އދ. ދިގުރަށުގެ މަގުތައް ހެދުމުގެ މަޝްރޫއު ކުރިއަށްގެންދާއިރު، އެ ރަށުގެ ރައްޔިތުންގެ އެދުމުގެ މަތިން ތާރު އެޅުމުގެ ބަދަލުގައި ތިމާވެށްޓާ ގުޅޭނެފަދަ ގޮތަކަށް ތަރައްގީކުރުމަށް ނިންމާފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިން ޑިރެކްޓަރު އިބްރާހިމް ނަޘީމް ވިދާޅުވެއްޖެއެވެ.
ދައުލަތުގެ މީޑިއާގެ “އަހާށޭ ބުނާނަން” ޕްރޮގްރާމުގައި ވާހަކަދައްކަވަމުން އާރްޑީސީގެ މެނޭޖިން ޑިރެކްޓަރު އިބްރާހިމް ނަޘީމް ވިދާޅުވީ، ދިގުރަށުގެ މަސައްކަތް ލަސްވެގެން ދިޔައީ ރާއްޖޭގައި މިހާތަނަށް އާންމުކޮށް މަގު ހަދަމުން އައި ކޮންސެޕްޓް މުޅިން ބަދަލުކޮށް، އާ ކޮންސެޕްޓެއް އެކުލަވާލަން ޖެހުމުން ކަމަށެވެ. މި މަޝްރޫއުގެ ދަށުން މަގުތަކުގައި ތާރު ނޭޅި ނަމަވެސް، ފެންބޮޑުވާ މައްސަލައަށް ހައްލެއް ހޯދުމަށްޓަކައި ސްޓޯމް ވޯޓާ ސިސްޓަމެއް ގާއިމުކުރެވޭނެ ކަމަށް އޭނާ ވިދާޅުވިއެވެ.
ނަޘީމް ވިދާޅުވި ގޮތުގައި، ދިގުރަށަކީ ފަތުރުވެރިކަމަށް ހާއްސަ ރަށަކަށް ވެފައި، ރަށުގެ ގުދުރަތީ މާހައުލު ހިފެހެއްޓުމަށް ރައްޔިތުން ބޭނުންވާތީ، މި މަސައްކަތަކީ ރާއްޖޭގައި މިހާތަނަށް މިގޮތަށް ކުރެވޭ ފުރަތަމަ މަސައްކަތެވެ. “އަޅުގަނޑުމެންނަށް މި ޖެހުނީ މުޅި އެތި އެއްކޮށް އަޅުގަނޑުމެން މިހާރު އާއްމުކޮށް މި ގެންދާ ކޮންސެޕްޓް އެއްކޮށް ބަދަލުކޮށްފައި އާ ކޮންސެޕްޓެއް ޑިވެލޮޕްކުރަން، އެހެންވީމަ އެކަމަށް ވަރަށް ގިނަ ވަގުތު ނަގައިފި،” ނަޘީމް ވިދާޅުވިއެވެ.
މި ކޮންސެޕްޓް އެކުލަވާލުމުގައި ކޮންސްޓްރަކްޝަން މިނިސްޓްރީގެ އިންޖިނޭރުންނާއި އާރްޑީސީގެ ޓީމުން ގިނަ ތަހުލީލުތަކެއް ކޮށްފައިވާ ކަމަށާއި، މިހާރު އެ ކޮންސެޕްޓް ފައިނަލް ކުރެވިފައިވާ ކަމަށް އޭނާ ފާހަގަކުރެއްވިއެވެ. އަދި މިހާރު މަސައްކަތް އޮތީ ތިމާވެށީގެ އަސަރު ދެނެގަންނަ ރިޕޯޓް (އީއައިއޭ) ފާސްކުރުމުގެ މަރުހަލާގައި ކަމަށާއި، އެ ހުއްދަ ލިބުނުހާ އަވަހަކަށް އަމަލީ މަސައްކަތް ފެށޭނެ ކަމަށްވެސް ވިދާޅުވިއެވެ.
އާރްޑީސީގެ އެމްޑީ އިތުރަށް ވިދާޅުވީ، ކުދި އާބާދީތައް ދިރިއުޅޭ ރަށްރަށުގައި ގަލަށް ނުވަތަ ތާރަށް ދިއުމުގެ ބަދަލުގައި، ރަށްފުށުވަންތަ ގޮތް ދެމެހެއްޓޭނެ މިފަދަ ކޮންސެޕްޓްތަކަށް ރައްޔިތުން ތާއީދުކުރުމަކީ އެދޭ ކަމެއް ކަމަށެވެ. މި މަޝްރޫއު ނިމިގެންދާއިރު ދިގުރަށުން ފެންނާނީ ވަރަށް “ޗާލު” އަދި ރީތި މަގުތަކެއް ކަމުގެ ޔަގީންކަން އޭނާ ދެއްވިއެވެ.
ދިގުރަށުގެ މަގުތައް ހެދުމާއި ސްކޫލްގެ އާ އިމާރާތުގެ މަސައްކަތް އާރްޑީސީއާ ހަވާލުކޮށްފައިވަނީ މިދިޔަ އަހަރުގެ އޮކްޓޫބަރު މަހުގެ ތެރޭގައެވެ. މި މަޝްރޫއަކީ ރާއްޖޭގެ ރަށްތަކުގެ ގުދުރަތީ ރީތިކަން ނުގެއްލޭނެހެން އުމުރާނީ ތަރައްގީ ގެނައުމަށް އެޅޭ މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.