މާލޭ ސިޓީގެ މޭޔަރުކަމަށް ވާދަކުރައްވަން ނިކުމެވަޑައިގަންނަވަނީ މީގެ ކުރިން އެ މަގާމުގައި ހުންނަވައިގެން މާލޭ ސިޓީއަށް ހިދުމަތްކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވި މިސާލަކީ ނަމޫނާއެއް ކަމަށް ބައްލަވައިގެން ކަމަށް ވެރިކަންކުރާ ޕީޕަލްސް ނޭޝަނަލް ކޮންގުރެސް (ޕީއެންސީ) ގެ ފަރާތުން އެ މަގާމަށް ވާދަކުރައްވާ ކެންޑިޑޭޓު މޭޖާ ޖެނަރަލް ރިޓަޔާޑް މޫސާ އަލީ ޖަލީލު ވިދާޅުވެއްޖެއެވެ.
ޖަލީލުގެ ކެމްޕެއިން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އޭނާ ވިދާޅުވީ، 2011 ވަނަ އަހަރު މާލޭގައި ސިޓީ ކައުންސިލުގެ ނިޒާމު ފެށުނު ފަހުން ފާއިތުވި 10 ވަރަކަށް އަހަރު ތެރޭގައި ރައްޔިތުންނަށް އެކަށީގެންވާ ހިދުމަތްތަކެއް ނުލިބޭ ކަމަށެވެ. ނަމަވެސް، 2022 ވަނަ އަހަރު ރައީސް ޑރ. މުޢިއްޒު މޭޔަރުކަމާ ހަވާލުވެވަޑައިގަތުމަށްފަހު އެކަން ބަދަލުކުރައްވައި، މާލޭގެ ހިންގުމަށް އިންގިލާބީ ބަދަލުތަކެއް ގެންނެވި ކަމަށް ޖަލީލު ފާހަގަކުރެއްވިއެވެ.
“ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މޭޔަރުކަމުގައި ހުންނެވި ދެ އަހަރާއި ފަސް މަހާއި ދުވަސްކޮޅެއްގެ ތެރޭގައި މާލޭ ސިޓީގެ މުނިސިޕަލް ހިދުމަތުގެ ރަންޒަމާނެއް އައިސްގެންދިޔަ. ރައްޔިތުންގެ ގޭގެއަށް ސިލްސިލާކޮށް ޒިޔާރަތްކުރައްވައި، ސިލްސިލާކޮށް ރައްޔިތުންގެ ބައްދަލުވުންތައް ބާއްވަވައި، ރައްޔިތުންގެ އަޑު ގާތުން އެއްސެވި. ހާލު އަހުވާލު ބެއްލެވި، މާލޭ ސިޓީގައި ހައްލުނުވެހުރި އެތައް މައްސަލައެއް ހައްލުކުރެއްވި،” ޖަލީލު
ރައީސް މުޢިއްޒުގެ މޭޔަރުކަމުގައި ކުރެއްވި މުހިއްމު މަސައްކަތްތަކަށް ތާރީފުކުރައްވަމުން ޖަލީލު ވިދާޅުވީ، ގުރުއާން މުބާރާތްތަކާއި ކުޅިވަރު ފެސްޓިވަލްތައް ބާއްވައި އިޖުތިމާއީ ރޫހު އާލާކުރެއްވުމާއި، އީދުގެ ދިއްލުންތަކުން މާލެއަށް އުފާވެރިކަން ގެނެސްދެއްވުމަކީ އެހެން ރަށްތަކަށްވެސް ދެއްކެވި ނަމޫނާއެއް ކަމަށެވެ. އޭނާ ވިދާޅުވީ މޭޔަރުކަމަށް ކުރިމަތިލެއްވީ ރައީސް ހިންގެވި އެ މަގުން ހިދުމަތް ކުރުމުގެ އަޒުމުގައި ކަމަށެވެ.
ގައުމީ ހިދުމަތުގައި ގިނަ އަހަރުތަކެއް ހޭދަކުރެއްވި ޖަލީލު ވިދާޅުވީ، ހަށިގަނޑުގައި ބާރުހުރެ، ތަޖުރިބާ ލިބިފައިވާއިރު، ރައީސް މުޢިއްޒު ފަދަ ހީވާގީ ލީޑަރެއްގެ ފަހަތްޕުޅުގައި މަސައްކަތްކުރުމަކީ ލިބޭ ރަނުގެ ފުރުސަތެއް ކަމަށެވެ. ސިފައިންގެ އެންމެ ދަށު މަގާމުން ފެށިގެން ޗީފް އޮފް ޑިފެންސް ފޯސްގެ މަގާމާއި ޑިފެންސް މިނިސްޓަރުކަން ކުރެއްވިއިރުވެސް މަސައްކަތް ކުރެއްވީ އިހުލާސްތެރިކަމާއެކުކަން އޭނާ ފާހަގަކުރެއްވިއެވެ.
ވާހަކަ ނިންމަވާލައްވަމުން ޖަލީލު ވަނީ މާލޭގެ ރައްޔިތުންނަށް ސިޔާސީ ފިކުރަކަށް ބެލުމެއްނެތި ހަމަހަމަކަމާއެކު ހިދުމަތްކުރައްވާނެ ކަމުގެ ޔަގީންކަން ދެއްވާފައެވެ. އަދި މާލެއަކީ ދިރިއުޅެން ފަސޭހަ، ފަހި އަދި ސާފު ތަނަކަށް ހެދުމަށް އޯގާތެރިކަމާއެކު މަސައްކަތް ކުރައްވާނެ ކަމަށްވެސް އޭނާ ވިދާޅުވިއެވެ.