ސަރުކާރުން ރަމަޟާން މަހުގެ ހަދިޔާގެ ގޮތުގައި ބަހާ މަސްދަޅު ކޭސްތައް ހަވާލުކުރުމުގެ މަސައްކަތް އަންނަ ފެބްރުއަރީ މަހުގެ ފުރަތަމަ ދެ ހަފުތާގެ ތެރޭގައި އެއްކޮށް ނިންމާލުމަކީ ސަރުކާރުގެ އަމާޒެއް ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްއާ ވާހަކަފުޅުދައްކަވަމުންނެވެ.
ވަޒީރު ވިދާޅުވީ މަސްދަޅު ކޭސް ބެހުމުގެ ކަންކަން ކުރިއަށްގެންދަނީ ގައުމީ މަސައްކަތެއްގެ ގޮތުގައި ބަލައިގެން ކަމަށެވެ. މިދިޔަ އަހަރުގެ ތަޖުރިބާއަށް ބަލައި، މިއަހަރުގެ ރޯދަ ހަދިޔާ ބެހުމަށްޓަކައި މިފްކޯއިން ދުރާލައި މަސްދަޅު ކޭސްތައް ތައްޔާރުކޮށް، އެމްޕީއެލްއާ ގުޅިގެން ރާއްޖޭގެ ހުރިހާ ރަށަކަށް ފޮނުވުމުގެ މަސައްކަތް މިހާރު ވަނީ ފަށާފައެވެ. މިވަގުތު މާލޭގެ އިތުރުން ރާއްޖޭގެ އުތުރާއި ދެކުނުގައިވެސް މަސްދަޅު ކޭސްގެ ސްޓޮކް ހުންނާނެ ކަމަށް ވަޒީރު ފާހަގަކުރެއްވިއެވެ.
ވަޒީރު އާދަމް ޝަރީފް ވިދާޅުވި ގޮތުގައި އެންމެ ލަސްވެގެން މި ހަފުތާ ނިމެންވާއިރަށް ހުރިހާ އަތޮޅެއްގައިވެސް މަސްދަޅު ކޭސް ބެހުމުގެ މަސައްކަތް ފެށޭނެއެވެ. "އަޅުގަނޑުމެން ޓާގެޓް މިކުރަނީ ފެބްރުއަރީ މަހުގެ ފުރަތަމަ ދެ ހަފުތާގެ ކުރިން އެއްކޮށް މި މަސައްކަތް ނިންމާލުން. އަޅުގަނޑުމެން ވަރަށް އުފާކުރަން މިކަހަލަ ކަމެއް ކުރިއަށްދާއިރު ވަރަށް ގިނަ ފަރާތްތަކުގެ އެއްބާރުލުން ލިބެމުން އެބަދޭ،" ވަޒީރު ވިދާޅުވިއެވެ.
ރަމަޟާންމަހު ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ ސަރުކާރަށް އެއް އަހަރު ފުރުމުގެ މުނާސަބަތުގައެވެ. މާލެ ސަރަހައްދުގައި މިހާރު ވަނީ މަސްދަޅު ކޭސް ބަހަން ފަށާފައެވެ. ކޮންމެ ރެއަކު 8:00 އިން 11:00 އަށް މަސްދަޅު ކޭސް ދޫކުރާއިރު، ކޮންމެ ކަރަންޓް މީޓަރަކަށް ކޭހެއް ލިބޭނެއެވެ. މިކަމަށްޓަކައި ޕޯޓަލް މެދުވެރިކޮށް ކޮންމެ ރެއަކު 300 ޓޯކަން ދޫކުރުމަށް ވަނީ ހަމަޖެހިފައެވެ.
މާލޭގައި މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑުން މަސްދަޅު ކޭސް ދޫކުރާނެއެވެ. ހުޅުމާލެ ފޭސް 1 ގައި ޢުމަރުޒާހިރު ބިލްޑިންގ، ޕޮލްކޯ ޓަވަރު އަދި މުހައްމަދު ގާސިމް ޕްރީސްކޫލުން ކޭސް ދޫކުރާއިރު، ފޭސް 2 ގައި ކާމިލުދީދީ ސްކޫލް، ހިޔާޓަވަރު 10 އަދި އެމްޕީއެލް ޓަވަރުން ދޫކުރާނެއެވެ. ވިލިމާލޭގައި މަސްދަޅު ކޭސް ދޫކުރާނީ ވެމްކޯ ސައިޓުންނެވެ.
މިފަހަރުގެ ރޯދަ ހަދިޔާގެ ގޮތުގައި ޖުމްލަ 118,673 ގޭބިސީއަކަށް މަސްދަޅު ކޭސް ދޫކުރުމަށް ވަނީ ނިންމާފައެވެ. މީގެ ތެރޭގައި ހިމެނެނީ އަތޮޅުތަކުގެ 56,918 ގޭބިސީއާއި މާލެ ސަރަހައްދުގެ 61,755 ގޭބިސީއެވެ.