ޕީޕަލްސް ނޭޝަނަލް ކޮންގުރެސް (ޕީއެންސީ) ގެ ފަރާތުން ފުވައްމުލަކު ސިޓީ ކައުންސިލަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ވާދަކުރައްވާ ކެންޑިޑޭޓުންނަކީ ވަރަށް ގާބިލު ބައެއް ކަމަށާއި، އެ ކެންޑިޑޭޓުންނާމެދު އެއްވެސް ޝައްކެއް ނެތް ކަމަށް އެ ޕާޓީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ފަލާހު ވިދާޅުވެއްޖެއެވެ.
ފުވައްމުލަކުގައި ބޭއްވި ކެމްޕެއިން ޖަލްސާއެއްގައި ވާހަކަދައްކަވަމުން ފަލާހު ފާހަގަކުރެއްވީ ޕީއެންސީގެ ކެންޑިޑޭޓުންނަކީ ސަރުކާރާ ގުޅިގެން ސިޓީގެ ތަރައްގީއަށް މަސައްކަތްކުރާނެ ގޮތުގެ ސާފު ތަސައްވުރެއް އޮތް ބައެއް ކަމަށެވެ.
ޕީއެންސީއަކީ ރާއްޖޭގެ އެންމެ ބޮޑު ޕާޓީކަން ފާހަގަކުރައްވައި، ފަލާހު ވިދާޅުވީ ކުރިއަށް އޮތް ލޯކަލް ކައުންސިލު އިންތިހާބުގައި އެންމެ ގިނަ ކެންޑިޑޭޓުން ނެރެފައިވަނީވެސް އެ ޕާޓީން ކަމަށެވެ. އެގޮތުން އެ ޕާޓީގައި މިހާރު 75,000 އަށްވުރެ ގިނަ މެންބަރުން އެބަތިބި ކަމަށާއި، ރާއްޖޭގެ ހުރިހާ ހިސާބަކުން ރައްޔިތުންނަށް ހިދުމަތް ކުރުމަށް އެންމެ ގާބިލު ބޭފުޅުން ނިކުމެ ތިބީ ޕީއެންސީގެ ޓިކެޓުގައި ކަމަށް އޭނާ ވިދާޅުވިއެވެ.
އެމްޑީޕީގެ ވެރިކަމުގައި ކައުންސިލުތަކުގެ ޒިންމާދާރުކަން ކުޑަވުމުގެ ސަބަބުން ތަރައްގީގެ މަޝްރޫއުތައް ފެންވަރު ދަށްކޮށް ހިންގާފައިވާ ކަމަށް ވިދާޅުވެ، ފަލާހު ވަނީ އެކަމަށް ވަރަށް ބޮޑަށް ފާޑުވިދާޅުވެފައެވެ. މިސާލެއްގެ ގޮތުން ރ. އަތޮޅުގެ ބައެއް ރަށްރަށުގެ ފެނާއި ނަރުދަމާގެ ނިޒާމުތައް ބޭނުންކުރަން ނުފަށަނީސް ހަލާކުވެފައިވާކަން ފާހަގަކުރައްވައި، އެއީ ރައްޔިތުންނާ ގުޅުމެއް ނެތް ކައުންސިލަރުން ހޮވުމުގެ ނަތީޖާ ކަމަށް އޭނާ ތުހުމަތު ކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަކީ ކަންކަން ރަނގަޅަށް ރާވައި، ބަޖެޓު ހަމަޖައްސައިގެން މަސައްކަތްކުރާ ސަރުކާރެއްކަން ފަލާހު ފާހަގަކުރެއްވިއެވެ. ކުރީ ސަރުކާރުން ފަށާފައިވާ މަޝްރޫއުތަކަށް ބޭނުންވާ ފައިސާ ހޯދާފައި ނެތް ނަމަވެސް، މި ސަރުކާރުން އެ މަޝްރޫއުތައް ނިންމުމަށް އިސްކަންދޭނެ ކަމުގެ ޔަގީންކަން އޭނާ ދެއްވިއެވެ.
ފަލާހު އިތުރަށް ވިދާޅުވީ ރައީސް ޑރ މުޢިއްޒުގެ ވައުދުފުޅުތައް ބާރު ދުވެލީގައި ފުރިހަމަކުރުމަށްޓަކައި، ސަރުކާރަށް އެއްބާރުލުންދޭނެ ކެންޑިޑޭޓުން އިންތިހާބުކުރުން މުހިންމު ކަމަށެވެ. އެހެންކަމުން، ހުރިހާ ސިޓީތަކެއްގެ މޭޔަރުންނާއި ކައުންސިލަރުންގެ މަގާމުތަކަށް ޕީއެންސީގެ ކެންޑިޑޭޓުން އިންތިހާބުކޮށްދެއްވުމަށް އޭނާ ރައްޔިތުންގެ ކިބައިން އެދިވަޑައިގަތެވެ.