އިންޑިއާގެ ސިނަމާގެ އެންމެ ނުފޫޒުގަދަ އެއް ތަރި، ސުޕަރސްޓާ ރަޖްނީކާންތު އޭނާގެ އަމިއްލަ ހަޔާތުނާމާ (އޮޓޯބަޔޯގްރަފީ) ލިޔަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަމުން ގެންދަވާކަން އޭނާގެ ދަރިފުޅު ސައުންދަރްޔާ ރަޖްނީކާންތު ކަށަވަރުކޮށްދީފިއެވެ. މި ފޮތަކީ ރަޖްނީކާންތު އަމިއްލަފުޅަށް ލިޔަމުން ގެންދަވާ ފޮތެކެވެ.
މި ހަޔާތުނާމާގައި ރަޖްނީކާންތުގެ މުޅި ދިރިއުޅުމުގެ ދަތުރު ކިޔައިދޭނެއެވެ. އޭގެ ތެރޭގައި ބެންގަލޫރުގައި ބަސް ކޮންޑަކްޓަރެއްގެ ގޮތުގައި އުޅުނު ދުވަސްވަރު ކުރި އުނދަގޫ ތަޖުރިބާތަކުން ފެށިގެން، އިންޑިއާގެ ސިނަމާގެ އެންމެ އުހަށް ވާސިލުވުމާ ހަމައަށް ހިނގާފައިވާ ކަންތައްތައް ހިމެނެއެވެ. މީގެ ކުރިން އާންމުންނަށް އެނގިފައިނުވާ ސިއްރުތަކާއި، އޭނާގެ ހަޔާތުގެ މުހިންމު ނިންމުންތަކުގެ ތަފްސީލު މި ފޮތުގައި ހިމެނޭނެ ކަމަށް ބެލެވެއެވެ.
ސައުންދަރްޔާ ހާމަކުރި ގޮތުގައި، މި ފޮތް ބިނާވެފައިވަނީ ރަޖްނީކާންތުގެ ދިރިއުޅުން ބައްޓަންކުރުމުގައި އެހީތެރިވި މުހިންމު އަސާސްތަކުގެ މައްޗަށެވެ. މީގެ ތެރޭގައި އަޚްލާގީ ސިފަތަކާއި، މަޑުމައިތިރިކަމާއި، އަދި ރޫހާނީ ދިރިއުޅުމާއި ދުނިޔަވީ ކަންކަމުގެ މެދުގައި ހިފަހައްޓާ ހަމަހަމަކަން ފާހަގަކޮށްފައިވެއެވެ. މި ކަންކަމަކީ މުޅި ދުނިޔޭގެ ކިޔުންތެރިންނަށްވެސް އިބުރަތްތެރި ކަންތައްތަކަކަށް ވާނެ ކަމަށް އޭނާ ބުންޏެވެ.
ޑައިރެކްޓަރު ލޯކޭޝް ކަނަގަރާޖް ހާމަކުރި ގޮތުގައި، ރަޖްނީކާންތު އަންނަނީ އޭނާގެ އާ ފިލްމު "ކޫލީ" ގެ މަސައްކަތުގައި އުޅެމުންވެސް ކޮންމެ ދުވަހަކު ގާތްގަނޑަކަށް ދެ ގަޑިއިރު މި ފޮތް ލިޔުމަށް ހޭދަކުރަމުންނެވެ. މިއީ އޭނާގެ ދިރިއުޅުމުގެ ވާހަކަ އެންމެ ފުރިހަމައަށް ގެނެސްދިނުމަށް ކުރާ ވަރަށް ބޮޑު މަސައްކަތެކެވެ.
މި ފޮތް ނެރޭނެ ވަކި ތާރީޚެއް އަދި އިއުލާނުކޮށްފައެއް ނުވެއެވެ. މީގެ ކުރިންވެސް ރަޖްނީކާންތުގެ ހަޔާތާ ގުޅޭގޮތުން އެކި ލިޔުންތެރިން ފޮތްތައް ލިޔެފައިވެއެވެ. އޭގެ ތެރޭގައި އަމްބިގާ ކޭ.އެސް ލިޔެފައިވާ “The Rajini in Me” އާއި ޕީ.ސީ ބާލަސުބްރަމާނިއަން ލިޔެފައިވާ “Rajini’s Mantras” ފާހަގަކޮށްލެވެއެވެ. ނަމަވެސް، މިއީ ރަޖްނީކާންތު އަމިއްލައަށް ލިޔާ ފުރަތަމަ ހަޔާތުނާމާއެވެ.