ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާން ކުރެއްވި "ވަތަނީ ހިދުމަތް" ޕްރޮގްރާމަށް ގާނޫނީ ބާރު ދިނުމަށްޓަކައި ހުށަހަޅާ ބިލާއެކު، ރައްޔިތުންގެ މަޖިލީހުގެ މިއަހަރުގެ އާންމު ޖަލްސާތައް މާދަމާ ފެށުމަށް ތައްޔާރުވެއްޖެއެވެ. މިއީ މިދިޔަ ބުރާސްފަތި ދުވަހު ރައީސުލްޖުމްހޫރިއްޔާ ރިޔާސީ ބަޔާން އިއްވެވުމަށްފަހު ބާއްވާ މިއަހަރުގެ ފުރަތަމަ އާންމު ޖަލްސާއެވެ.
މާދަމާގެ ޖަލްސާއަށް އެޖެންޑާކޮށްފައިވާ އެންމެ މުހިންމު އެއް މަސައްކަތަކީ ސަރުކާރުގެ ފަރާތުން ކުޅުދުއްފުށީ ދެކުނު ދާއިރާގެ މެންބަރު ފަރުހަތު މުހައްމަދު ހުށަހަޅުއްވާ "ވަތަނީ ހިދުމަތުގެ ބިލް" ތައާރަފް ކުރުމެވެ. މި ބިލުގެ މައިގަނޑު މަގްސަދަކީ ދައުލަތުގެ ޔުނީފޯމް އެޅި ހިދުމަތްތަކާއި އެނޫންވެސް ދާއިރާތަކުން ގައުމަށް ހިދުމަތް ކުރަން ބޭނުންވާ ޒުވާނުންނަށް އެ ފުރުސަތު ފަހިކޮށްދީ، ޖިސްމާނީ އަދި ފަންނީ ގޮތުން ގާބިލް ޖީލެއް ބިނާކުރުމެވެ.
މި ބިލްގައިވާ ގޮތުން، ވަތަނީ ހިދުމަތުގެ ޕްރޮގްރާމް ހިންގާނީ ހަރުދަނާ ގާނޫނީ އޮނިގަނޑެއްގެ ދަށުންނެވެ. މި ޕްރޮގްރާމްގެ ދަށުން ބައިވެރިންނަށް ބޭނުންވާ ތައުލީމާއި ތަމްރީނު ފޯރުކޮށްދިނުމުގެ އުސޫލުތަކާއި، ޕްރޮގްރާމް ފުރިހަމަކުރާ ޒުވާނުންނަށް ލިބޭނެ ހާއްސަ ފުރުސަތުތައް ބިލްގައި ވަނީ ބަޔާންކޮށްފައެވެ. ފާހަގަކޮށްލެވޭ ގޮތުގައި މި ޕްރޮގްރާމްގެ ފުރަތަމަ ބުރު މިދިޔަ އަހަރު ވަނީ ކާމިޔާބުކަމާއެކު ކުރިއަށް ގެންގޮސްފައެވެ.
ވަތަނީ ހިދުމަތުގެ ބިލުގެ އިތުރުން، މާދަމާގެ ޖަލްސާގައި އިލެކްޝަންސް ކޮމިޝަނަށް މެންބަރަކު އައްޔަންކުރުމުގެ މައްސަލަ ދިރާސާކުރުމަށް ކޮމިޓީއަށް ފޮނުވުން އެޖެންޑާކޮށްފައިވެއެވެ. އަދި ރިޕަބްލިކް އޮފް ސާބިޔާއަށާއި މޯލްޓާއަށް ރާއްޖޭން ކަނޑައަޅާ ނޮން-ރެސިޑެންޓް ސަފީރުން އައްޔަންކުރުމުގެ މައްސަލަވެސް ކަމާގުޅޭ ދާއިމީ ކޮމިޓީއަށް ފޮނުވުމަށް ވަނީ ހަމަޖެހިފައެވެ.
މި ޖަލްސާއާއެކު މަޖިލީހުގެ މިއަހަރުގެ ފުރަތަމަ ދައުރުގެ މަސައްކަތްތައް ރަސްމީކޮށް ފެށިގެންދާނެއެވެ. ސަރުކާރުން އަމާޒު ހިފާފައިވަނީ މި ބިލުގެ ސަބަބުން ޒުވާނުން ބާރުވެރިކުރުވައި، ގައުމީ ލޯބި އަށަގަނެފައިވާ ފައިދާހުރި ޖީލެއް ބިނާކުރުމަށެވެ.