ކެންސަރު ބަލި ޖެހިފައިވާ މީހަކަށް އެހީވުމުގެ ނަމުގައި އޮޅުވާލައިގެން ފައިސާ ހޯދުމަށް ސޯޝަލް މީޑިއާގައި ސްކޭމެއް ހިންގަމުންދާތީ، އެކަމަށް ސަމާލުވުމަށް ދިވެހި ފުލުހުންގެ ހިދުމަތުން މިއަދު އިލްތިމާސް ކޮށްފިއެވެ. މަކަރާއި ހީލަތުން މީހުންގެ އަތުން ފައިސާ ފޭރުމުގެ މައްސަލަތައް އިތުރުވަމުންދާ މި ދަނޑިވަޅުގައި، މިފަހަރު ސްކޭމަރުން ބޭނުންކޮށްފައިވަނީ ބަލި މީހަކަށް އެހީވުމުގެ އިންސާނީ ކަމެކެވެ.
ފުލުހުންގެ އެންޓި ސްކޭމް ސެންޓަރުން ހާމަކޮށްފައިވާ ގޮތުގައި، މި ސްކޭމް ހިންގަމުންދަނީ “ދީނުގެ މަގު” ކިޔާ ފޭސްބުކް ޕޭޖެއް މެދުވެރިކޮށެވެ. އެ ޕޭޖުގައި އައިޝަތު މާޖިދާ ކިޔާ ޒުވާން އަންހެން ކުއްޖަކަށް ކެންސަރު ޖެހިގެން އިންޑިއާގައި ފަރުވާ ހޯދުމަށް އެހީތެރިކަން ބޭނުންވާ ކަމަށް ބުނެ ޕޯސްޓުތަކެއް ވަނީ ހިއްސާކޮށްފައެވެ. އަދި އެ ކުއްޖާގެ ފަރުވާއަށް ހަ މަހާއި އަށް މަހާ ދެމެދުގެ މުއްދަތެއް ހޭދަވާނެ ކަމަށް ބުނެ ފައިސާ ޖަމާކުރުމަށް އެކައުންޓު ނަންބަރުތަކެއް ވެސް ވަނީ އާންމުކޮށްފައެވެ.
ނަމަވެސް، ފުލުހުންގެ ތަހުގީގުން އެނގިފައިވާ ގޮތުގައި އެ ޕޯސްޓުގައި ބޭނުންކޮށްފައިވާ ފޮޓޯއަކީ މުޝްފިކާ ސުލްތާނާ ކިޔާ ބޭރު ގައުމެއްގެ މީހެއްގެ ފޮޓޯއެކެވެ. މިއީ އާންމުންގެ ހަމްދަރުދީ ހޯދައިގެން މަކަރާއި ހީލަތުން ފައިސާ ހޯދުމަށް ހިންގާ އަމަލެއްކަން ފުލުހުން ވަނީ ކަށަވަރުކޮށްދީފައެވެ.
މިފަދަ ސްކޭމްތަކަށް ސަމާލުވުމުގެ ގޮތުން ފުލުހުން ވަނީ ބައެއް މުހިންމު އިރުޝާދުތައް ދީފައެވެ. އޭގެ ތެރޭގައި:
- އެހީވުމުގެ ކުރިން ފޮޓޯގެ ސައްހަކަން ކަށަވަރުކުރުމަށް “ރިވާސް އިމޭޖް ސާޗް” ފަދަ ވަސީލަތްތައް ބޭނުންކުރުން.
- އެއް ފޮޓޯއެއް ތަފާތު އެކި ނަންނަމުގައި ނުވަތަ ތަފާތު ބަލިތަކުގެ ވާހަކަ ބޭނުންކޮށްގެން އެހީއަށް އެދިފައިވޭތޯ ބެލުން.
- އަމިއްލަ މީހުންގެ އެކައުންޓުތަކަށް ފައިސާ ޖަމާކުރުމަށް އެދޭ ހާލަތްތަކުގައި އިތުރަށް ސަމާލުވުން.
މީގެ އިތުރުން، ފޯނުން ގުޅައިގެން މައުލޫމާތު ހޯދަން އުޅޭ މީހުންނަށް އެއްވެސް މައުލޫމާތެއް ނުދިނުމަށާއި، ބިރުދައްކާ ހާލަތްތަކުގައި ފޯނު ކަނޑާލުމަށް ފުލުހުން ވަނީ އެދިފައެވެ. އަދި އެއްވެސް ހާލަތެއްގައި އޯޓީޕީ (OTP) ކޯޑު ފަދަ ސިއްރު މައުލޫމާތު އެހެން މީހަކާ ހިއްސާނުކުރުމަށް ފުލުހުން ވަނީ ހަރުކަށިކޮށް އިލްތިމާސްކޮށްފައެވެ.