މިދިޔަ ޑިސެމްބަރު މަހު މާލޭގައި ހުންނަ ފެމިލީ ކޯޓުގައި 227 ކައިވެނި ކޮށްދީފައިވާއިރު، އެ މުއްދަތުގެ ތެރޭގައި 137 ވަރި ކޮށްދީފައިވާކަން އެ ކޯޓުގެ ތަފާސްހިސާބުތަކުން ދައްކައިފިއެވެ.
ފެމިލީ ކޯޓުން މިއަދު އާންމުކުރި ތަފާސްހިސާބުތަކަށް ބަލާއިރު، ޑިސެމްބަރު މަހު ވަރީގެ 163 އާ މައްސަލަ ކޯޓަށް ހުށަހަޅާފައިވެއެވެ. އަދި ކުރިން ހުށަހެޅިފައިވާ މައްސަލަތަކާއެކު ޖުމްލަ 176 މައްސަލައެއް އެ މަހު ވަނީ ނިންމާފައެވެ. ނަމަވެސް މަސް ނިމުނުއިރު ވަރިއާ ގުޅޭ 173 މައްސަލައެއް ނުނިމި ހުރިކަން ފާހަގަކުރެވެއެވެ.
ވަރީގެ މައްސަލަތަކަށް ބަލާލާއިރު،
- ވަރިވުމަށް އެދި ހުށަހެޅި މައްސަލަ: 79
- ވަރިކުރުމަށް އެދި ހުށަހެޅި މައްސަލަ: 35
- ވަރި ސާބިތުކުރުމަށް ހުށަހެޅި މައްސަލަ: 47
- ވަރިއާ މެދު ޝައްކުވެގެން ހުށަހެޅި މައްސަލަ: 2
ކުޑަކުދިންނާ ގުޅުންހުރި މައްސަލަތަކަށް ބަލާއިރު، ހަޟާނާތުގެ 6 މައްސަލައެއް ޑިސެމްބަރު މަހު ހުށަހަޅާފައިވެއެވެ. އަދި ކުއްޖާ އިހްތިޔާރުކުރާ ފަރާތެއް ކަނޑައެޅުމުގެ 4 މައްސަލައެއް ހުށަހެޅިއިރު، އޭގެ ތެރެއިން 2 މައްސަލަ ވަނީ ނިންމާފައެވެ. މި ބާވަތުގެ 14 މައްސަލައެއް އަދިވެސް ކޯޓުގައި ދަނީ ހިނގަމުންނެވެ.
މީގެ އިތުރުން، ދަރިން ނުދެއްކުމުގެ އެއް މައްސަލަ މިދިޔަ މަހު ހުށަހެޅުނު ނަމަވެސް، ކުރިން ހުށަހެޅިފައިވާ މައްސަލަތަކާއެކު ޖުމްލަ 3 މައްސަލައެއް ވަނީ ނިންމާފައެވެ. ދަރިން ނުދެއްކުމުގެ 13 މައްސަލައެއް ނުނިމި ހުރިކަމަށްވެސް ފެމިލީ ކޯޓުގެ ތަފާސްހިސާބުތަކުން ދައްކައެވެ.