ދަރިވަރުންގެ އަޚްލާޤާއި ރީތި އާދަތައް ބިނާކުރުމަށް އެޑިޔުކޭޝަން މިނިސްޓްރީން އިސްނަގައިގެން ހިންގާ ތަރުބަވީ ޚާއްސަ ޕްރޮގްރާމް ”ބިންގާ“ ފެށުމަށްޓަކައި ކުރަންޖެހޭ ތައްޔާރީތައް ކުރުމަށް ސްކޫލްތަކަށް އަންގައިފިއެވެ. މި ޕްރޮގްރާމަކީ މުޅި އަހަރު ދުވަހަށް ބަހާލައިގެން، ސްކޫލްތަކާއި ބެލެނިވެރިން އަދި މުޖުތަމަޢުގެ ބައިވެރިވުމާއެކު ކުރިއަށްގެންދާ ޕްރޮގްރާމެކެވެ.
އެޑިޔުކޭޝަން މިނިސްޓްރީން މިހާރު ވަނީ މިކަމާ ގުޅޭ ސާކިއުލާއެއް ސްކޫލްތަކަށް ފޮނުވާފައެވެ. މި ޕްރޮގްރާމް ހިންގުމުގައި އެންމެ އިސް ދައުރެއް އަދާކުރާނީ ސްކޫލްތަކުގެ ޕްރިންސިޕަލުންނެވެ. ”ބިންގާ“ ޕްރޮގްރާމްގެ ހަރަކާތްތައް ބިނާވެފައިވަނީ ކޮންމެ މަހަކަށް ކަނޑައެޅޭ ވަކި ތީމެއްގެ މައްޗަށެވެ. އެގޮތުން މި ޕްރޮގްރާމް އެންމެ ފުރަތަމަ ފެށުމަށް ހަމަޖެހިފައިވަނީ “ޝުކުރުވެރިވުން” މި ތީމުންނެވެ.
ޕްރޮގްރާމްގެ މައިގަނޑު މަޤްޞަދުތައް:
- ދަރިވަރުން ދީނީ ވާޖިބުތަކަށާއި އަޚްލާޤީ ރިވެތި ސިފަތަކަށް އަހުލުވެރިކުރުވުން.
- އިޙްތިރާމްކުރުމާއި، ޒިންމާނެގުމާއި، ސާފުތާހިރުކަން ފަދަ މުހިންމު އާދަތައް ދަރިވަރުންގެ ކިބައިގައި އަށަގަންނެވުން.
- ނަމާދުކުރުމަށް ބާރުއެޅުމާއި، ކޮންމެ މަހެއްގެ ތީމާ ނަމާދާ ހުރި ގުޅުން ދަރިވަރުންނަށް އޮޅުންފިލުވައިދިނުން.
މި ޕްރޮގްރާމްގެ ދަށުން ކޮންމެ މަހަކުވެސް ކަނޑައެޅޭ ތީމް ތަޢާރަފްކުރުމަށް ޚާއްސަ އެސެމްބްލީއެއް ބާއްވަންޖެހޭނެއެވެ. އަދި ތީމާ ގުޅޭގޮތުން ވާހަކަދެއްކުމުގެ ފުރުޞަތު ދަރިވަރުންނަށް ފަހިކޮށްދިނުމުގެ އިތުރުން، ރަށު ފެންވަރުގައި ޕެނަލް ޑިސްކަޝަން ފަދަ ބޮޑެތި ހަރަކާތްތައް ކުރިއަށްގެންދަންޖެހޭނެ ކަމަށް މިނިސްޓްރީން ބުނެއެވެ.
މީގެ އިތުރުން، ސްކޫލްގެ އެކި މާއްދާތަކުގެ ތެރެއިން ތީމާ ގުޅޭ މަޢުލޫމާތާއި ހުނަރުތައް ދަރިވަރުންނަށް އުނގަންނައިދިނުމަށްވެސް ވަނީ ހަމަޖެހިފައެވެ. ކޮންމެ މަހެއް ފެށުމުގެ ކުރިން އެ މަހެއްގެ ތީމް އެޑިޔުކޭޝަން މިނިސްޓްރީން ސްކޫލްތަކަށް އަންގަމުންދާނެއެވެ. މި ޕްރޮގްރާމްގެ ސަބަބުން ދަރިވަރުންގެ ކިބައިގައި އޯގާތެރިކަމާއި ޒިންމާދާރުކަން ފަދަ ރީތި ސިފަތައް އަށަގަންނާނެ ކަމަށް މިނިސްޓްރީން އުންމީދު ކުރެއެވެ.