ނ. ވެލިދޫއާއި މާލޭގެ މެދުގައި ސީޕްލޭން ދަތުރުތައް ފެށުމާ ގުޅިގެން އެ ރަށުގެ ފަތުރުވެރިކަމާއި ވިޔަފާރިއަށް ބޮޑު ކުރިއެރުމެއް ލިބިގެންދާނެ ކަމުގައި އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ވެލިދޫއާއި މާލެއާ ދެމެދުގައި ސީޕްލޭން ދަތުރުތައް ފެށުމަށް މިއަދު އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މިއީ ރާއްޖޭގެ ދަތުރުފަތުރުގެ ވިއުގަ ފުޅާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްކަންދެއްވައިގެން ކުރައްވަމުން ގެންދަވާ މަސައްކަތްޕުޅުގެ ތެރެއިން ފެށުނު މުހިއްމު ޚިދުމަތެއް ކަމަށެވެ.
ވަޒީރު ސައީދު ފާހަގަކުރެއްވި ގޮތުގައި ރައީސުލްޖުމްހޫރިއްޔާ ވަރަށް ގާތުން ބައްލަވައިގެން ކުރިއަށްގެންދެވި މި މަސައްކަތުގެ ސަބަބުން ވެލިދޫގެ ރައްޔިތުންނަށާއި، އެ ރަށަށް ޒިޔާރަތްކުރާ ފަތުރުވެރިންނަށް ދަތުރުފަތުރުގައި ބޮޑެތި ލުއިފަސޭހަތަކެއް ލިބިގެންދާނެއެވެ. ޚާއްސަކޮށް ސަރުކާރާއި މޯލްޑިވިއަން ގުޅިގެން ޓިކެޓުގެ އަގުތައް އަތްފޯރާ ފަށެއްގައި ހިފަހައްޓާފައިވުމަކީ ދަތުރުވެރިންނަށް ލިބޭނެ ވަރަށް ބޮޑު ހިތްހަމަޖެހުމެއް ކަމަށް އެމަނިކުފާނު ވިދާޅުވިއެވެ.
“ފަތުރުވެރިކަން ކުރިއެރުވުމަށާއި ވިޔަފާރީގެ އެކިއެކި މުއާމަލާތްތައް ކުރިއަށްގެންދިއުމުގައި މިރަށުގައާއި ދާއިރާގައި އަދި މި ހިސާބުގެ ރަށްތަކުގައި ޚާއްސަގޮތެއްގައި ވަރަށް ބޮޑު ލުޔެއް މި ލިބުނީ،” ވަޒީރު ސައީދު ވިދާޅުވިއެވެ. މީގެ އިތުރުން ވެލިދޫއަކީ ސިނާއީ މަސައްކަތްތަކާއި ވިޔަފާރީގެ މުހިއްމު މަރުކަޒަކަށް ވެފައި، ކުރިއަށް އޮތީ ރަމަޟާން މަސް ކަމަށްވާތީ، މި ދަތުރުތަކުގެ ސަބަބުން މުދާ އުފުލުމަށާއި ވިޔަފާރިތަކަށް އިތުރު ދިރުމެއް ލިބޭނެ ކަމަށްވެސް ވަޒީރު ވިދާޅުވިއެވެ.
ވެލިދޫއަށް ސީޕްލޭންގެ ޚިދުމަތް ތައާރަފުކުރުމަކީ ރައީސުލްޖުމްހޫރިއްޔާގެ ވައުދުފުޅެކެވެ. ނިމިދިޔަ އަހަރު އެ ރަށަށް ކުރެއްވި ދަތުރުފުޅުގައި ރައީސް ވަނީ ސީޕްލޭން ޕްލެޓްފޯމެއް ގާއިމުކޮށް، މިއަހަރުގެ ޖަނަވަރީ މަހު ދަތުރުތައް ފަށާނެ ކަމަށް ވިދާޅުވެފައެވެ. މިއަދު މި ފެށުނު ދަތުރުތަކުގައި ދިވެހިންނަށް ޓިކެޓު ވިއްކުމަށް ހަމަޖެހިފައިވަނީ 999 ރުފިޔާ އަށެވެ. އަދި ފަތުރުވެރިންނަށް ޓިކެޓު ވިއްކާނީ 93 ޑޮލަރަށެވެ.