ރައްޔިތުންގެ ކަންބޮޑުވުންތަކާއި ޝަކުވާތައް ކޮންމެ ވަގުތަކު ވެސް ހުށަހެޅޭނެ އިންތިޒާމު ހަމަޖެއްސުމަށްޓަކައި، ރައީސުލްޖުމްހޫރިއްޔާގެ އޮފީހުގައި ޚާއްސަ ބިއުރޯއެއް ގާއިމުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ. ރައީސުލްޖުމްހޫރިއްޔާ މިކަން ހާމަކުރެއްވީ މިއަދު އިއްވެވި ރިޔާސީ ބަޔާނުގައެވެ.
ރައީސް ވިދާޅުވި ގޮތުގައި "ސިޓިޒަންސް ކޮމްޕްލެއިންޓްސް ބިއުރޯ" ގެ ނަމުގައި އުފައްދާ މި އިދާރާގެ މައިގަނޑު މަގުސަދަކީ ރައްޔިތުންނާ ގާތުން މަސައްކަތްކޮށް، ރައްޔިތުންގެ އަޑުއަހާ ސަރުކާރަކަށް މި ސަރުކާރު ހެދުމެވެ. މި ބިއުރޯ މެދުވެރިކޮށް ސިޓީ، އީމެއިލް، ފޯނު، ރައްޔިތުންގެ އަޑު، ޖެމްސް މެސެޖިންގ އަދި ސޯޝަލް މީޑިއާ ފަދަ ވަސީލަތްތަކުން ހުށަހަޅާ ޝަކުވާތައް ބަލައިގަންނާނެއެވެ.
މި ބިއުރޯގައި ޝަކުވާތައް މެނޭޖުކުރުމަށް ބޭނުންކުރާނީ އާޓިފިޝަލް އިންޓެލިޖެންސް (AI) އެކުލެވޭ ޒަމާނީ ޑިޖިޓަލް ނިޒާމެކެވެ. މި ސިސްޓަމްގެ ތެރެއިން ކޮންމެ ޝަކުވާއަކަށް ޓިކެޓެއް ރެއިސް ކުރެވި، އެ މައްސަލައަކަށް ޖަވާބު ލިބެންދެން މައްސަލަ ކުރިއަށްދާ ގޮތް ރައްޔިތުންނަށް ޓްރެކް ކުރެވޭނެ އިންތިޒާމު ހަމަޖެހިފައި ހުންނާނެއެވެ.
މީގެ އިތުރުން، ސަރުކާރުގެ ވަކިވަކި އިދާރާތަކަށް ހުށަހެޅޭ ޝަކުވާތައްވެސް އެއް ނިޒާމެއްގެ ތެރެއިން ބަލައި، އެ ތަންތަން ޒިންމާދާރުކުރުވާ "އޯވަރއަރޗިންގ" އިދާރާއެއްގެ ގޮތުގައި މި ބިއުރޯ ހަރަކާތްތެރިވާނެ ކަމަށް ރައީސް ވިދާޅުވިއެވެ. މިއީ ސަރުކާރުގެ ހިންގުން ހަރުދަނާކޮށް، ޖަވާބުދާރީވުން އިތުރުކުރުމަށް އެޅޭ މުހިންމު ފިޔަވަޅެކެވެ.
މި ބިއުރޯއަށް އާ މުވައްޒަފުން އައްޔަންކުރުމުގެ ބަދަލުގައި، ރައީސް އޮފީހާއި އެކި އިދާރާތަކުގައި މިހާރުވެސް ތިބި ގާބިލު މުވައްޒަފުން މި މަސައްކަތަށް ބަދަލުކުރުމަށް ވަނީ ނިންމާފައެވެ. މި މުވައްޒަފުންނަށް ބޭނުންވާ ފުރިހަމަ ތަމްރީންތައް މިހާރު ދެމުންދާ ކަމަށް ރައީސުލްޖުމްހޫރިއްޔާ ފާހަގަކުރެއްވިއެވެ.
ރައީސް މުޢިއްޒު ވިދާޅުވި ގޮތުގައި، މި އާ އިދާރާގެ ޚިދުމަތްތައް ކުރިއަށް އޮތް ފަސް މަސްދުވަހުގެ ތެރޭގައި ރަސްމީކޮށް ފެށިގެންދާނެއެވެ. މިއީ ރައްޔިތުންގެ ޝަކުވާތަކަށް އަވަސް އަދި ހަރުދަނާ ހައްލެއް ހޯދައިދިނުމަށް ސަރުކާރުން ކުރާ މުހިންމު މަސައްކަތެކެވެ.