ތާރީޚީ އުފާވެރި ދުވަހެއް، އިންތިޒާރުތަކަށް ނިމުމެއް؛ ފްލެޓާއި ގޯއްޗަށް ކުރިމަތިލުމުގެ ފުރުސަތު މާދަމާ ހެނދުނު ހުޅުވާލަނީ

މި ފުރުސަތު ކުރިން ބުރާސްފަތި ދުވަހު ހުޅުވާލަން އޮތް ނަމަވެސް، ގިނަ ބަޔަކު ކުރިމަތިލާނެ ކަމަށް ބެލެވޭތީ އާއި މައުލޫމާތު ދިނުމުގައި ލުއިފަސޭހަ ކުރުމަށްޓަކައި މާދަމާއަށް ވަނީ ފަސްކޮށްފައެވެ.

މި ބޮޑު މަޝްރޫއުގެ ދަށުން މާލެ ސަރަހައްދާއި ރަސްމާލެއިން ޖުމްލަ 7,900 ފްލެޓާއި 15,000 ގޯތި ދޫކުރުމަށް ވަނީ ހަމަޖެހިފައެވެ. ގޯތި ދޫކުރުމަށް ހަމަޖެހިފައިވަނީ 1,250 އަކަފޫޓުގެ ބިންތަކެކެވެ. މީގެ ތެރެއިން މާލޭގެ ރަށްވެހިންނަށް 10,000 ގޯތި އަދި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް 3,000 ގޯތި ރަސްމާލެއިން ދިނުމަށް ވަނީ ކަނޑައަޅާފައެވެ.

ފްލެޓް ދޫކުރުމަށް ހަމަޖެހިފައިވާ ދާއިރާތައް

ފްލެޓްތައް ދޫކުރުމަށް ޖުމްލަ 15 ކެޓަގަރީއެއް ވަނީ ކަނޑައަޅާފައެވެ. މީގެ ތެރޭގައި މާލޭގެ ރަށްވެހިންނަށް ޚާއްސަ 4,000 ފްލެޓާއި، މާލޭގައި ދިރިއުޅޭ ނަމަވެސް ރަށްވެހިވެފައި ނުވާ ފަރާތްތަކަށް 1,500 ފްލެޓް ހިމެނެއެވެ. އެހެނިހެން ދާއިރާތަކަށް ކަނޑައެޅިފައިވާ ފްލެޓްތަކުގެ ތެރޭގައި:

• ޒުވާނުންނަށް: 250 ފްލެޓު
• ފަތުރުވެރިކަމުގެ ސިނާއަތުގެ މުވައްޒަފުންނަށް: 200 ފްލެޓު
• ސިވިލް ސާވިސް މުވައްޒަފުންނަށް: 200 ފްލެޓު
• ޓެކްސީ ޑްރައިވަރުންނަށް: 50 ފްލެޓު
• މަސްވެރިންނަށް: 100 ފްލެޓު
• ފުލުހުންނާއި ސިފައިންނަށް: ކޮންމެ ދާއިރާއަކަށް 100 ފްލެޓު
• ނުކުޅެދުންތެރިކަން ހުންނަ ފަރާތްތަކާއި އެކަނިވެރި މައިންބަފައިންނަށް: ކޮންމެ ދާއިރާއަކަށް 100 ފްލެޓު

މީގެ އިތުރުން މައިމުޅަވުމުގެ ސަބަބުން ގޯތިގެދޮރު މިލްކުކުރުމުން މަހުރޫމުވެފައިވާ ފަރާތްތަކަށް 500 ގޯއްޗާއި 50 ފްލެޓު ވަނީ ހާއްސަކޮށްފައެވެ. އަދި މާލޭގެ ހަނި ގޯޅިތަކުގައި ހުރުމުގެ ސަބަބުން ބިން ތަރައްޤީކުރުމަށް ދަތިވާ ގޯތިތައް ބަދަލުކުރާ ފަރާތްތަކަށް 1,500 ގޯތި ވަނީ ކަނޑައަޅާފައެވެ.