ކުޑަކުދިންގެ ނާޖާއިޒު ފައިދާ ނަގައި، އެކުދިން ލައްވައި އެކި ބާވަތުގެ ކުށްތައް ކުރުވާ ފަރާތްތަކާ މެދު އެއްވެސް ދޫދިނުމެއް ނެތި، ޤާނޫނުގައި ކަނޑައެޅިފައިވާ އެންމެ ހަރުކަށި އަދަބު ދިނުމަށް މަސައްކަތް ކުރައްވާނެ ކަމަށް ކޮމިޝަނަރ އޮފް ޕޮލިސް އިސްމާޢިލް ނަވީން ވިދާޅުވެއްޖެއެވެ.
ސީޕީ ނަވީން މިފަދައިން ވިދާޅުވީ، 16 އަހަރުގެ ކުޑަކުއްޖަކު ބޭނުންކޮށްގެން މަސްތުވާތަކެތި އުފުލި މައްސަލައެއްގައި ދެ މީހަކު ހައްޔަރުކުރުމާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ. ކޮމިޝަނަރ ފާހަގަކުރެއްވި ގޮތުގައި، ކުޑަކުދިންނަށް ރައްކާތެރި މާހައުލެއް ބިނާކޮށްދީ، އެކުދިންގެ ޙައްޤުތައް ހިމާޔަތްކުރުމަކީ ދައުލަތުގެ އެންމެ އިސް އެއް ވާޖިބެވެ. މީގެއިތުރުން، މިއީ މުޅި މުޖުތަމައު ގުޅިގެން އުފުލަންޖެހޭ އިޖުތިމާއީ ޒިންމާއެއްކަން ފާހަގަކުރައްވައި، ކުދިންގެ ސަލާމަތަށް އެންމެން އެކުގައި މަސައްކަތް ކުރުމަށް ސީޕީ ވަނީ ގޮވާލައްވާފައެވެ.
މައްސަލައިގައި ހައްޔަރުކުރި މީހުން:
- ހަސަން ނުއާޒު (28އ): މާލެއަށް ނިސްބަތްވާ މީހެއް.
- އަހުމަދު ނައީމް (39އ): މާލެއަށް ނިސްބަތްވާ މީހެއް.
މި ދެ މީހުން ހައްޔަރުކޮށްފައިވަނީ ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަނާއި، ޑްރަގް އެންފޯސްމަންޓް އަދި ކައުންޓަރ ނާކޮޓިކްސް އިންޓެލިޖަންސް ގުޅިގެން މާލޭގައި ހިންގި ޚާއްޞަ އޮޕަރޭޝަނެއްގައެވެ. މި މީހުން ކޯޓަށް ހާޒިރުކުރުމުން، ބަންދުގެ މުއްދަތަށް މިހާރު ވަނީ 15 ދުވަސް އިތުރުކޮށްފައެވެ.
ފުލުހުންގެ އިދާރާއިން ހާމަކުރި ގޮތުގައި، ކުޑަކުދިން “ގްރޫމް” ކޮށްގެން ނުވަތަ އެކުދިންނަށް މަޖުބޫރުކޮށްގެން މަސްތުވާތަކެތީގެ ވިޔަފާރިއާއި، ގޭންގް ކުށްތަކާއި، ޖިންސީ ގޯނާގެ އަމަލުތަކުގައި ބައިވެރިކުރުވާ ފަރާތްތަކުގެ މައްސަލަތައް ބެލުމަށް ޚާއްޞަ އިސްކަމެއް ދެވޭނެއެވެ.
މިފަދަ ނުރައްކާތެރި އަމަލުތައް ހިންގާ ފަރާތްތަކާ ބެހޭ އެއްވެސް މަޢުލޫމާތެއް ލިބިފައިވާނަމަ، ފެމިލީ އެންޑް ޗައިލްޑް ޕްރޮޓެކްޝަންގެ ނަންބަރު 9790163 އަށް ނުވަތަ އިމަޖެންސީ ނަންބަރު 911 އަށް ގުޅުއްވައި އެކަން ހިއްސާކުރުމަށް ފުލުހުން ވަނީ އިލްތިމާސްކުރައްވާފައެވެ.