މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) އިން މުވައްޒަފުންގެ ސިއްހީ ދުޅަހެޔޮކަން އިތުރުކުރުމަށްޓަކައި "ސްޓްރެޗިން ޕްރޮގްރާމް" ރަސްމީކޮށް އިފުތިތާހުކޮށް، "ސްޓްރެޗް އެންޑް ވެލްނެސް"ގެ ނަމުގައި ހާއްސަ ފެއާއެއް މިއަދު ބާއްވައިފިއެވެ.
ހުޅުލޭގައި ކުރިއަށްދިޔަ މި ހަރަކާތަކީ މަސައްކަތުގެ މާހައުލުގައި މުވައްޒަފުންގެ ސިއްހަތަށް ހުރި ނުރައްކާތަކަށް ހޭލުންތެރިކުރުވުމަށް ބޭއްވި ހަރަކާތެކެވެ.
މި ފެއާގެ މައިގަނޑު މަގުސަދަކީ މަސައްކަތުގެ މާހައުލުގައި ދިމާވާ ސިއްހީ މައްސަލަތަކަށް ހޭލުންތެރިކަން އިތުރުކުރުމާއި، ދުޅަހެޔޮ ދިރިއުޅުމުގެ އާދަތަކަށް ބާރުއެޅުމެވެ. ހާއްސަކޮށް މަސްތަކާއި ކަށިތަކަށް ލިބޭ އަނިޔާތައް ކުރިއާލާ ދެނެގަނެ، އެފަދަ ކަންކަމުން ރައްކާތެރިވުމުގެ މުހިންމުކަން މުވައްޒަފުންނަށް ކިޔައިދިނުމަކީ މި ފެއާގެ މުހިންމު އެއް އަމާޒެވެ.
އެމްއޭސީއެލްގެ "ސްޓްރެޗިން ޕްރޮގްރާމް" އިފުތިތާހުކޮށް، ހާއްސަ ފެއާއެއް ބާއްވައިފި—ފޮޓޯ:އެމްއޭސީއެލް
މިއަދު އިފުތިތާހުކުރި "ސްޓްރެޗިން ޕްރޮގްރާމް" އަކީ މަސައްކަތުގެ މާހައުލުގައި، ހާއްސަކޮށް އޮޕަރޭޝަނަލް ދާއިރާތަކުގައި މަސައްކަތްކުރާ މުވައްޒަފުން ގަވާއިދުން ކަސްރަތުކުރުމާއި އަނިޔާއިން ރައްކާތެރިވުމުގެ އާދަތައް އަށަގެންނެވުމަށް ފެށި މުހިންމު މަސައްކަތެކެވެ. މި ޕްރޮގްރާމްގެ ސަބަބުން މުވައްޒަފުންގެ ޖިސްމާނީ ދުޅަހެޔޮކަމަށް ބޮޑު ކުރިއެރުމެއް ލިބޭނެ ކަމަށް އެމްއޭސީއެލް އިން އުންމީދު ކުރެއެވެ.
މި ފެއާ ކުރިއަށް ގެންގޮސްފައިވަނީ ސިއްހީ ދާއިރާގެ ގިނަ މުއައްސަސާތަކަކާ ގުޅިގެންނެވެ. އޭގެ ތެރޭގައި އޭޑީކޭ، ވެލްނެސް ކްލަބް މެނޭޖްޑް ބައި ހީޓް، ރިވައިވް ފިޓްނަސް، ފިޒިއޯ ސޮލިއުޝަންސް، އޭއެމްޑީސީ، ލެގަސީ ފިޓްނަސް، ޝީ، ތަސައްލީ މެޑިކަލް ކެއާ އަދި އެޗްޑީސީ ހިމެނެއެވެ.
އެމްއޭސީއެލްގެ "ސްޓްރެޗިން ޕްރޮގްރާމް" އިފުތިތާހުކޮށް، ހާއްސަ ފެއާއެއް ބާއްވައިފި—ފޮޓޯ:އެމްއޭސީއެލް
ފެއާގެ ތެރެއިން ތަފާތު ހަރަކާތްތަކެއް ވަނީ ކުރިއަށް ގެންގޮސްފައެވެ. އެގޮތުން ކޮމްބެޓް ފިޓްނެސް ސެޝަންއަކާއި ވޯކިން އެކްސަސައިޒް ދަސްކޮށްދޭ ސްޓޭޖް ހަރަކާތްތައް ހިމެނެއެވެ. މީގެ އިތުރުން، ފެއާގެ ބައިވެރިންނަށް ކަށިތަކާއި މަސްތަކުގެ ޓެސްޓުތައް ހިލޭ ހެދުމުގެ ފުރުސަތު ދީފައިވާއިރު، އެކި ހެލްތު ޕެކޭޖުތަކުންނާއި ފިޓްނަސް ޕްރޮގްރާމްތަކުން މުވައްޒަފުންނަށް ހާއްސަ ޑިސްކައުންޓްތަކެއް ވެސް ވަނީ ފޯރުކޮށްދީފައެވެ.