ޖެނުއަރީ 28 ވަނަ ދުވަހު މާލޭގައި މޯލްޑިވްސް އިމިގްރޭޝަނާއި، ފުލުހުން އަދި އިކޮނޮމިކް މިނިސްޓްރީ ގުޅިގެން ހިންގި ހާއްސަ އޮޕަރޭޝަނެއްގައި، ގަވާއިދާ ހިލާފަށް ވިޔަފާރިކުރަމުންދިޔަ ދެ ތަނެއް ބަލައި ފާސްކޮށް 15 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މި އިންސްޕެކްޝަނުގައި ބަލައި ފާސްކުރި ތަންތަނުގެ ތެރޭގައި ހިމެނެނީ އެއްވެސް ހުއްދައެއް ނެތި ވިޔަފާރި އުސޫލުން ރޮށި ފިހެ ވިއްކާ ތަނަކާއި، ގަވާއިދާ ހިލާފަށް ހިންގަމުންދިޔަ ފިހާރައެކެވެ. މި ދެ ތަނަކީވެސް ބިދޭސީން ދިރިއުޅެމުންދިޔަ ތަންތަން ކަމަށް ކަމާބެހޭ އިދާރާތަކުން މައުލޫމާތު ދެއެވެ.
އިކޮނޮމިކް މިނިސްޓްރީން މިހާރު ވަނީ ގަވާއިދާ ހިލާފަށް ހިންގަމުންދިޔަ އެ ދެ ތަން ބަންދުކޮށްފައެވެ. މި އޮޕަރޭޝަނަކީ މާލޭގައި ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް ކުރިއަށްގެންދާ ސިލްސިލާ މަސައްކަތްތަކުގެ ތެރެއިން ހިންގުނު ހަރަކާތެކެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދުމަށާއި، އެފަދަ ފަރާތްތަކުން ހިންގާ ވިޔަފާރިތައް ހުއްޓުވުމަށް ކަމާގުޅޭ އިދާރާތަކުން ދަނީ ހަރުދަނާ މަސައްކަތްތަކެއް ކުރަމުންނެވެ. މިގޮތުން ހިންގާ އިންސްޕެކްޝަންތަކުގައި ގަވާއިދާ ހިލާފަށް އުޅޭ ބިދޭސީންނާއި، ހުއްދަ ނެތި ވިޔަފާރިކުރާ ފަރާތްތަކާމެދު ގާނޫނީ ފިޔަވަޅު އެޅުމަށް ވަނީ ނިންމާފައެވެ.