ކުރިއަށް އޮތް ލޯކަލް ކައުންސިލު އިންތިހާބުގައި ތ. ވިލުފުށިން އިންތިހާބުކުރަންޖެހޭ ދިހަ ގޮނޑީގެ ތެރެއިން އަށް ގޮނޑި، ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވޯޓު ނެގުމަކާ ނުލައި ކާމިޔާބުވެއްޖެއެވެ.
ވިލުފުށީގައި އިންތިހާބުކުރަންޖެހެނީ ކައުންސިލުގެ ރައީސާއި ކައުންސިލުގެ ހަތަރު މެންބަރުންގެ އިތުރުން، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާއާއި އެ ކޮމިޓީގެ ހަތަރު މެންބަރުންނެވެ. މީގެ ތެރެއިން ކައުންސިލުގެ ހަތަރު މެންބަރުންގެ ގޮނޑިއާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ހަތަރު މެންބަރުންގެ ގޮނޑިއަށް ޕީއެންސީގެ ކެންޑިޑޭޓުން ފިޔަވައި އިތުރު ބޭފުޅަކު ކުރިމަތިލައްވާފައި ނުވާތީ، އެ އަށް ގޮނޑި ވަނީ އެ ޕާޓީއަށް ކަށަވަރުވެފައެވެ.
އިންތިހާބުގައި ވޯޓުލުން ކުރިއަށްދާނީ ކައުންސިލުގެ ރައީސްގެ މަގާމަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާގެ މަގާމަށެވެ. އެ ދެ މަގާމަށް ޕީއެންސީގެ ކެންޑިޑޭޓުންގެ އިތުރުން މިނިވަން ދެ ކެންޑިޑޭޓުން ވާދަކުރައްވައެވެ.
މި ކާމިޔާބީއާ ގުޅިގެން ވިލުފުށީ ދާއިރާގެ މަޖިލިސް މެންބަރު ހަސަން ވަހީދު ވިދާޅުވީ، ވިލުފުށްޓަކީ އެމްޑީޕީގެ ތާއީދު ބޮޑު ރަށެއް ނަމަވެސް، ރަށުގެ ތަރައްގީއަށް ހުރަސްއަޅަން ބޭނުންނުވާތީ އެމްޑީޕީން ކެންޑިޑޭޓުން ނުނެރެން ނިންމީ ކަމަށެވެ.
“މި ކާމިޔާބަކީ އެ ރަށުގެ ތަރައްގީއަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވާފައިވާ މަސައްކަތްޕުޅުތަކަށްޓަކައި އެ ރަށުގެ ރައްޔިތުން އެމަނިކުފާނަށް އަރުވާ ހަދިޔާއެއް،” ހަސަން ވަހީދު ވިދާޅުވިއެވެ.
ރައީސް ޑރ. މުޢިއްޒުގެ ސަރުކާރުން ވިލުފުށީގައި އެއާޕޯޓު އެޅުމުގެ މަޝްރޫއުގެ އިތުރުން، ރަށަށް ބޭނުންވެފައިވާ އުމްރާނީ ތަރައްގީގެ ގިނަ މަސައްކަތްތަކެއް މިހާރުވެސް އަންނަނީ ކުރިއަށް ގެންދަމުންނެވެ.