ދިވެހިރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް) ތަކުގައި ހިންގޭނެ އިގުތިސާދީ ހަރަކާތްތަކާއި، އެފަދަ ސަރަހައްދެއްގައި އިންވެސްޓު ކުރެވޭނެ އެންމެ ކުޑަ މިންވަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވައިފިއެވެ. މިކަންކަން ބަޔާންކުރައްވައި ރައީސުލްޖުމްހޫރިއްޔާ ނެރުއްވި ރިޔާސީ ގަރާރު މިހާރު ވަނީ ސަރުކާރުގެ ގެޒެޓުގައި ޝާއިއުކުރައްވާފައެވެ.
އެސްއީޒެޑް ގާނޫނުގެ ދަށުން، ކޮންމެ އަހަރެއްގެ ފެބްރުއަރީ މަހުގެ ކުރިން އެސްއީޒެޑްގައި ހިންގޭނެ މަޝްރޫއުތަކާއި އިންވެސްޓްމަންޓުގެ އެންމެ ކުޑަ މިންވަރު އިންވެސްޓް ބޯޑުގެ މަޝްވަރާގެ މަތިން ރައީސުލްޖުމްހޫރިއްޔާ ކަނޑައަޅުއްވަން ޖެހެއެވެ. މިއަދު ނެރުއްވި ގަރާރުގައިވާ ގޮތުން، އެސްއީޒެޑްއެއްގެ ގޮތުގައި ކަނޑައަޅާ ސަރަހައްދެއްގައި ހިންގޭނީ ޖުމްލަ 100 މިލިއަން އެމެރިކާ ޑޮލަރަށްވުރެ ކުޑަނޫން އިންވެސްޓްމަންޓްތަކެވެ. ނަމަވެސް، އެއީ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއެއް ނަމަ، އިންވެސްޓް ކުރަންޖެހޭ އެންމެ ކުޑަ މިންވަރަކީ 500 މިލިއަން އެމެރިކާ ޑޮލަރެވެ.
100 މިލިއަން ޑޮލަރަށްވުރެ ކުޑަނޫން އިންވެސްޓްމަންޓްތަކުގެ ދަށުން އެސްއީޒެޑްތަކުގައި ހިންގުމަށް ހުއްދަ ދެވޭނެ ދާއިރާތަކުގެ ތެރޭގައި ހިމެނެނީ:
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގގެ އެކި ބާވަތުގެ މަސައްކަތްތައް.
- ޓްރާންސްޝިޕްމަންޓް ޕޯޓް، އިންޓަރނޭޝަނަލް ލޮޖިސްޓިކްސް، ޕޯޓް، އެއަރޕޯޓް، ބަންކަރިންގ އަދި ޑޮކިންގ ސަރވިސަސް.
- ޔުނިވަރސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް އަދި ދުނިޔޭގެ ފެންވަރުގެ ރިސަރޗް ފެސިލިޓީތައް.
- އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކުތަކާއި އެއާ ގުޅޭ ވަސީލަތްތައް.
- އިންޓަރނޭޝަނަލް ފައިނޭންޝަލް ސަރވިސަސް އާއި އިންޓަނޭޝަނަލް ޓްރޭޑް ސެންޓަރުތައް.
- އިޢާދަކުރަނިވި ހަކަތައިގެ ދާއިރާ އާއި ފުޑް ސެކިއުރިޓީގެ މަޝްރޫއުތައް.
- ރާއްޖެއަށް އާ ޓެކްނޮލޮޖީ ތައާރަފުކުރުމާއި، ތެލާއި ގޭސް އަދި މިނަރަލް އެކްސްޕްލޮރޭޝަންގެ މަސައްކަތްތައް.
ރައީސުލްޖުމްހޫރިއްޔާގެ ގަރާރުގައި އިތުރަށް ބަޔާންކޮށްފައިވަނީ، 500 މިލިއަން ޑޮލަރުގެ އިންވެސްޓްމަންޓެއްގެ ގޮތުގައި ހުށަހަޅާ ސަސްޓެއިނަބަލް ޓައުންޝިޕް މަޝްރޫއުތަކުގައި، އެ ފައިސާ ހާއްސަކުރަންވާނީ ސީދާ އެ ޓައުންޝިޕް ތަރައްގީކުރުމުގެ ކޮމްޕޯނަންޓްތަކަށް ކަމަށެވެ.
އެސްއީޒެޑް ގާނޫނުގެ ދަށުން މިހާރުވެސް ބައެއް ބޮޑެތި މަޝްރޫއުތައް ވަނީ ފެށިފައެވެ. އެގޮތުން އިއާދަކުރަނިވި ހަކަތައިން ކަރަންޓު އުފެއްދުމުގެ ބޮޑު މަޝްރޫއެއް ކެނަޑާގެ ކުންފުންޏަކާ ހަވާލުކޮށްފައިވާއިރު، ނ. އަތޮޅުގައި ރާއްޖޭގެ ފުރަތަމަ ސަސްޓެއިނަބަލް ޓައުންޝިޕް ތަރައްގީކުރުމުގެ މަސައްކަތްވެސް މިހާރު ވަނީ ބަޔަކާ ހަވާލުކުރެވިފައެވެ.