ސާފް ފުޓްސަލް ޗެމްޕިއަންޝިޕް ކާމިޔާބުކުރި ގައުމީ ފުޓްސަލް ޓީމަށާއި، މިދިޔަ އަހަރު ސްރީލަންކާގައި ބޭއްވި ސުޕަ ކަޕްގެ ޗެމްޕިއަންކަން ހޯދި ގައުމީ ފުޓުބޯޅަ ޓީމަށް އެއް މިލިއަން ރުފިޔާގެ ބޯނަހެއް ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
ޕީއެސްއެމް ނިއުސްއަށް ދެއްވި އިންޓަވިއުއެއްގައި ކުޅިވަރާއި ހަށިހެޔޮކަމާއި ބެހޭ ވަޒީރު އަބުދުﷲ ރާފިޢު ވިދާޅުވީ، ރައީސުލްޖުމްހޫރިއްޔާ ނިންމަވާފައިވަނީ ހުރިހާ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް މި ބޯނަސް ދިނުމަށް ކަމަށެވެ. މި ފައިސާ ކުޅުންތެރިންނާ ހަވާލުކުރާނީ ފުޓުބޯޅަ އެސޯސިއޭޝަން (އެފްއޭއެމް) މެދުވެރިކޮށް ކަމަށްވެސް ވަޒީރު ވިދާޅުވިއެވެ.
ގައުމީ ފުޓްސަލް ޓީމުން މި ފަހަރުގެ ސާފް ފުޓްސަލް ޗެމްޕިއަންޝިޕް ކާމިޔާބުކުރީ ކުޅުނު ހުރިހާ މެޗަކުން މޮޅުވެގެންނެވެ. މިއީ ރާއްޖެއަށް ލިބުނު ފުރަތަމަ ސާފް ފުޓްސަލް ތަށްޓެވެ. މީގެ އިތުރުން، ގައުމީ ފުޓުބޯޅަ ޓީމުން ވަނީ މިދިޔަ އަހަރުގެ ސެޕްޓެމްބަރު މަހު ސްރީލަންކާގައި ބޭއްވި ސައުތު އޭޝިއަން ސުޕަ ކަޕް ކާމިޔާބުކޮށްފައެވެ. މިއީ ސަރަހައްދީ ފުޓުބޯޅައިގައި ގިނަ އަހަރުތަކަކަށްފަހު ރާއްޖެއަށް ލިބުނު ފުރަތަމަ ކާމިޔާބީއެވެ.
ވަޒީރު ރާފިޢު އިތުރަށް ހާމަކުރެއްވި ގޮތުގައި، މި ބޯނަސް ދިނުމަކީ މިދިޔަ އަހަރުގެ އޮކްޓޫބަރު މަހުގެ 2 ވަނަ ދުވަހު ސިޓްރޮން ރެސްޓޯރެންޓުގައި ގައުމީ ޓީމާ ބައްދަލުކުރައްވައި ރައީސުލްޖުމްހޫރިއްޔާ ވެވަޑައިގެންފައިވާ ވައުދެކެވެ. މިއީ ކުޅުންތެރިންގެ ބުރަ މަސައްކަތުގެ އަގުވަޒަންކުރުމުގެ ގޮތުން ނިންމެވި ނިންމެވުމެކެވެ.
ސަރުކާރުން އަންނަނީ ފުޓުބޯޅަ އާއި ފުޓްސަލްގެ އިތުރުން އެހެނިހެން ކުޅިވަރުތަކުން ރާއްޖެއަށް ރީތިނަން ގެނެސްދޭ ކުޅުންތެރިންނަށްވެސް ހިތްވަރު ދިނުމުގެ ގޮތުން ފައިސާގެ އިނާމު ދެމުންނެވެ. އަދި ކުޅުންތެރިންގެ ފެންވަރު މަތިކޮށް ބައިނަލްއަގްވާމީ މައިދާނުގައި ކާމިޔާބީތައް އިތުރުކުރުމަށް އެސޯސިއޭޝަންތަކާ ގުޅިގެން ގިނަ މަސައްކަތްތަކެއް ކުރުމަށް ވަނީ ރޭވިފައެވެ.