ގދ. ފިޔޯރީ ކައުންސިލުން އިންތިޒާމްކޮށްގެން ބޭއްވި ބީފާން މުބާރާތް 2026 ގެ ޗެމްޕިއަންކަން ފުވައްމުލަކު ދަނޑިމަގު ޓީމުން ހޯދައިފިއެވެ.
ފިޔޯރީ ރަސްމީ ވޮލީ ކޯޓުގައި ކުރިއަށްދިޔަ މި މެޗު 2-3 އިން ކާމިޔާބުކުރީ ފުވައްމުލަކު ދަނޑިމަގު ސެޓުންނެވެ.
މުބާރާތުގެ ފިރިހެން ޑިވިޝަނުގެ ފައިނަލް މެޗު ޝަރަފުވެރިކޮށްދެއްވީ، ރާއްޖޭގެ ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފާއި، އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބެވެ.
މުބާރާތުގެ ނިންމުމުގެ ރަސްމިއްޔާތު މިރޭ ކުރިއަށް ދިޔައިރު، "ފިޔޯރީ ބީފާން" އާ ގުޅޭ ޚާއްސަ ވީޑިއޯ ރިޕޯޓެއް ވެސް ވަނީ ދައްކާފައެވެ. މި ރިޕޯޓުގައި ފިޔޯރީ ބީފާންއާއި، އެކަމަނާގެ އާއިލާ ދިރިއުޅުނު ގޮތް ވަރަށް ރަނގަޅަށް ފެނިގެން ދިޔައެވެ. ރިޕޯޓުން ދައްކާގޮތުގައި ފިޔޯރީ ބީފާން އުޅުނީ ފިޔޯރީ ހުސައިންކަލޭފާނާއި ކައިވެނި ބައްލަވައިގެންނެވެ. އެދެމަފިރިންގެ ޒުވާން ދުވަސްވަރު ހަޔާތް ވޭތުކުރަމުން ދިޔައީ ފަރު ހިލުމާއި، ފަންގި ވިނުމުގައެވެ. މި ދެމަފިރިންނަށް ލިބޭ ކުޑަ އާމްދަނީއިން މާބޮޑު ތަނަވަސް ކަމެއް ނުލިބުނު ނަމަވެސް މިދެމީހުންނަކީ ރަށުގެ ނިސްބަތުން ފުދިގެން އުޅޭ ދެމަފިރިންނެވެ. 3 ދަރިން ލިބިފައިވާ މި ދެމަފިރިންނަށް ލިބުނު މުއްސަނދިކަމެއްގެ ސަބަބުން، އޭރު ރާއްޖޭގެ އެންމެ މުއްސަނދި މީހާ ކަމުގައި ފާހަގަވާން ފެށިއެވެ. އެހެންނަމަވެސް އޭރުގެ ރަސްގެފާނުގެ ބާރު ކުޑަވެ ރަސްކަމަށް ނުރައްކާވެދާނެކަމަށް ބަޔަކު މީހުން ކިޔައިއުޅޭތީ ދެމަފިރިންގެ މުދާތައް އަތުލައި، ހައު ދަނޑުތައް ހުޅުޖަހައި އަންދާލިއެވެ. ހާއޮޅު އަންދާލާފައި ފުރައިގެން ދިޔަފަހުން އެހާތަކުގެ ބުޑުތަކުން އިހަށްވުރެ މާ ވަރުގަދައަށް ނިރުތައް ފަޅައިގެން އަލުން ގަސްތައް ހެދެން ފެށިއެވެ. މިއީ ބީފާންގެ ވާހަކަ ފެށިގެން އައިގޮތެވެ. ދެން ރިޕޯޓުން ފެނުނީ، ހައު ދަނޑުން ބީފާން މުބާރާތް 2026 ގެ ތަށި ނަގައިގެން ބީފާން އަންނަ މަންޒަރެވެ.
ބީފާން ވޮލީބޯޅަ ޓޯނަމެންޓް 2026 ގެ ނިންމުމުގެ ރަސްމިއްޔާތުގެ ތެރެއިން، ބީފާންއާ ބެހޭ ވީޑިއޯ ރިޕޯޓު ދެއްކުން—-ފޮޓޯ: ރާޅު އާޓްސް އެންޑް ޑިޒައިން
މިހާ ހިސާބުން ރަސްމިއްޔާތުގައި ލެޑް ޝޯއަކަށްފަހު، ދެން ފެށީ ފިރިހެން ޑިވިޝަންގެ ފައިނަލް މެޗެވެ.
މެޗުގެ ފުރަތަމަ ސެޓު 16-25 އިން ކާމިޔާބުކުރީ ފުވައްމުލަކު ދަނޑިމަގު ޓީމެވެ.
ވާދަވެރި ކުޅުމަކަށްފަހު ދެވަނަ ސެޓު ގެންދިޔައީ ރަތަފަންދޫ ޓީމުންނެވެ. 23-25 އިން މި ސެޓު ރަތަފަންދޫ އިން ކާމިޔާބުކުރީ، ކާއްޓެ އާއި ރިމޭގެ ބާރު ހަމަލާތަކުންނެވެ.
ތިންވަނަ ސެޓު 16-25 އިން ކާމިޔާބުކުރީ ފުވައްމުލަކު ދަނޑިމަގު ޓީމުންނެވެ. ހަތަރުވަނަ ސެޓު އަނެއްކާވެސް ރަތަފަންދޫ ޓީމުން 19-25 އިން ކާމިޔާބުކުރިއެވެ.
މެޗުގެ ފަހު ސެޓު، މޮޅުވާ ޓީމު ކަނޑައަޅާ ސެޓު ފެށީ ދަނޑިމަގުން ލީޑެއްގައި އޮވެގެންނެވެ. އަދި މި ލީޑުގައި އޮވެގެން ފަސްވަނަ ސެޓު ވެސް 9-15 އިން ކާމިޔާބުކުރިއެވެ.
މެޗުގެ މޮޅު ކުޅުންތެރިޔަކަށް ހޮވިފައިވަނީ ދަނޑިމަގު ޓީމުގެ ޖާޒީ ނަމްބަރ 18 ކަވިޝްކާ އެވެ.
ފައިނަލް މެޗަށްފަހު އޮތީ ފިރިހެން ޑިވިޝަންގެ އިނާމު ދިނުމުގެ ރަސްމިއްޔާތެވެ.
މުބާރާތުގެ ފިރިހެން ޑިވިޝަންގެ ޑްރީމް ޓީމްގެ 6 ކުޅުންތެރިން
- އިސްމާއިލް ސާޖިދު (ރަތަފަންދޫ ޖ.9) ބެސްޓް އައުޓްސައިޑް އެޓޭކަރ
- އަހުމަދު ނާސިހު (ދަނޑިމަގު ޖ.9) ބެސްޓް މިޑްލް ބްލޮކަރ
- އަހުމަދު މުހައްމަދު (ދަނޑިމަގު ޖ.11) ބެސްޓް މިޑްލް ބްލޮކަރ
- މާރިފްް އަލީ ނަސީމް (ދަނޑިމަގު ޖ.17) ބެސްޓް ސެޓަރ
- މުހައްމަދު ރިމާޒް (ރަތަފަންދޫ ޖ.12) ބެސްޓް އައުޓްސައިޑް ޕްލޭޔަރ
- އަލީ ހުޒާމް (ފިޔޯރީ ޖ.12) ބެސްޓް އައުޓްސައިޑް އެޓޭކަރ
މުބާރާތުގެ ފިރިހެން ޑިވިޝަންގެ ޑްރީމް ޓީމްގެ ބެސްޓް ލިބަރޯ
- އަހުމަދު ނަބީލް (ދަނޑިމަގު ޖ.1)
މުބާރާތުގެ ފިރިހެން ޑިވިޝަންގެ ޑްރީމް ޓީމްގެ ބެސްޓް ކޯޗް
- ސްމިތް ޖަޔަލާލް (ދަނޑިމަގު)
މުބާރާތުގެ ފިރިހެން ޑިވިޝަންގެ އެންމެ އުންމީދީ ކުޅުންތެރިޔާ
- ހަސަން ޒަޢީމް އިބްރާހީމް (ފިޔޯރީ ޖ.14)
މުބާރާތުގެ ފިރިހެން ޑިވިޝަންގެ ޓޮޕް ސްކޯރަރ
- އިސްމާއިލް ސާޖިދު (ރަތަފަންދޫ ޖ.9)
މުބާރާތުގެ ފިރިހެން ޑިވިޝަންގެ އެންމެ މޮޅު ކުޅުންތެރިޔާ
- ކަވިޝްކާ (ދަނޑިމަގު ޖ.9)
މުޅި މުބާރާތުގެ އެންމެ ޝަރަފުވެރި މަޤާމު، ކިންގް އޮފް ބީފާންގެ މަޤާމަށް ހޮވިފައިވަނީ ރަތަފަންދޫ ވޮލީ ޓީމުގެ ޖާޒީ ނަމްބަރ 3 ޖުނައިދު އަބްދުالله އެވެ.
ޗެމްޕިއަން ޓީމް ދަނޑިމަގު ޓީމަށް 50،000 ރުފިޔާގެ ފައިސާގެ އިނާމެއް ދެވުނު އިރު، ރަތަފަންދޫ ޓީމަށް 25،000 ރުފިޔާގެ ފައިސާގެ އިނާމެއް ދެވުނެވެ.
މި މުބާރާތަކީ ފިޔޯރީ ކައުންސިލުން އިންތިޒާމްކޮށްގެން ފިޔޯރީ ފޭސް ޖަމިއްޔާއިން ރާވައި ހިންގި ބީފާން ވޮލީބޯޅަ ޓޯނަމެންޓް 2026 އެވެ.