ކުރިއަށް އޮތް ބަރަކާތްތެރި ރަމަޟާން މަހުގެ ރޭތަކުގައި ކެއިން ބުއިމުގެ ހިދުމަތްދޭ ތަންތަނާއި، މުދާ ވިއްކާ ތަންތަން ހުޅުވާފައި ބެހެއްޓޭނެ ގަޑިތައް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް އިން މިއަދު އިއުލާނުކޮށްފިއެވެ. މިއީ ކޮންމެ ރޯދަ މަހަކު ވެސް އާންމުންނަށް ފަސޭހައިން ހިދުމަތް ފޯރުކޮށްދިނުމުގެ ގޮތުން ގެންނަ ބަދަލެކެވެ.
އިކޮނޮމިކް މިނިސްޓްރީން ހާމަކޮށްފައިވާ ގޮތުގައި، ރޯދަ މަހުގެ ރޭތަކުގައި ކެފޭ، ރެސްޓޯރެންޓް ފަދަ ކެއިން ބުއިމުގެ ހިދުމަތްދޭ ތަންތަން ހަވީރު 5:30 އިން ފެށިގެން މެންދަމު 3:00 އާ ހަމައަށް ހުޅުވާފައި ބެހެއްޓޭނެއެވެ. އަދި ރޯދަ މަހަށްފަހު އަންނަ ޝައްވާލް މަހުގެ ފުރަތަމަ ހަތް ދުވަހު މިފަދަ ތަންތަން ކޮންމެ ދުވަހަކު ފަތިހު 4:30 އިން ފެށިގެން މެންދަމު 3:00 އާ ހަމައަށް ހުޅުވާފައި ބެހެއްޓުމުގެ ހުއްދަ އޮންނާނެއެވެ.
މުދާ ވިއްކާ ފިހާރަތަކަށް ކަނޑައަޅާފައިވާ ގަޑިތަކަށް ބަލާއިރު، މާދަމާ އިން ފެށިގެން ރޯދަ މަހުގެ ރޭތަކާއި ޝައްވާލް މަހުގެ ފުރަތަމަ ހަތް ދުވަހު ފަތިހު 5:30 އިން ފެށިގެން މެންދަމު 1:00 އާ ހަމައަށް ފިހާރަތައް ހުޅުވާފައި ބެހެއްޓޭނެ ކަމަށް މިނިސްޓްރީން މައުލޫމާތުދެއެވެ.
މިނިސްޓްރީން އިތުރަށް ބުނީ، ރާއްޖޭގައި މީހުން ދިރިއުޅޭ ރަށްތަކުގައި ހިންގާ ކެއިންބުއިމުގެ ހިދުމަތްދޭ ތަންތަނާއި މުދާ ވިއްކާ ތަންތަނުން މި ކަނޑައެޅިފައިވާ ގަޑިތަކަށް އަމަލުކުރުމަށް އިލްތިމާސްކުރާ ކަމަށެވެ. މިއީ ރަމަޟާން މަހުގެ ހާއްސަ އުސޫލުތަކުގެ ދަށުން ވިޔަފާރިތަކާއި އާންމު ހިދުމަތްތައް ތަރުތީބުކުރުމަށް ނިންމި ނިންމުމެކެވެ.