މާލޭގެ ބޮޑުތަކުރުފާނުމަގު އުތުރު ފަރާތް ހަތަރު ލޭނަކަށް ތަރައްގީ ކުރުމުގެ ބޮޑު މަޝްރޫއުގެ ދަށުން، ސެގްމެންޓު ދޭއްގައި ހިމެނޭ ސަރަހައްދުގެ މަސައްކަތްތައް ތާވަލާ އެއްގޮތަށް ބާރުސްޕީޑުގައި ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މިރޭ ހާމަކޮށްފިއެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްގީ ކުރުމުގެ އަމަލީ މަސައްކަތް އޮގަސްޓް މަހުގެ 22 ވަނަ ދުވަހު ފަށާފައިވާއިރު، މި މަޝްރޫއު ކުރިއަށް ގެންދަނީ ތިން ސެގްމަންޓަކަށް ބަހާލައިގެންނެވެ. މީގެ ތެރެއިން ފުރަތަމަ ސެގްމެންޓުގެ މަސައްކަތް މިހާރު ވަނީ އެއްކޮށް ނިންމައި އާއްމުންނަށް ހުޅުވާލާފައެވެ. މިހާރު މަސައްކަތް ކުރިއަށްދާ ދެވަނަ ސެގްމެންޓަކީ ބާޒާރު މަތީގެ ކާރޫބާރޫ ބޮޑު ސަރަހައްދެވެ.
މި މަސައްކަތް ކުރިއަށްދާ ގޮތް ބެއްލެވުމަށްޓަކައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބާއި އެމްޓީސީސީގެ ސީއީއޯ ޑީސީޕީ (ރިޓަޔާޑް) އަހުމަދު ސައުދީ މިއަދު ވަނީ އެ ސަރަހައްދަށް ޒިޔާރަތް ކުރައްވާފައެވެ.
މަޝްރޫއުގެ ކުރިއެރުމާ ގުޅޭގޮތުން އެމްޓީސީސީން ވިދާޅުވީ، ދެވަނަ ސެގްމެންޓުގެ 167 މީޓަރުގެ ސަރަހައްދެއްގައި ޝީޓްޕައިލް ކުރުމުގެ މަސައްކަތުގެ 65 އިންސައްތަ މިހާރު ނިމިފައިވާ ކަމަށެވެ. މީގެ އިތުރުން، ފެން ހިންދާ ނިޒާމުގެ މަސައްކަތްތަކާއި ކޭބަލް ޖަންޝަން އިންސްޓޯލް ކުރުމުގެ 90 އިންސައްތަ މަސައްކަތް ނިމިފައިވާއިރު، ބިން ހިއްކުމުގެ މަސައްކަތްވެސް މިހާރު ދަނީ ކުރަމުންނެވެ.
ޖުމްލަ 144.5 މިލިއަން ރުފިޔާގެ މި މަޝްރޫއުގެ ދަށުން ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް 830 މީޓަރުގެ ސަރަހައްދެއްގައި ތާރު އަޅައި ހަތަރު ލޭނަށް މަގު ފުޅާކުރާނެއެވެ. މީގެ އިތުރުން 737 މީޓަރުގެ ސަރަހައްދެއްގައި ޝީޓް ޕައިލް ކުރުމާއި، ސަބްބޭސް ތައްޔާރުކުރުމާއި، ހިނގާ މީހުންނަށް ވަކި ލޭނެއް ގާއިމުކުރުމުގެ އިތުރުން ރޯޑް މާކިން އާއި ސައިން ބޯޑު ހަރުކުރުމުގެ މަސައްކަތް ހިމެނެއެވެ.
މި މަޝްރޫއަކީ މާލޭގެ އުތުރު ފަރާތުގެ ޓްރެފިކް ތޮއްޖެހުމަށް ދާއިމީ ހައްލެއް ހޯދައިދިނުމަށްޓަކައި ސަރުކާރުން އެމްޓީސީސީއާ ހަވާލުކޮށްގެން ކުރިއަށްގެންދާ މުހިންމު މަޝްރޫއެކެވެ.