ތަރައްގީއަކީ ރައްޔިތުންގެ ޖީބަށް ވަންނަ ފައިސާ އިތުރުވެ، އަމިއްލަ ރަށުގައި ތިބެގެން ވަޒީފާ އަދާކުރެވޭނެ މަގު ފަހިވުން ކަމަށް ކުޅުދުއްފުށި ސިޓީގެ މޭޔަރުކަމަށް ޕީއެންސީގެ ފަރާތުން ވާދަކުރައްވާ އިބްރާހިމް ހަސަން (ކުޑަ އިއްބެ) ވިދާޅުވެއްޖެއެވެ. އޭނާ މިހެން ވިދާޅުވީ ކުޅުދުއްފުށި ސިޓީގެ މޭޔަރުކަމަށް ވާދަކުރެއްވުމަށް ބޭއްވި ކެމްޕެއިން ލޯންޗުކުރުމުގެ ރަސްމިއްޔާތުގައި ވާހަކަދައްކަވަމުންނެވެ.
މި ރަސްމިއްޔާތުގައި ވާހަކަދައްކަވަމުން އިބްރާހިމް ހަސަން ވަނީ ރައްޔިތުންނަށް “ހަގީގީ ތަރައްގީ” ގެނެސްދިނުމުގެ މުހިންމުކަމަށް އަލިއަޅުއްވާލައްވާފައެވެ. އޭނާ ވިދާޅުވި ގޮތުގައި ތަރައްގީގެ މާނައަކީ ހަމައެކަނި އުމްރާނީ ވަސީލަތްތަކެއް ގާއިމުކުރުމެއް ނޫނެވެ. އޭގެ ބަދަލުގައި ރައްޔިތުންގެ އަމިއްލަ ރަށުގައި ތިބެގެން އާމްދަނީ ހޯދޭނެ މަގުތައް ތަނަވަސްވުމަކީ ތަރައްގީގެ މުހިންމު ބައެއް ކަމަށް ކުޑަ އިއްބެ ފާހަގަކުރެއްވިއެވެ.
އިއްބެގެ މައިގަނޑު އަމާޒުތަކުގެ ތެރޭގައި ކުޅުދުއްފުށި ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުން ހިމެނެއެވެ. މީގެ އިތުރުން، މުޅި ބޮޑު ތިލަދުންމައްޗަށް ބޭނުންވާ ސިއްހީ ނިޒާމު މިހާރަށްވުރެ ބޮޑަށް ހަރުދަނާކޮށް، ފެންވަރު ރަނގަޅު ހިދުމަތްތަކެއް ރައްޔިތުންނަށް ފޯރުކޮށްދިނުމަކީ އޭނާގެ މުހިންމު ވައުދެކެވެ.
ކުޅުދިއްފުށީ ސިޓީގެ ގުދުރަތީ ވަސީލަތްތަކާ ގުޅޭގޮތުން ވާހަކަދައްކަވަމުން އިއްބެ ވިދާޅުވީ، ކުޅުދުއްފުށީގެ ގުދުރަތީ ވަސީލަތްތަކުން ލިބޭ ފައިދާ ހުރިހާ ރައްޔިތުންނަށް ހަމަހަމަކަމާއެކު ލިބެންޖެހޭނެ ކަމަށެވެ. މިއީ ސިޓީގެ އިގްތިސާދު ކުރިއެރުވުމަށްޓަކައި ކޮންމެހެން ކުރަންޖެހޭ ކަމެއްގެ ގޮތުގައި އޭނާ ސިފަކުރެއްވިއެވެ.
މީގެ ކުރިން ސިޓީ ކައުންސިލުން ކޮށްފައިވާ މަސައްކަތްތަކަށް ފާޑުވިދާޅުވަމުން އިއްބެ ވިދާޅުވީ، ވޭތުވެދިޔަ ދައުރުތަކުގައި ރައްޔިތުންގެ އިގްތިސާދީ ފުދުންތެރިކަން އިތުރުކުރުމަށް އެކަށީގެންވާ މަސައްކަތްތަކެއް ކުރެވިފައި ނުވާ ކަމަށެވެ.
“ހާއްސަކޮށް ހޯމްސްޓޭ ފަދަ ސިޔާސަތުތަކުން ރައްޔިތުންނަށް އެދެވޭ ނަތީޖާއެއް ފެނިފައި ނުވޭ،” އިއްބެ
އިއްބެގެ ވާހަކަ ނިންމާލަމުން ވިދާޅުވީ، އޭނާގެ މަގްސަދަކީ ކުޅުދުއްފުށި ސިޓީއަކީ އިގްތިސާދީ ގޮތުން ބާރުވެރި، ރައްޔިތުންނަށް އުފާވެރި ދިރިއުޅުމެއް އުޅެވޭނެ ތަނަކަށް ހެދުން ކަމަށެވެ.