މި އަހަރުގެ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު 2026 ގައި ވޯޓު ލުމުގެ ހައްގު ލިބިފައިވާ މީހުންގެ ލިސްޓަށް، ޖުމްލަ 779 ޝަކުވާއެއް ހުށަހަޅާފައިވާ ކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.
ވޯޓު ދިނުމުގެ ހައްގު ލިބިގެންވާ މީހުންގެ ރަޖިސްޓަރީއަށް ޝަކުވާ ހުށަހެޅުމަށް ދީފައިވާ މުއްދަތު މިއަދު މެންދުރު ފަހު 15:00 އަށް ވަނީ ހަމަވެފައެވެ. އިލެކްޝަންސް ކޮމިޝަނުން މައުލޫމާތު ދެއްވި ގޮތުގައި، މި މުއްދަތުގެ ތެރޭގައި ގިނަ އަދަދެއްގެ ޝަކުވާތަކެއް ވަނީ އެ ކޮމިޝަނަށް ލިބިފައެވެ.
އީސީން ވިދާޅުވީ ލިބިފައިވާ 779 ޝަކުވާގެ ތެރޭގައި މައިގަނޑު ގޮތެއްގައި ހިމެނެނީ ރަޖިސްޓަރީގައި ހިމެނިފައިވާ އެޑްރެސް ބަދަލުކުރުމާއި، ރަށްވެހިކަން ބަދަލުވެފައިވާތީ ހުށަހަޅާފައިވާ ޝަކުވާތަކެވެ. މީގެ އިތުރުން، ނިޔާވެފައިވާ ފަރާތްތަކުގެ ނަން ލިސްޓުގައި ހިމެނިފައިވާތީ އެ ނަންތައް ރަޖިސްޓަރީން އުނިކުރުމަށް އެދި ހުށަހަޅާފައިވާ ޝަކުވާތައް ވެސް މީގެ ތެރޭގައި ހިމެނެއެވެ.
ވޯޓާސް ރަޖިސްޓްރީއަށް ޝަކުވާ ހުށަހެޅުމުގެ ފުރުސަތު ބަންދުވިއިރު، އީސީން މިއަދު ވަނީ އިންތިހާބުގައި ހަރަކާތްތެރިވާނެ ބޭރުގެ އޮބްޒާވަރުންނާއި މޮނީޓަރުން އައްޔަން ކުރުމުގެ ފުރުސަތު ވެސް ހުޅުވާލައިފައެވެ. މިއީ އިންތިހާބުގެ ކަންކަން ދެފުށް ފެންނަ ގޮތަކަށް ކުރިއަށް ގެންދިއުމަށް އެޅުނު މުހިންމު ފިޔަވަޅެކެވެ.
ކުރިއަށް އޮތް ލޯކަލް ކައުންސިލް އިންތިހާބަށް ކުރިމަތިލުމުގެ ފުރުސަތު ވެސް މިހާރު ވަނީ ހުޅުވާލެވިފައެވެ. އިލެކްޝަންސް ކޮމިޝަނުން ދަނީ އޭޕްރީލް މަހު ބާއްވާ މި އިންތިހާބުގެ ތައްޔާރީތައް ވަރަށް ބާރަށް ކުރިއަށް ގެންދަމުންނެވެ.