ހުރިހާ ދިވެހިންވެސް ތިބީ ޤައުމީ ފުޓްސަލް ޓީމާއެކުކަމަށާއި، ރައްޔިތުން ތިބީ ޤައުމީ ޓީމުން ތަށްޓާއެކު އެނބުރި ރާއްޖެ އަންނާނެ ދުވަހެއްގެ އިންތިޒާރުގައިކަމަށް ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ. ނައިބު ރައީސް މިހެން ވިދާޅުވީ ގދ. ފިޔޯރީގައި ހުންނަވައި “ޕީއެސްއެމް ނިއުސް” އަށް ދެއްވި ބަސްދީގަތުމެއްގައެވެ.
ނައިބު ރައީސް ވިދާޅުވީ، މުޅި ޤައުމު އޮތީ ޤައުމީ ޓީމާއެކުގައި ކަމަށާއި، އެހެން ފަހަރުތަކެކޭ ވެސް އެއްފަދައިން، ކުޅިވަރުގައި ދިވެހިން ދައްކައިދޭ އެއްބައިވަންތަކަމުގެ ރިވެތި ސިފަ މި ފަހަރުވެސް ފެނިގެންދާނެ ކަމަށެވެ. އަދި މީސްމީޑިއާގެ އެކި މަންސަތައް މެދުވެރިކޮށް ހުރިހާ ދިވެހިން ވެސް ޤައުމީ ޓީމާއެކު ތިބިކަން ހާމަކުރަމުންދާކަން ފާހަގަކުރައްވައި، ދިވެހި ޓީމާއިމެދު ދިވެހިންގެ އުއްމީދުތައް ހުރި މިންވަރު އެކަމުން ހާމަވެގެންދާކަމަށް އެމަނިކުފާނު ވިދާޅުވިއެވެ.
ޤައުމީ ޓީމަށް ހިތްވަރު ދެއްވަމުން ނައިބު ރައީސް ވިދާޅުވީ، “އަޅުގަނޑު ދަންނަވާލަން ބޭނުން ދިވެހި މުޅި ޤައުމު މިއޮތީ ދިވެހި ޤައުމީ ޓީމާއެކުގައޭ. އަބަދުވެސް ކުޅިވަރުގައި ދިވެހިން ދައްކައިދޭ ނަމޫނާ، މި އެއްބައިވަންތަކަމުގެ ރިވެތި ސިފަ، އިރާދަކުރެއްވިޔާ މިފަހަރު ވެސް އަޅުގަނޑުމެންގެ ރާއްޖެއިން ދައްކައިދޭނެ،” ކަމަށެވެ. އަދި ދިވެހި ކުޅުންތެރިން އެ ސާބިތުކަންމަތީގައި ތަށި ހިފައިގެން ރާއްޖެ އައުމަށް އެދިވަޑައިގަންނަވަމުން، ރައްޔިތުން ތިބީ ޓީމަށް ހޫނު މަރުހަބާއެއް ކިޔަން ކެތްމަދުވެފައިކަންވެސް ފާހަގަކުރެއްވިއެވެ.
ފުރަތަމަ ފަހަރަށް ބާއްވާ ސާފް ފުޓްސަލް ޗެމްޕިއަންޝިޕްގެ ތަށްޓާއެކު ޤައުމީ ޓީމުން އެނބުރި ރާއްޖެ އަންނާނެ ދުވަހެއްގެ އިންތިޒާރުގައި މުޅި ޤައުމު އޮތްއިރު، މުބާރާތުގެ ޗެމްޕިއަންކަން ކަށަވަރުކުރަން ރާއްޖެއަށް ދެން އޮތް ދެމެޗުގެ ތެރެއިން ބޭނުންވަނީ އެންމެ މެޗަކުން މޮޅުވާށެވެ.
މުބާރާތުގައި ހޮނިހިރު ދުވަހު ރާއްޖެއިން ބޫޓާނާ ދެކޮޅަށް ކުޅޭ މެޗުން މޮޅެއް ހޯދައިފިނަމަ ރާއްޖެއަށް ޗެމްޕިއަންކަން ކަށަވަރުވާނެއެވެ. މި މެޗު އޮންނާނީ ހޮނިހިރު ދުވަހުގެ ހަވީރު 15:00 ގައެވެ. މުބާރާތުގެ ހުރިހާ މެޗެއް ޕީއެސްއެމްގެ ޔެސް ޓީވީން ވަގުތުން ގެނެސްދިނުމަށް ވަނީ ހަމަޖެހިފައެވެ.