޯޓް މިނިސްޓްރީގައި އެކުލަވާލާފައިވާ ޓެކްސީ ޑްރައިވަރުންގެ ދަފްތަރުގައި ރަޖިސްޓްރީ ކޮށްފައިވާ ފަރާތްތަކަށް އިސްކަންދޭނެ ކަމަށް އެމްޓީސީސީން ވިދާޅުވެއެވެ. ސަރުކާރުން މިފަދަ ޓެކްސީލައިނެއް ތަޢާރަފުކުރުމުގެ މައިގަނޑު މަޤްޞަދަކީ ޓެކްސީ ހޯދުމުގައި ރައްޔިތުންނަށް ދިމާވާ ދަތިތަކަށް ދާއިމީ ޙައްލެއް ހޯދައިދީ، ބަރޯސާވެވޭ ފަދަ ލުއިފަސޭހަ ޚިދުމަތެއް ފޯރުކޮށްދިނުމެވެ.
މި ޚިދުމަތުގައި ބޭނުންކުރުމަށް ހަމަޖެހިފައިވަނީ ތިން ސައިޒެއްގެ އިލެކްޓްރޯނިކް (އީވީ) ކާރުތަކެވެ. މި އުޅަނދުތަކަކީ ރާއްޖޭގެ މާޙައުލާ، ޚާއްޞަކޮށް ލޮނުގެ އަސަރު ހުންނަ ސަރަޙައްދުތަކާ ގުޅޭގޮތަށް ބައެއް ބަދަލުތައް ގެނެސްގެން ތައްޔާރުކުރާ އުޅަނދުތަކެކެވެ. ޚިދުމަތް ފެށުން ލަސްވަމުންދަނީ މި ބަދަލުތައް ގެނައުމުގެ މަސައްކަތް ކުރިއަށްދާތީ ކަމަށް ދަތުރުފަތުރާ ބެހޭ ވަޒީރު ވަނީ މީގެ ކުރިން ވިދާޅުވެފައެވެ.
ސަރުކާރުގެ މި ޓެކްސީ ލައިނަކީ 24 ގަޑިއިރު ޚިދުމަތް ލިބޭނެ ނިޒާމެކެވެ. މި ޚިދުމަތް ފޯރުކޮށްދޭނީ ދުނިޔޭގެ ކުރިއަރާފައިވާ ޤައުމުތަކުގައި ބޭނުންކުރާ “އޫބާ” އަދި “ގްރޭބް” ފަދަ ޚިދުމަތްތަކާ އެއްގޮތަށް، ޚާއްޞަ މޮބައިލް އެޕްލިކޭޝަނެއް މެދުވެރިކޮށެވެ.