ބ. ތުޅާދޫގައި ސަރުކާރުން ތަރައްޤީކުރަމުންދާ 30 އެނދުގެ ހޮސްޕިޓަލުގެ މަސައްކަތް މި އަހަރުގެ ނިޔަލަށް އެއްކޮށް ނިންމާލުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އަމާޒު ހިފައިފިއެވެ.
މި މަޝްރޫޢަކީ އެ ރަށުގެ ރައްޔިތުންނަށް ފެންވަރު ރަނގަޅު ޞިއްޙީ ޚިދުމަތް ފޯރުކޮށްދިނުމަށްޓަކައި ކުރިއަށްގެންދާ މުހިންމު މަޝްރޫޢެކެވެ.
ޖުމްލަ 124 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢުގެ ދަށުން މިހާރު ކުރިއަށްދަނީ އިމާރާތުގެ ރާނާ ސިމެންތި ޖެހުމުގެ މަސައްކަތްތަކެވެ. މި މަޝްރޫޢުގެ ތެރޭގައި ހޮސްޕިޓަލް އިމާރާތުގެ އިތުރުން، އެތަނުގައި މަސައްކަތްކުރާ މުވައްޒަފުންނަށް ޚާއްޞަ އެކޮމޮޑޭޝަން ބްލޮކެއް ތަރައްޤީ ކުރުމަށްވެސް ވަނީ ހަމަޖެހިފައެވެ.
މި މަޝްރޫޢު ކުރިން ކަނޑައެޅި ތާރީޚަށް ނިންމާލެވިފައި ނުވި ނަމަވެސް، އެމްޓީސީސީން ބުނެފައިވަނީ މިހާރު މަސައްކަތްތައް ބާރު ސްޕީޑުގައި ކުރިއަށްދާ ކަމަށެވެ. އަދި މި އަހަރު ނިމުމުގެ ކުރިން ހޮސްޕިޓަލުގެ ހުރިހާ މަސައްކަތެއް ނިންމައި، ޚިދުމަތަށް ތައްޔާރުކުރުމަށް ދަނީ ބުރަ މަސައްކަތްތަކެއް ކުރަމުންނެވެ.
ތުޅާދޫގައި މި ހޮސްޕިޓަލް ބިނާކޮށް ނިމުމުން، އެ ރަށުގެ ރައްޔިތުން ބޭސްފަރުވާއަށް ބ. އޭދަފުއްޓަށް ނުވަތަ މާލެއަށް ކުރަންޖެހޭ ދަތުރުތަކަށް ބޮޑު ލުޔެއް ލިބިގެންދާނެއެވެ. މީގެ އިތުރުން، ދަތުރުފަތުރަށާއި ބޭސްފަރުވާއަށް ކުރަންޖެހޭ ބޮޑު ހޭދަ ކުޑަވެ، ރަށުގައި ތިބެގެން ފަސޭހަކަމާއެކު ޞިއްޙީ ޚިދުމަތް ލިބޭނެ މަގު ތަނަވަސްވެގެންދާނެއެވެ.