ހުޅުމާލެ ފޭސް 2 ގެ ހިޔާ ސަރަހައްދުގައި އަލަށް ބިނާކުރި ޝަހީދު ޢަލީ ސްކޫލްގެ އިމާރާތުގެ މަސައްކަތް ނިންމައި، އެ ސްކޫލުގައި މާދަމާ ކިޔަވައިދޭން ފެށުމަށް ނިންމައިފިއެވެ. މި ސްކޫލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތައުލީމީ ދާއިރާއަށް ދެއްވަމުން ގެންދަވާ ހާއްސަ އިސްކަމުގެ ދަށުން ބިނާކުރެވުނު މުހިންމު ތައުލީމީ ބިނާއެކެވެ.
މި ސްކޫލް އިމާރާތްކުރުމުގެ މަސައްކަތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2023 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހުއެވެ. ބިންގާ އެޅިތާ ގާތްގަނޑަކަށް ދެ އަހަރެއްހާ ދުވަހުގެ ތެރޭގައި އިމާރާތުގެ މަސައްކަތް ނިންމައި، ދަރިވަރުންނަށް ކިޔަވައިދޭން ފެށުމަކީ ތައުލީމީ ދާއިރާއަށް ލިބުނު ބޮޑު ކުރިއެރުމެކެވެ.
ޝަހީދު ޢަލީ ސްކޫލަށް ނަން ދީފައިވަނީ ޕޯޗުގީޒުންގެ އަތުން ރާއްޖެ ސަލާމަތްކުރުމަށް ހަނގުރާމަކުރައްވައި ޝަހީދުވި އަލި ރަސްގެފާނުގެ ޒިކުރާ އާކުރުމުގެ ގޮތުންނެވެ. މި ސްކޫލްގެ ލޯގޯ ފަރުމާކޮށްފައިވަނީ އަރަބިވަންތަ ރީތި ތާނަ އަކުރުތަކެއް ބޭނުންކޮށްގެންނެވެ.
ޖާގައިގެ ގޮތުން ބަލާއިރު، މިއީ އެއް ދަންފަޅިއަށް 1،500 ކުދިންގެ ޖާގައިގެ ސްކޫލެކެވެ. ނަމަވެސް، ދެ ދަންފަޅިއަށް ކިޔަވައިދޭނަމަ ޖުމްލަ 2،500 ކުދިންނަށް މި ސްކޫލުގައި ކިޔެވުމުގެ ފުރުސަތު ލިބިގެންދާނެއެވެ. މިއީ ހުޅުމާލެ ފޭސް 2 ގައި ދިރިއުޅޭ އާއިލާތަކަށް ކުރިމަތިވެފައިވާ ސްކޫލް ޖާގައިގެ ދަތިކަމަށް ލިބިގެންދާނެ ބޮޑު ލުޔެކެވެ.
ސްކޫލްގެ ވަސީލަތްތަކަށް ބަލާއިރު، މި ސްކޫލުގައި އޭސީކޮށްފައިވާ 54 ކްލާސްރޫމާއި، މަލްޓިޕާޕަސް ހޯލެއްގެ އިތުރުން ދަރިވަރުން ކުޅިވަރު ކުޅުމަށް ޚާއްޞަ ޓާފް ދަނޑެއް ހިމެނެއެވެ. މި ހުރިހާ ވަސީލަތްތަކަކީވެސް ޒަމާނީ ފެންވަރަށް ތަރައްޤީކޮށްފައިވާ ވަސީލަތްތަކެއްކަން ފާހަގަކުރެވެއެވެ.