ގދ. ފިޔޯރީ ކައުންސިލުން އިންތިޒާމްކޮށްގެން ބާއްވަމުން އަންނަ ބީފާން ވޮލީ މުބާރާތް 2026 ގެ އަންހެން ޑިވިޝަންގެ ތިންވަނަ މެޗުގައި ފިޔޯރީ ޓީމުގެ މައްޗަށް އެކުވެރި ފުނާޑު ޓީމުން ކުރި ހޯދައި ލީގު ފުރަތަމަ ބުރުގެ އެއްވަނަ އެކުވެރި ފުނާޑު ޓީމުން ހޯދައިފިއެވެ.
ފިޔޯރީ ރަސްމީ ވޮލީކޯޓުގައި ކުރިއަށްދިޔަ މި މެޗު ފުނާޑު ޓީމުން ކާމިޔާބުކުރީ ސީދާ ތިން ސެޓުންނެވެ.
މެޗު ފެށިގެން ފުރަތަމަ ސެޓުގައި ދެ ޓީމުން ވެސް ފެނިގެން ދިޔައީ ވަރަށް ވާދަވެރި އެއްވަރު ކުޅުމެކެވެ. ސެޓު ނިމެންދެން ވެސް ދެ ޓީމުން މާ ބޮޑު ލީޑެއް ނެތި ކުޅެމުން ދިޔަ ނަމަވެސް، އެކުވެރި ފުނާޑު ޓީމުގެ ޖާޒީ ނަމްބަރު 10، އާމިނަތު ޝަހާ ޝާމިން އާއި ކިރިގިސްތާނުގެ ކުޅުންތެރިޔާ ރޯޒާގެ ބާރު ޝޮޓްތަކާއެކު އެ ޓީމުން ދިޔައީ ޕޮއިންޓްތައް އިތުރުކުރަމުންނެވެ. ނަތީޖާއެއްގެ ގޮތުން 25-19 އިން ފުރަތަމަ ސެޓު ކާމިޔާބުކުރީ ފުނާޑު ޓީމެވެ.
ދެވަނަ ސެޓު ފުނާޑު ޓީމުން ފެށީ ފިޔޯރީ ޓީމަށް ހެދުނު ގޯސްތަކުގެ ފައިދާ ނަގައި ބޮޑު ލީޑަކާއެކުގައެވެ. ފިޔޯރީ ޓީމުން އަލުން މެޗުގެ ތެރެއަށް ވަދެ ކުރިހޯދަން ކުރި މަސައްކަތް ނާކާމިޔާބުވެ، ފުނާޑު ޓީމުން މި ސެޓު ކާމިޔާބުކުރީ 25-18 އިންނެވެ.
ތިންވަނަ ސެޓުގައި ވެސް ފިޔޯރީ ޓީމަށް އެދެވޭ ކުޅުމެއް ނުދެއްކި ގިނަ ގޯސްތަކެއް ހެދުނެވެ. ފުނާޑު ޓީމުން މި ސެޓު ވެސް 25-16 އިން ކާމިޔާބުކޮށް މެޗު ސީދާ ތިން ސެޓުން ކާމިޔާބުކުރިއެވެ.
މި މެޗުގެ މޮޅު ކުޅުންތެރިޔަކަށް ހޮވުނީ ފުނާޑު ޓީމުގެ ބިދޭސީ ކުޅުންތެރިޔާ އެކުވެރި ފުނާޑު ޓީމުގެ ޖާޒީ ނަމްބަރ 1 ރޯޒާ ރަސުލްބެކޮވާއެވެ. މުޅި މެޗުގައި ވެސް ރޯޒާގެ ފަރާތުން މޮޅު ކުޅުމެއް ފެނިގެންދިޔައިރު، ގައުމީ ޓީމުގެ ކުޅުންތެރިޔާ ޝަހާއާއެކު އޭނާ ދެއްކި ކޮންބިނޭޝަން ކުޅުން ފާހަގަކޮށްލެވެއެވެ.
މި މުބާރާތުގެ ފިރިހެން ޑިވިޝަންގެ މެޗެއް މިރޭ 20:30 ގައި ކުރިއަށްދާނެއެވެ. މި މެޗުގައި ބައްދަލުކުރާނީ ރަތަފަންދޫ ރެކްރިއޭޝަން ކްލަބާއި ފުވައްމުލަކު ދަނޑިމަގު ޓީމެވެ. މިއީ ދަނޑިމަގު ޓީމުން މި މުބާރާތުގައި ވާދަކުރާނެ ފުރަތަމަ މެޗެވެ.