މިއަހަރުގެ މިހާތަނަށް ރާއްޖެއަށް 2 ލައްކައަށްވުރެ ގިނަ ފަތުރުވެރިން ޒިޔާރަތްކޮށްފައިވާ ކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ. މިއީ ރާއްޖޭގެ ފަތުރުވެރިކަމުގެ ތާރީޚުގައިވެސް އެންމެ އަވަހަށް 2 ލައްކަ ފަތުރުވެރިންގެ އަދަދު ހަމަވި އަހަރެވެ. މިދިޔަ އަހަރުގެ މި މުއްދަތާ އަޅާބަލާއިރު މިއީ 3.9 އިންސައްތައިގެ ކުރިއެރުމެކެވެ.
ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ މި މަހުގެ 11 ވަނަ ދުވަހުއެވެ. އެ ދުވަހު އެކަނިވެސް 9,596 ފަތުރުވެރިން ރާއްޖެއަށް އައިސްފައިވެއެވެ. މިހާރު ރާއްޖެއަށް އެވްރެޖްކޮށް ކޮންމެ ދުވަހަކު 7,171 ފަތުރުވެރިން ޒިޔާރަތްކުރާ ކަމަށްވެސް މި ތަފާސްހިސާބުތަކުން ދައްކައެވެ.
ރާއްޖެއަށް މިހާތަނަށް އެންމެ ގިނަ ފަތުރުވެރިން އައިސްފައިވަނީ ރަޝިއާ، އިޓަލީ އަދި ޗައިނާއިންނެވެ. މީގެ ތެރެއިންވެސް ޗައިނާ މާކެޓުން އަންނަ ފަތުރުވެރިންގެ އަދަދު ވަރަށް ބާރަށް އިތުރުވަމުންދާކަން ފާހަގަކުރެވެއެވެ.
އެންމެ ގިނައިން ފަތުރުވެރިން އައިސްފައިވާ 3 ޤައުމު:
1. ރަޝިއާ: 26,965 ފަތުރުވެރިން
2. އިޓަލީވިލާތް: 21,137 ފަތުރުވެރިން
3. ޗައިނާ: 18,531 ފަތުރުވެރިން
ފަތުރުވެރިން ރާއްޖެއަށް އެތެރެވި ގޮތަށް ބަލާއިރު، އެންމެ ގިނަ ފަތުރުވެރިން ޒިޔާރަތްކުރީ ވެލާނާ އިންޓަރނޭޝަނަލް އެއާޕޯޓުންނެވެ. އެ އެއާޕޯޓުން 198,329 ފަތުރުވެރިން އެތެރެވިިއިރު، ދެން އެންމެ ގިނައިން ފަތުރުވެރިން އައިސްފައިވަނީ މާފަރު އިންޓަރނޭޝަނަލް އެއާޕޯޓާއި ގަން އިންޓަރނޭޝަނަލް އެއާޕޯޓުންނެވެ.
ނިމިދިޔަ އަހަރަކީ 2.2 މިލިޔަން ފަތުރުވެރިންނާއެކު ރާއްޖޭގެ ފަތުރުވެރިކަމުގައި ރެކޯޑު އަހަރަކަށް ވާއިރު، މިއަހަރުގެ ފެށުން މިހާ ބާރުމިނެއްގައި ކުރިއަށް ދިއުމަކީ ފަތުރުވެރިކަމުގެ ދާއިރާއަށް ލިބޭ ވަރަށް ބޮޑު އުންމީދެކެވެ.