ދިރާސީ އައު އަހަރުގެ ކިޔެވުން ފެށުމާ ގުޅިގެން، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، ރާއްޖޭގެ ހުރިހާ ދަރިވަރުންނަށާއި ބެލެނިވެރިންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވައިފިއެވެ.
ތަޢުލީމީ އައު އަހަރާ ގުޅިގެން މީސްމީޑިއާ މަންސަ "އެކްސް" ގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާގެ އަނބިކަނބަލުން ވަނީ، ކޮންމެ ކިޔަވާ ކުއްޖަކަށްވެސް މިއީ ފާގަތި، ބާއްޖަވެރި އަހަރަކަށް ވުން އެދި ހެޔޮ ދުޢާކުރައްވާފައެވެ. އެކަމަނާގެ މެސެޖުގައި ދަރިވަރުންނާއި ބެލެނިވެރިންގެ އިތުރުން، ތަޢުލީމީ ދާއިރާގެ އެދުރުންނާއި، ހިންގުންތެރިންނާއި، އަދި މި ދާއިރާގައި މަސައްކަތްކުރައްވާ ހުރިހާ އެހީތެރިންނަށްވެސް ވަނީ ތަހުނިޔާ އަރިސްކުރައްވާފައެވެ.
ރާއްޖޭގެ 219 ސްކޫލެއްގައި މިއަދު ކިޔެވުން ފެށިގެންދިޔައިރު، މި އަހަރު ޖުމްލަ 80,715 ދަރިވަރުން ތަޢުލީމު ހާޞިލްކުރަން ފަށާނެއެވެ. މިނިސްޓްރީ އޮފް އެޑިއުކޭޝަނުން ހާމަކޮށްފައިވާ ގޮތުގައި، އައު އަހަރުގެ ކިޔެވުން ފެށުނުއިރު ހުރިހާ ސްކޫލަކަށް ބޭނުންވާ ފޮތްތަކާއި ޓީޗަރުން މިހާރު ވަނީ ހަމަވެފައެވެ.
މި ދިރާސީ އަހަރުގެ ކަލަންޑަރުގައިވާ ގޮތުން، ފުރަތަމަ ޓާމުގެ ބޮޑު ޗުއްޓީ ދަރިވަރުންނަށް ލިބޭނީ ޖުލައި 17 އިން އޮގަސްޓް 1 ގެ ނިޔަލަށެވެ. އަދި ދެވަނަ ޓާމުގެ ކިޔެވުން ނިމި، މުޅި އަހަރުގެ ބޮޑު ޗުއްޓީ ފެށުމަށް ހަމަޖެހިފައިވަނީ ޑިސެމްބަރު މަހުގެ 18 ވަނަ ދުވަހުއެވެ.