މާލޭ ސިޓީގެ މޭޔަރުގެ މަގާމަށް ހޮވައިފި ނަމަ، 24 ގަޑިއިރު ރައްޔިތުންގެ ހިދުމަތުގައި ހުންނަވައި، މާލެއަށް ހިތްގައިމު އާ ޒަމާނެއް ހޯއްދަވައިދެއްވާނެ ކަމަށް ޕީއެންސީގެ މޭޔަރު ކެންޑިޑޭޓު އަދި ކުރީގެ ޑިފެންސް މިނިސްޓަރު މޫސާ އަލީ ޖަލީލު ވިދާޅުވެއްޖެ އެވެ.
މޫސާ އަލީ ޖަލީލު މިހެން ވިދާޅުވީ އޭނާގެ ކެމްޕޭން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. ދޮންމަނިކު ސްކައި ވިއުގެ ތިރީގައި ހުންނަ މި ޖަގަހަ ހުޅުވައިދެއްވީ ނައިބު ރައީސް ހުސައިން މުހައްމަދު ލަތީފެވެ. މި ޖަލްސާގައި ވާހަކަދައްކަވަމުން ޖަލީލު ވިދާޅުވީ، ރައީސް ޑރ. މުހައްމަދު މުއިއްޒު މާލޭގެ އަވަށްތަކުގެ ރައްޔިތުންނާ އެކު ބޭއްވި ބައްދަލުވުންތަކުން ރައްޔިތުން އެދޭ ބަދަލުތައް ވަރަށް ރަނގަޅަށް ދެނެގަނެވިފައިވާ ކަމަށެވެ.
ގައުމީ ހިދުމަތުގައި ގިނަ ދުވަސްތަކެއް ހޭދަކުރައްވާފައިވާ ޖަލީލު ވިދާޅުވީ، ރިޓަޔާވެފައި ހުރި ނަމަވެސް، ގައުމަށް ހިދުމަތް ކުރުމުގެ ހިތްވަރާއި ފަންވަރު އަދިވެސް ހަށިގަނޑުގައި އެބަހުރި ކަމަށެވެ. “އަޅުގަނޑު ކަހަލަ ހީވާގި ލީޑަރެއްގެ ފަހަތުގައި މަސައްކަތްކޮށްލަން އަތުކުރި އޮޅާލަންވީ ވަގުތު މި އައީ ރައީސް މުއިއްޒުގެ އަރިހުގައި މަސައްކަތްކުރަން އަޅުގަނޑުމެން ނުކުމެެގެން،” އޭނާ ވިދާޅުވި އެވެ.
މޫސާ އަލީ ޖަލީލު އިތުރަށް ވިދާޅުވީ، މޭޔަރުގެ މަގާމުގައި ވަކި ސިޔާސީ ފިކުރަކަށް ނުބަލައި، ހުރިހާ ރައްޔިތުންނަށް ވަފާތެރި މިތުރެއްގެ ގޮތުގައި ހިދުމަތް ކުރައްވާނެ ކަމަށެވެ. އަދި މާލޭގެ ބޯހިޔާވަހިކަމުގެ މައްސަލަ ހައްލުކުރުމަށް ސަރުކާރުން ކުރާ މަސައްކަތްތަކަށް ފުރިހަމަ އެއްބާރުލުން ދެއްވައި، މާލެއަކީ “ފެހި ޗާލު” ސާފުތާހިރު ސިޓީއަކަށް ހައްދަވައިދެއްވާނެ ކަމުގެ ޔަގީންކަން އޭނާ ދެއްވި އެވެ.
“ތިޔަ ލޮބުވެތި ރައްޔިތުންގެ ހިދުމަތުގައި އަޅުގަނޑު ހުންނާނީ 24 ގަޑިއިރު ތައްޔާރަށް. ގައުމީ ހިދުމަތް، ރޭދުވާ ހޭދަކޮށްގެން ދޭނީ ރައްޔިތުންގެ މުހުތާދުތައް ފުއްދައިދިނުމާއި މާލޭ ސިޓީއަށް މާ ޗާލު، މާ އުފާވެރި، މާ ހިތްގައިމު، އާ ޒަމާނެއް ހޯދައިދިނުމަށް،” ޖަލީލު ވިދާޅުވި އެވެ.
ވާހަކަފުޅު ނިންމަވާލައްވަމުން ޖަލީލު ވަނީ އޭނާގެ މާޒީގައި ދައްކުވައިދީފައިވާ އިހުލާސްތެރިކަމާއި ކެރުމަށް އިތުބާރުކޮށް، މާލޭގެ ތަރައްގީއަށްޓަކައި ޕީއެންސީގެ ކެންޑިޑޭޓުންނަށް ވޯޓު ދެއްވުމަށް ރައްޔިތުންގެ ކިބައިން އެދިވަޑައިގެންފަ އެވެ.