އައްޑޫ ސިޓީގެ ގަން އިންޓަނޭޝަނަލް އެއާޕޯޓަށް ބައިނަލްއަގުވާމީ ދެ އެއާލައިނެއް ކަމަށްވާ މެދުއިރުމަތީގެ އެއާލައިނަކާއި ޗައިނާގެ އެއާލައިންގެ ދަތުރުތައް ފެށުމަށްޓަކައި ސަރުކާރުން އަމަލީ މަސައްކަތްތަކެއް ފަށާފައިވާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީނު ހާމަކުރައްވައިފިއެވެ.
ވަޒީރު މިކަން ހާމަކުރެއްވީ ދެކުނުގެ ހަތަރު އަތޮޅެއްގެ މެދުގައި ގައުމީ އެއާލައިން މޯލްޑިވިއަން މެދުވެރިކޮށް ވައިގެ މަގުން ގުޅައިލުމުގެ އާ ވިއުގަ އިފުތިތާހުކުރުމަށް މިއަދު ގަން އެއާޕޯޓުގައި ބޭއްވި ރަސްމިއްޔާތުގައެވެ.
ވަޒީރު އަމީނު ވިދާޅުވީ، ގަން އެއާޕޯޓަކީ މީގެ ދިހަ އަހަރު ކުރިން ފެށިގެން ވެސް ބައިނަލްއަގުވާމީ ބޮޑެތި ފްލައިޓްތައް ޖެއްސުމުގެ ފަންނީ ގާބިލުކަން ހުރި ތަނެއް ނަމަވެސް، އެކަށީގެންވާ މާހައުލެއް މިހާތަނަށް އުފެއްދިފައި ނެތީ އެކަމަށް ކުރަންޖެހޭ މަސައްކަތްތައް މާޒީގައި އެންމެ ފުރިހަމައަށް ކުރެވިފައި ނުވުމުން ކަމަށެވެ. އަދި އެ ސަރަހައްދުގައި ފަތުރުވެރިކަން ކުރިއެރުވުމަށް އެކަށީގެންވާ މަސައްކަތްތަކެއް ކުރެވިފައި ނެތުމަކީ ވެސް ބައިނަލްއަގުވާމީ އެއާލައިންތައް ގެނައުމަށް އޮތް ހުރަހެއް ކަމަށް އޭނާ ފާހަގަކުރެއްވިއެވެ.
"މީގެ ކުރިން ވެސް އައްޑޫ އިންޓަނޭޝަނަލް އެއާޕޯޓްގައި ދެ ފަހަރެއްގެ މަތިން ދެކުނުގެ އަތޮޅުތައް ވައިގެ މަގުން ގުޅާލުމަށް ސީ ޕްލޭން އޮޕަރޭޝަންގެ މަސައްކަތްތަކެއް ވަނީ ކުރެވިފައި. އެ މަސައްކަތްތައް ސަސްޓެއިން ކުރެވިފައި ނުވުމާއި މި ވަގުތަށް އޮތް ޑިމާންޑަށް ބަލާއިރު އެންމެ އެކަށީގެންވާ އޮޕްޝަނަކީ ވައިގެ މަގުން ލޭންޑް ބޭސް ޝެޑިއުލް ކަނެކްޓިވިޓީއަކުން ގުޅާލުން." ވަޒީރު އަމީން
ސަރުކާރުގެ އަމާޒަކީ ގަން އެއާޕޯޓަކީ ރާއްޖޭގެ ދެކުނުގެ މައި "ހަބް" ކަމުގައި ހެދުންކަން ފާހަގަކުރައްވަމުން ވަޒީރު ވިދާޅުވީ، މިހާރު ވެސް މެދުއިރުމަތީގެ އެއާލައިނަކާއި ޗައިނާގެ އެއާލައިނެއް އެ އެއާޕޯޓަށް ގެނައުމަށް މަޝްވަރާ ކުރަމުންދާ ކަމަށެވެ.
"މި ވަގުތު ވެސް ސަރުކާރުން މި ގެންދަނީ މެދު އިރުމަތީގެ އެއާލައިންނަކާއި ޗައިނާގެ އެއާލައިނެއް އައްޑޫ އެއާޕޯޓަށް ގެނައުމަށް މަސައްކަތް ކުރަމުން. ބޮޑެތި ކޮންސެޝަންތަކެއް ދީގެން ނަމަވެސް އެ އެއާލައިންތައް މި އެއާޕޯޓަށް ގެންނަން އެބަޖެހޭ. މި އެއާޕޯޓްގެ ހާލަތު ބަދަލުކުރާނަން. މި އެއާޕޯޓަކީ އެއާލައިންތައް އަންނަ ރާއްޖޭގެ ސަދާން ހަބްކަމުގައި ހަދާނަން." ވަޒީރު އަމީން
މިއަދު އިފުތިތާހުކުރެވުނު ‘ސަދަން ކަނެކްޝަން، ވިއުގައިގެ ސަބަބުން އައްޑޫ، ފުވައްމުލައް އަދި ހުވަދޫ އަތޮޅުގެ ދަތުރުފަތުރުގެ ނިޒާމު ވަރުގަދަވެ، އެ ސަރަހައްދުގައި ހުރި 3،900 އެއްހައި ފަތުރުވެރި އެނދަށް ވާސިލުވުމުގެ ފުރުސަތު ފުޅާވެގެންދާނެއެވެ. މީގެ އިތުރުން، މިއީ ހަމައެކަނި ފަތުރުވެރިކަމަށް އަންނަ ބަދަލެއް ނޫން ކަމަށާއި، ތައުލީމާއި ސިއްހީ ފަރުވާ ފަދަ ޒަރޫރީ ބޭނުންތަކަށް ދަތުރުކުރާ ރައްޔިތުންނަށް ލިބޭނެ ވަރަށް ބޮޑު ލުޔެއް ކަމަށް ވެސް ވަޒީރު ފާހަގަކުރެއްވިއެވެ.
ވަޒީރުގެ ވާހަކަފުޅު ނިންމަވާލެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތަސައްވުރަކީ ހަމައެކަނި އެއާޕޯޓުތަކެއް ބިނާކުރުން ނޫން ކަމަށާއި، އެމަނިކުފާނުގެ އަމާޒަކީ މިފަދަ ވިއުގަތަކުން ރަށްތައް ގުޅާލައި، އޭގެ ސީދާ މަންފާ ރައްޔިތުންގެ ޖީބަށް ލިބޭނެ މަގު ފަހިކޮށްދިނުން ކަމަށް ވިދާޅުވަމުންނެވެ.