ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އައްޑޫ ސިޓީއަކީ އައިޓީ ހަބެއްގެ ގޮތުގައި ތަރައްގީކުރައްވާނެ ކަމަށާއި، އެ ސިޓީގައި ކުދި އަދި މެދު ފަންތީގެ އިންވެސްޓްމަންޓްތަކަށް ހާއްސަ ލުއިތަކެއް ދެއްވާނެ ކަމަށް ވިދާޅުވެއްޖެއެވެ.
ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވީ، ލުއިތަކާއެކު ފުރުޞަތުތައް ހުޅުވާލާއިރު، ބިމު ކުއްޔާއި އިންކަމް ޓެކްސް ފަދަ ސިދާ ވިޔަފާރިތަކުން ދައުލަތަށް ދައްކާ ކުއްޔާއި ޓެކްސް ނުދައްކާ ގޮތަށް ހަމަޖެއްސުމުގެ އިތުރުން، އެހެނިހެން އިންސެންޓިވްތައް ދިނުން ހިމެނޭނެ ކަމަށެވެ
މިގޮތުން 1 ޖެނުއަރީ 2027 އިން ފެށިގެން ތިން އަހަރު ދުވަހުގެ މުއްދަތަށް އައްޑޫ ސިޓީގައި ކުރާ އިންވެސްޓްމަންޓްތަކުން ބިމު ކުއްޔާއި އިންކަމް ޓެކްސް ފަދަ ފީތަކުން އިސްތިސްނާވާނެ ގޮތް ހަމަޖައްސަވާނެ ކަމަށް ރައީސް ވިދާޅުވިއެވެ.
މި މަޝްރޫއުގެ މަގްސަދަކީ ކުދި އަދި މެދު ފަންތީގެ ސިނާއަތްތައް ފުޅާކޮށް، ގިނަ އަދަދެއްގެ ވަޒީފާގެ ފުރުސަތުތައް އުފައްދައި، އައްޑޫ ސިޓީއާއި މުޅި ރާއްޖޭގެ އިގްތިސޯދަށް ކުރިއެރުން ހޯދައިދިނުމެވެ. މިކަމަށް ބޭނުންވާ ގާނޫނީ އަދި އިދާރީ އޮނިގަނޑު މިއަހަރުގެ ތެރޭގައި ފުރިހަމަކުރައްވާނެ ކަމަށްވެސް ރައީސް ފާހަގަކުރެއްވިއެވެ.
މީގެ އިތުރުން، ކުދި އަދި މެދު ފަންތީގެ ވިޔަފާރިތަކަށް ފައިނޭންސް ހޯދައިދިނުމަށް ސަރުކާރުން ކުރަމުންދާ މަސައްކަތްތަކުގެ ތަފްސީލް ރައީސް ހިއްސާކުރެއްވިއެވެ. އޭގެ ތެރޭގައި ރަށު ފަތުރުވެރިކަމަށް ހާއްސަ "ތިޖާރާ ރަށު ފަތުރު" ސްކީމާއި، ކަނޑުއުޅަނދުފަހަރަށް ހާއްސަ "ވެސަލް ފައިނޭންސިން" އަދި ކޮންޓެންޓް ކްރިއޭޓަރުންނާއި އަންހެން ވިޔަފާރިވެރިންނަށް ހާއްސަ ފައިނޭންސިން ފެސިލިޓީތައް ހިމެނެއެވެ.