އިލްމު އުނގެނުމަކީ ހަމައެކަނި މައުލޫމާތުތަކެއް ދަސްވުމާއި އިމްތިހާނުތަކުން ފާސްވުމެއް ނޫން ކަމަށާއި، އެއީ އިންސާނާގެ ބުއްދިއާއި ޒަމީރު ހޭލައްވައިލާ ދިރުމެއް ކަމަށް މިއަދުގެ ހުކުރު ހުތުބާގައި ބުނެފިއެވެ. ދިރާސީ އައު އަހަރުގެ ކިޔެވުން ފެށުމާ ގުޅުވައިގެން މިއަދު ދިން ހުތުބާގައި ވަނީ ތައުލީމީ ދާއިރާއާ ގުޅުންހުރި މުހިންމު ނަސޭހަތްތަކެއް ދީފައެވެ.
ހުތުބާގައި ފާހަގަކޮށްފައިވާ ގޮތުގައި، ދަރިވަރުން މަދަރުސާގެ ދޮރޯށިތަކުން ވަންނަ މަންޒަރަކީ އުންމީދުތައް އައުކޮށްދޭ މަންޒަރެކެވެ. ދަރީންނަކީ މާތް ﷲ އަހަރެމެންނާ ހަވާލުކުރައްވައިފައިވާ އަގުބޮޑު އަމާނާތެއްކަން ފާހަގަކުރަމުން، މިއީ އެ ކުދިންގެ މުސްތަގުބަލު ބިނާކުރުމުގެ އައު ބާބެއްގެ ފެށުން ކަމަށް ހުތުބާގައި ބުންޏެވެ. އިސްލާމްދީނުގައި ތައުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުމެއް ނޫން ކަމަށާއި، އެއީ ކުދިންގެ ބުއްދިއާއި އަހުލާގަށް ފުރިހަމަކަން ގެނެސްދޭ، ސާލިހު އިންސާނަކު ބިނާކުރުމަށް ފޯރުކޮށްދެވޭ ވަށައިޖެހޭ ތައުލީމަކަށް ވާންޖެހޭނެ ކަމަށްވެސް ބުންޏެވެ.
މުދައްރިސުންނާ މުހާތަބުކޮށް ހުތުބާގައި ބުނީ، މުދައްރިސުންނަކީ އިލްމާއި މައުރިފާގެ ނޫރުން ދަރިވަރުންގެ ހިތްތައް އަލިކޮށްދޭ ދަންމަރުތަކެއް ކަމަށެވެ. ކޮންމެ މާއްދާއެއް ކިޔަވައިދިން ކަމުގައި ވިޔަސް، އިސްލާމްދީނުގެ އަސްލުތަކާއި ތަރަހައިގެ ތެރެއަށް ފެއްތުމަކީ މުދައްރިސުންގެ ބޮޑު މަސްއޫލިއްޔަތެއް ކަމަށް ހުތުބާގައި ހަނދާންކޮށްދިނެވެ. އަދި ދަރިވަރުންގެ ބުއްދި ތަރައްގީކޮށްދޭ ފަދައިން، އެ ކުދިންގެ ހިތްތަކުގައި އީމާންކަމާއި މަތިވެރި އަހުލާގުގެ ބިންގާ އަޅައިދިނުމަށް މުދައްރިސުންނަށް އިލްތިމާސްކުރިއެވެ.
ދަރިވަރުންނަށް ނަސޭހަތްތެރިވަމުން ހުތުބާގައި ބުނީ، ދަރިވަރުންނަކީ ގައުމާއި އުންމަތުގެ އުންމީދު ކަމަށާއި، މިއަދު އެކުދިން މަދަރުސާއަށް ދަނީ މުޅި ގައުމުގެ މުސްތަގުބަލު ކޮނޑުގައި އުފުލައިގެން ކަމަށެވެ. އެހެންކަމުން މުދައްރިސުންނަށް އިހުތިރާމުކުރުމަށާއި، މަދަރުސާގެ އުސޫލުތަކަށް ހުރުމަތްތެރިކޮށް ހިތުމަށް ނަސޭހަތްތެރިވިއެވެ. މީގެ އިތުރުން ވަގުތުގެ ބޭނުން ހެޔޮގޮތުގައި ހިފުމަށާއި، ބޭނުމެއް ނެތް ކަންކަމުގައި ވަގުތު ހޭދަނުކުރުމަށްވެސް ބާރުއެޅިއެވެ.
އިލްމު ހޯދުމުގެ މަގަކީ ބުރަ އަދި ދިގު މަގެއް ނަމަވެސް، އެއީ ސުވަރުގެއަށް މަގު ފަހިކޮށްދޭ އަޖުރު މަތިވެރި ޖިހާދެއް ކަމަށް ހުތުބާގައި ސިފަކުރިއެވެ. މިކަމާ ގުޅޭގޮތުން ރަސޫލުﷲ ﷺ ގެ ހަދީޘްފުޅެއްގެ މާނައިގައިވަނީ: “ޢިލްމު ހޯދުމުގެ މަގެއްގައި ހިނގައިފި މީހަކަށް، ސުވަރުގެވަންނާނޭ މަގެއް މާތް ﷲ ފަހިކޮށްދެއްވާނެތެވެ.” ކުރިމަތިވާ ގޮންޖެހުންތަކަށް ކެތްތެރިވެ، އަޒުމާއެކު ކުރިއަށް ދިއުމަށް ގޮވާލަމުން، ކޮންމެ އުނދަގުލަކަށް ފަހު ފަސޭހަކަމެއް ވާނެކަން ހުތުބާގައި ހަނދާންކޮށްދިނެވެ.
ހުތުބާގައި ބުނީ،ޢިލްމު އުނގެނުމުގެ މައިގަނޑު ބޭނުމަކީ، ހަމައެކަނި މަޢުލޫމާތުތަކެއް ދަސްކޮށް، އިމްތިޙާނުތަކަކުން ފާސްވުމެއްނޫން ކަމަށާއި އެހެނެއްކަމަކު އެއީ އިންސާނާގެ ބުއްދިއާއި ޒަމީރު ހޭލައްވައިލާ ދިރުމެއް ކަމަށެވެ.
ޢިލްމަކީ، ޖާހިލުކަމުގެ އަނދިރީން އިންސާނާ ނެރެދީ ޙައްޤާއި ބާޠިލު ވަކިކޮށްދޭ، ނޫރެއް ކަމަށާއި. ޢިލްމުގެ އަސްލު މަޤުޞަދަކީ އިންސާނާގެ ކިބައިގައި މަތިވެރި އަޚުލާޤާއި، މާތް ﷲއަށް ބިރުވެތިވުމުގެ ޞިފަ އަށަގެންނެވުމާ އެކު ބިން ހެޔޮ ގޮތުގައި، ޢިމާރާތްކޮށް މުޖުތަމައަށް ފައިދާކޮށްދޭނޭ، ޞާލިޙު ބަޔަކު ބިނާކުރުން ކަމަށްވެސް ހުތުބާގައި ވަނީ ބުނެފައެވެ. އެހެންކަމުން އަހަރެމެންގެ ދަރީންނަށް، ޢިލްމު އުނގަންނައިދީ އެ ކުދީންނަށް ދެ ދުނިޔޭގެ ފަލާޙާއި ކާމިޔާބީ ޙާޞިލުވާނޭ މަގަށް ތަރުބިޔަތުކޮށްދޭ މުދައްރިސުންނަކީ، މާތް ﷲގެ ޙަޟްރަތުގައި މަތިވެރި ބަޔެއް ކަމަށްވެސް ހުތުބާގައި ބުނެފައިވެއެވެ. މާތް ﷲ ވަޙީކުރައްވައިފައިވެއެވެ. ﴿قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ﴾ މާނައީ: “ކަލޭގެފާނު ވިދާޅުވާށެވެ! ދަންނަ މީހުންނާއި ނުދަންނަ މީހުން ހަމަހަމަވާނެހެއްޔެވެ.
ހުތުބާގައި ބުނީއިސްލާމީ ތާރީޚުގެ ރަންޒަމާނުގައި ދުނިޔެ ދުށް ފަދަ، ދީނީ ޢިލްމާއި ދުންޔަވީ ޢިލްމުގެ މާހިރުންނަށް މިއަދު މި އުންމަތް ބޭނުންވާ ކަމަށެވެ. ތަޢުލީމީ ނިޒާމުގެ ތެރެއިން އަހަރެމެން ބިނާކުރާން މި އުންމީދުކުރާ ޖީލަކީ، އިޚުލާޞްތެރި، އަމާނާތްތެރި، ޢަދުލުވެރި، ޢިލްމުވެރި، ޚުލްޤު ހެޔޮ، ޤައުމީ މަޞްލަޙަތު އިސްކުރާ، ޙައްޤަށް ތަބާވާނޭ ޢަދުލުވެރި ޖީލެއްކަމަށާއޖ މި އަސާސްތަކުގެ މައްޗަށް ބިނާވާ ޖީލަކީ، ދުނިޔެއާއި އާޚިރަތުގެ ބާއްޖަވެރިކަމަށް ގެންދާނެ ޖީލެއްކަމަށް އަދި އެ ޖީލަކާ މެދު މުޖުތަމަޢު އުފާކުރާނެ ޖީލެއްކަމަށް ވެސް ހުތުބާގައި ވަނީ ބުނެފައެވެ. އެހެންކަމުން އެ ކަމަށް ޓަކައި އެންމެން އެކުގައި މަސައްކަތްކުރުމަށް ހުތުބާގައި ވަނީ ނަސޭހަތް ތެރިވެފައެވެ
މިއަދުގެ ހުތުބާވެސް ނިންމާލީ މިއުންމަތުގެ މާތް ނަބިއްޔާ އަށް ސޮލަވާތް ކިޔެވުމަށް ވަސިއްޔަތް ކުރުމާއެކު އެކަލޭގެފާނުގެ މައްޗަށް ސޮލަވާތް ކިޔެވުމުންނެވެ.